Read lugbara Yeremia 47 Bible Online

Yeremia 47 - lugbara bible

Yeremia 47

¹E’yo Yehovani ecapi nabi Yeremia vu de nga Farau coni Gazani ku, ’ba Filisitiaa ’diyi ma e’yosiri.

²Yehova ’yo ’dini: Emi ne, yini ti angu andralerua ti ti, eri nga ofu yi raza abapi amvesirile; eri nga angu a’bu afa alenia ’diyi pie dria, aku amboru pi ’ba ovupi alenia ’diyi be. ’Ba yi nga owu ra, ’ba dria ovupi angu nde ma alia ’diyi nga dria lulu oga ra.

³’Ba erini okporu ’diyi ma akanya angu tupi pasi yini nzuria ’diyi ma ididi pi ma e’yosi, gari ombani erini nzupi okposi ’diyi ma awu pie, gari erini ’diyi ma pa ma onoza pie, ’ba atapiru ’diyi apa lilioru, ngani lu vile anzi yini vu aluni ku, yi ma drini akale turisi,

⁴a’disiku o’du yini ngazu ’ba Filisitiaa ’diyi dri jazu driari nga eca ra, eri o’du ’ba ’ba aza kopi ecepi ’diyi dezu dria Turo pia Sidoni beri’i. A’disiku Yehovani nga ’ba Filisitiaa ecepi jolokoru, angu Kafitori i lipi miri aliaria ’diyi ma dri jalerisi.

⁵Gaza ma dri ofu tuaru ’bo, ’ba Asikelonini tokoru ’bo, yi ’ba joloko acepi e’bu yinia ’diyi. Mi nga mi rua oli kpere o’du ngopi ya?

⁶Sei Yehovaniri la! o’duni nga aga ngopi ka, mini mi dozu e’yere ya? Mi su mi okporo mini ma alia fo, mi li ava, mi do mi e’yere fo!

⁷Te mi eco mi dozaru e’yere ngoni ngoni ya, de isu Yehova azi e’yo mi dri ’bo? Eri pe eri e’yo ’yezu Asikeloni pi ma ruaa, angu miri tiari be.