Read lugbara Yeremia 49 Bible Online

Yeremia 49 - lugbara bible

Yeremia 49

¹Amoni anziyi ma e’yosi. Yehova ’yo ’dini: Israeli ovu agianzi kokoru ya? Mva erini awita nyapini yo ya? Ka’dini Malikamu nya angu Gadini a’disi ya, ’ba erini ovu aku ambo ambo angu ndea ’diyi ma alia a’disi ya?

²E’yo ’disi o’duni yi nga emu ra, Yehova ’yo ra, ma nga fe ’ba eri cere ombani ’bele Raba Amoni anziyi vileri ma dria; eri nga ofu a bi pari andruariru, yi nga ezoanzi erini ve acisi; o’du ’dasi Israelini nga ’ba ndra i ma angu nyapi ’diyi ma angu nya ra, Yehova ’yo ra.

³Mi ga lulu, Hesiboni la, yini Aini ezale dri jale ’borisi! Emi owu, emi ezoanzi Rabaa ’diyi! Emi su koliba emi opilia, emi oga lulu, emi nzu ’dile azini ’dole kali ma eselia Malikamuni ngale mule ati’borurisi, ’ba erini edeta edepi ’diyi pi ’ba opiru erini ’diyi be tualu.

⁴Mi ipi mi angu e’buru, e’bu mini yini razu aleniarisi a’disi ya, mi zamva asipi vileri la, asi ’bapi lonyi mini ma dria, kini, A’dini nga ca ma vuni ya?-ri’i.

⁵Mi ne, ma nga uri eji mi ruaa, Opi Yehova asikari ongulumuruniri ’yo ra, ’ba dria mi ageia ’diyi ma e’yosi, yi nga emi dro amve ra, yi nga ’ba dria alu alu dro drile, ’ba ngapi ’ba abapi aba ’diyi okupini yo.

⁶Te vilerisi ma nga Amoni anzi ovupi ati’baru ’diyi omvi ra, Yehova ’yo ra.

⁷Edomu ma e’yosi. Yehova asikari ongulumuruniri ’yo’dini: Ondua de i Temania ra ya? E’yo amaza de i ’ba e’yo vaza be ’diyi dri ra ya? Ondua yini avi ra ya?

⁸Emi apa, emi oja emi vile, emi ma ovu ele, emi ’ba ovupi Dedania ’diyi la A’disiku ma nga ocoko eji Esau ma ruaa, o’du mani ngazu eri andrizurisi.

⁹’Ba zabibu efi tipi ’diyi ka eca mi vu, yi ngani zabibu efi vile ’diyi ku tikokoru ku ya? ’Ba oguouru ’diyi ka ecea inisi, yi ngani te afa eza kpere afani dri furia yiniria ku ya?

¹⁰Te ma otru Esauni pililiru, ma anda pari erini zizaru ’diyi ra ree amve, eri econi ani i zizaru ku. Ori erini ja dri ’bo, adripi erini ’diyi pie, ’ba eri ma jo ejelea ’diyi be; eri curu’do yo.

¹¹Mi ku imvoanzi mini ’diyi, te ma nga yi ma ta mba idriru ma’i; mi ku awuzi mini ma oro a’ita be ma vu.

¹²A’disiku Yehova ’yo ’dini: mi ndre, ’ba nde yini yi ma e’yo lile ku kini yi ma mvu okelea ’diyi nga mvu adaru, te ’ba e’yoni ngale isule kuri kiri mi’i ya? Te mi ngani ece e’yo isukokoru kuni ku, te mi nga mvu be.

¹³Mani oyo sole ma ngulupi ma rusi ’borisi, Yehova ’yo ra, kini, Bozirani nga oro e’yo osuzaru, o’dataru, andruru, azini atriaru; aku amboru erini ’diyi dria nga ovu andruru ’dani ’dani.

¹⁴Ma eri e’yo kuza engazu Yehova vuri ’bo, yi pe ojio ma ti suru ndu ndu ma eselia kini: Emi oku emi tualu, emi ma emu eri ma ruaa, emi enga omba ’bazu!

¹⁵Te mi ndre, ma ’ba mi ovuzu wereru suru ndu ndu ma eselia, ’ba mi afa onzomarare ’ba ma eselia.

¹⁶Te e’yo mini uri fezurisi isu de afu mi asiari ici mi ’bo, mi’i ovupi oni gulea, oni dri mbiliri bipi miniruri lao Mi ka tro mi jorovu o’ba uru aji ma jorovule ti, ma nga mi osi ’daarisi va, Yehova ’yo ra.

¹⁷Edomuni nga ofu osutaru; ’ba dria alipi ageiniasi ’diyi nga osu osu, yi nga oli li dra maturu erini ’diyisi.

¹⁸Ekile yini Sodoma pi ogule va Gomora be, aku amboru ovupi yi ma ageia ’diyi pierile, Yehova ’yo ra, ’ba azini ngani oro ’dale ku, ’ba ma ori aluni ngani la ’dale ku.

