Read lugbara Yeremia 5 Bible Online

Yeremia 5 - lugbara bible

Yeremia 5

¹Emi onzu ’dale azini ’dole geri Yerusalemua ’diyi ma alia, emi ndre curu’do, emi ma ni! Emi nda gboko erini walaru ’diyi ma alia, kani emi eco ’ba alu isuzaru, ’ba alu e’yo kililiru ’yepi e’yo adaru ndapiri indi yani; ka’dini ma nga onzi aku ndeni wura.

²Yi ka tro ’yo kini, Ekile Yehovani ovule idri berile; ti, ada yi oyo so inzosi.

³Yehova la, mile mini luni e’yo adaru ku ya? Mi oco yi ’bo te yi ovuni candisi ku; mi ja yi dri ra, te yi ga imbata nde erikokoru si. Yi ’ba yi ma andreti kongolokoru aga oni ra; yi ga emviko si.

⁴Ma nga di ’yo ra, ’Ba ’diyi ’ba alioru, yi ’ba azazaru ’diyi ka; a’disiku yi nini geri Yehovani ku, nini Mungu yiniri ma azita ku indi.

⁵Ma nga mu ’ba ’wara ’diyi vu, ma nga e’yo ’yo yi tia; a’disiku yi ni geri Yehovani, azini azita Mungu yinirini ra. Te isu yi onyo kulumbu indi, oce afa yi ombezuri ’bo.

⁶E’yo disi kami engapi oceari nga yi ofu ra,balau engapi roko driari nga yi dri ja ra. O’duni nga i zi aku yini ma ageia, eri nga ’ba dria fupi aku nde ’diyiasi amve ’diyi oce kpi; yi ma ezatani ovule kakaurisi,e’yo yiru asizu vile ’diyini ezulerisi.

⁷Ma eco mi ma e’yo onzi wuzu ngoni ngoni ya? Anzi mini ku ma ’bo, so oyo yi ovupi munguru ku ’diyi ma rusi. Ma ka nyaka fe yini trazu ’bo yi o’ba ali, yi oku yi ongulumuru oku awuouru ’diyi vile joa.

⁸Yi ovu ekile akanya nyaka nyapi onyiru, acipi yini lelerile ’diyile, yi alu alu owu ’ba i vile jo ejeliari ma oku obezu.

⁹Yehova kini, Ma ngani yi co e’yo ’diyisi ku ya?

¹⁰Emi tu uru abi erini ma dria, emi ja eri dri, te emi ma de teketeke ku; emi ma nze arakala erini, yini ovule Yehovani kurisi.

¹¹A’disiku ori’ba Israelini pini ’yele ma vu lokirisi tu ori’ba Yudani berisi, Yehova ’yoni.

¹²Yi ga Yehovani ’bo, yi ’yo kini, Eri eri’i yo; e’yo ewaru ngani eca ama dria ku, ama ngani vini sei pi ndre liki be ku.

¹³’Ba nabiru ’diyi nga yi oja olirikoru; e’yo ’yoza ovuni yi ma alia ku. ’Ba nga ’ye yi vu ’dinile!

¹⁴E’yo ’disi Yehova, Mungu asikari ongulumuruniri ’yo ’dini kini: Emini e’yo ’diri ’yolerisi, mi ne, ma nga e’yo mani mi tiliari ’ba acile, ma nga suru nde ’diri ’ba ejale, te eri nga yi ve kieikiei.

¹⁵Mi ne, ma nga suru azini eji emi ruaa engazu ziri, emi ori’ba Israelini la, Yehova ’yoni. Eri suru okporu, suru driori, suru emini yi ma ti nile kuri, emi econi vini e’yo yini ’yoleri vazaru ku indi

¹⁶Endere yini eri nyadri mboruri, yi dria ’ba okporuni.

¹⁷Te yi nga anya kaza mini nya dria, enya mini be, te ’yele fele mi anzipi dri mi ezopi beri; yi nga kabilo mini o’biru ’diyi onya, ti o’biru mini ’diyi be; yi nga pati mini zabibuni pi nya eliopati mini be; te aku emini kali be okporu mini asi ’bazu yi ma dria ’diyi yi nga yi anzu dria seisi.

¹⁸Te o’du nde ’dayisi ti, ma ngani emi de teketeke ku, Yehova ’yoni.

¹⁹Eri nga eca ’dini, emi ka ’yo ra, Yehova Mungu amaniri ’ye e’yo ’diyi dria ama vu a’di e’yosi ya? mi nga ani e’yoni omvi yi tia ’dini, kini, Ekile emini ma kule ra, Mungu andini inzile angu emi vileri ma aliarile, ’dinile indi emi nga azi nga suru andini dri angu ovupi emini kuri ma alia ra,

²⁰Emi olu e’yo ’diri ori’ba Yakoboni eselia, emi eku eri Yudaa eselia indi, kini:

²¹Emi ma eri e’yo ’diri curu’do, emi ’ba azazaru e’yo vapi ku ’diyi la, ovupi mile be, te ndrepi ku, ovupi bile be, te eripi ku ’diyi.

²²Yehova kini, Emi runi ma ku ya? Emi rua ngani ya ma drilia ku ya? Ma ’ba ndra cinya ovuzu lokiri mirini mirini ecozu agazu ku azita i depi kurisi; ka tro yi miri ndeni mbupi mbu ’diyi mbu uru ti, yi econi agazu ku, ka tro wu okposi ti, yi econi eri agazaru ku.

²³Te ’ba ’diyi ovu asi amboru, lezu mbuzu amve ambosiri be; yi mbu ra, mu yi ma parisi ra.

²⁴Yi ’yoni yi asia ku kini, Ama ma ru di Yehova Mungu amani, ozoo fepi ewu erinisi, ozoo ebaaniri pi ozoo ecaaniri be; eri’i ewu anya lozuri ma ta mbapi amaniri.

²⁵Ezata emini oja afa ’diyi emi vu ziri, e’yo onzi emini oga e’yo onyiru yi kazu ecazu emi vu ku.

²⁶A’disiku ’ba mani ’diyi ma eselia ’ba onzi ’diyi indi; yi ’ba te ekile ’ba aria obipi ’diyini telerile. Yi ’ba emba yini; yi ’ba bi.

²⁷Ekile rambani gale tre ariasirile, ’dini indi jo yini ga tre lokirisi; e’yo ’disi yi eca amboru, yi ofu lonyi e’iru ani,

²⁸yi a’bu tu, yi ma ma ovu inikini dozaru, Ada, yi aga drile drile ’yeta onzi yini ’diyisi ra; yi nzeni imvoanzi ma e’yo ndu kilili ku yi ma nga ani drileba isu beni, yi lini e’yo ’ba afa owupi ’diyini kilili ku indi.

²⁹Yehova kini, Ma ngani yi andri e’yo ’diyisi ku ya? Ma orindi ngani aroti nda ofe suru ’dinile ’diri ma ruaa ku ya?

³⁰E’yo osutaru, e’yo onzivuru tu ’ye i angua ra:

³¹nabi ondri e’yo inzosi, atalau edeta edepi ’diyi ce ’ba dri yi ma okposi; te ’ba mani ’diyi le tu eri ma ovu ’dini, te emi nga a’du ’ye e’yo ma kalatini asizuria ya?