¹⁹Mi ndre, eri nga tu jo okporu ma dria ekile kami engapi yi tiza Yoridanini ma afusirile, te ma nga fe eri ma apa erisi ndru mbele; te ma nga ’ba pele rari ’ba opitu eri ma drilia. Te a’dini malenini ya? A’dini nga ewu pe ma drini ya?

²⁰’Ba kabilo ocepi ngori nga pa so ma driliani ya? E’yo ’disi emi eri e’yo amaza Yehovani, erini amale Edomu ma driari, azini e’yo edeza erini edele ’ba Temania ’diyi ma driari: Ada yi nga yi ose ’dale kpere kabilo o’bitu ma anzi nyiria; ada ada eri nga pari yini ovuzuri ’ba ovuzu andruru yi be tualu.

²¹Nyaku ya ya e’deza yini ma ididisi; awu indi, o’dukoniri ca kpere Miri Ekarua.

²²Mi ndre, eri nga tu sazu ajile, eri nga i ma opile aja omba ’bazu Bozira ma ruaa; o’du ’dasi ’ba ombaru Edomua ’diyi ma asi nga ovu ekile oku mvaazoni e’duleri ma asile.

²³Damasiki ma e’yosi. Hamati pi ovu drinzasi Aripadi be, yini e’yo onzi ma kuza erilerisi; yi aka teketeke, candi ovu miri ma dria, eri econi ovu ndi ku.

²⁴Damasiki oja i okpo kokoru ’bo, eri oja i vile apazu, rua yaza bi eri ra; rua suza pi bi eri candi be ekile oku mvaazoni e’dulerile.

²⁵Yi kuni aku amboru inzitaruri ku a’disi ya, aku ayiko fepi ma driri!

²⁶E’yo ’disi karile erini nga e’de va gboko erini ’diyia, azini ’ba ombaru erini ’diyi dria nga oji ciri o’du ’darisi, Yehova asikari ongulumuruniri ’yo ra,

²⁷Te ma nga aci edu abi kaliru Damasikiari ma dria, eri nga opi jo Beni-hadadi vile ndripi tu ’diyi ve dria,

²⁸Kedari pi ma e’yosi suru Hazoria, Nebukadreza opi Babuloniarini cole ’diyi be. Yehova ’yo ’dini: Emi enga, emi tu Kedaria! Emi opa anzi engapi etuni efuvuleru ’diyi ma afa!

²⁹Yi nga hema yini pi opa kabilo yini o’biru ’diyi be, yi nga bongo o’iza yini o’du ji yi ma ngulupi ma afaru, afazu pie woro; ngamia yini pie dria, te yi nga wu yi vu: Uri kalania dria kuru kuru ’doni ya!

³⁰Emi apa, eri ere emi ziti, emi ma ovu ele, emi ’ba ovupi Hazoria ’diyi la! Yehova ’yo ra. A’disiku Nebukadreza opi Babuloniarini e’yo amale mi ruaarisi, erini e’yo egale i ma asia ’yezu emi ruaarisi.

³¹Emi enga, emi tu suru ava lipi asi otiza kokoruri vu, Yehova ’yo ra; kalitile yini yo, katala kalitile osozu ’diyi vini yo, ’ba nde yi ovu a’dule.

³²Ngamia yini nga ovu afa opazale, anyapa yini o’biru ’diyi afa ’bani opalerile. Ma nga ’ba dribi ti fapi kalasi kalasi ’diyi ere oli vusi dria; ma nga ocoko yini eji engazu yi ma kalaarisi dria, Yehova ’yo ra.

³³Hazorini nga ovu pari obalakoni ovuzuriru, andruru ’dani ’dani indi; ’ba aluni ngani adri ’dale ku, ’ba ma ori aluni ngani vini la alenia ku indi

³⁴E’yo Yehovani ecapi nabi: Yeremia vu, e’yo Elamunisi, o’du Zedekia opi Yudaarini e’dozu opi nyazurisiri.

³⁵Yehova asikari ongulumuruniri ’yo ’dini: Emi ndre, ma nga osu Elamuni nyo ra, okpo yini ovupi; okpo yiniru agapiri’i;

³⁶ma nga oli su engapi ’bu ma kala suria ’diyi eji Elamu ma dria, azini ma nga yi ere oli su ’diyi vusi dria; suru azini ’ba drole Elamuarisi ’diyini ngale cale vunia kuni yo.

³⁷Ma nga fe ’ba Elamuni nga ovu urisi ari’ba yini ma drilia, ’ba ndapi yi fupi ’diyi ma drilia indi; ma nga e’yo onzi eli yi ma ruaa, adani adra mani okporuri’i, Yehova ’yo ra. Te ma nga sei ma ti pe yi ma vutisi de nga ma jani yi ma dri teketeke ku;

³⁸Ma nga oguna mani ’ba Elamua, ma nga vini opi piyi ma dri ja aleniarisi ’ba opiru ’diyi be, Yehova ’yo ra.

³⁹Te eri nga eca ’dini o’du vilerisi, ma nga ’ba Elamua bile ati’baru ’diyi omvi vile dika, Yehova ’yo ra.