Read lugbara Yeremia 52 Bible Online

Yeremia 52 - lugbara bible

Yeremia 52

¹Zedekia ovu eli be kali iri drini alu, erini e’dozu opi nyazurisi; nya opi eli mudri drini alu Yerusalemua. Andri erini ma ru ndra Hamutali, Yeremia Libinaari ma zi

²Eri ’ye ndra e’yo ovupi onzi Yehova ma milia, ekile dria Yehoyakimuni ndra ’yele rarile.

³A’disiku adra Yehovanisi eri nga eca ’dini Yerusalemu pia Yuda be, de nga eri ’beni yi i ma miliarisi dria ku. Te Zedekia mbu opi Babuloniari ma ruaansi amve.

⁴Eri nga eca ’dini eli oromi erini opi nyazurisi, mba mudriri ma mba o’du mudrisi, Nebukadreza opi Babuloniari nga emu a’di ’dizu Yerusalemu be, eri’i asikari ongulumuru erini ’diyi be dria, yi nga hema aso eri ma ageia, yi nga pari okporu ede eri ageia dria.

⁵’Dini yi nga di aku amboru nderi ace kuru cazu eli mudri drini alu Zedekianiria.

⁶Mba su ma o’du oromisi, tiki amboru ovu aku ndea, nyaka ovuni di ’ba angu ndea ’diyi dri aluni ku,

⁷O’du ’dasi yi si abi aku ndeni ma tala huu, fuzu; ’ba ombaru ’diyi nga apa dria, yi fu aku aliarisi Inisi geri kalitile abi iri ma eselia amvu opini ma tiarisi, te ’ba Kalideyaa ’diyi ace aku agei kuru. Te yi mu geri Arabaarisi.

⁸Te asikari ongulumuru ’ba Kalideyani ’diyi nga opi ma vuti dro ra, yi nga Zedekiani isu angu senderu Yerikoaria; te asikari ongulumuru erini ’diyi nga yi ere eri vusi dria ra.

⁹Yi nga oplni bi ra, nga eri ji uru opi Babuloniari vu Ribila angu Hamatiaria; eri nga di e’yo li eri ma dria.

¹⁰Opi Babuloniari nga anzi Zedekiani ofu eri ma milia ayii, ofu vini ’ba opiru Yudani dria Ribilaa indi.

¹¹Eri oso mile Zedekiani ra, ’i eri anzirikusi; opi Babuloniari nga eri ji Babulonia, ’ba eri arujoa ’dale cazu erini drazuria.

¹²Temba towiri ma o’du mudrisi -’di eli mudri drini oromi Nebukadreza opi Babuloniarini opi nyazurisi -ambo asikari opi agei tepi ’diyi ma drilia, pa sopi opi Babuloniari ma driliari, Nebuzaradani, eca Yerusalemua.

¹³Eri du jo Yehovani ma ti acisi, jo opi vileri pie, jo Yerusalemua ’diyi pie dria; eri odu jo ambo ambo ’diyi ma ti dria acisi ra.

¹⁴Asikari ongulumuru ’ba Kalideyani dria ovopi ’ba asikari opi ma agei tepi ’diyi ma dri cepiri be ’diyi, yi onyo abi kaliru dria Yerusalemuari kala vusi kala vusi.

¹⁵Etu ’dasi Nebuzaradani ambo asikari opi ma agei tepi ’diyi ma driliari ji ’ba alio emveru ’diyi ma azi ati’baru, ’ba ovupi aku amboruri ma alia jolokoru ’diyi pie, ’ba apapi yi ojapi opi Babuloniari vu ’diyi pie, ’ba ongulumuru ma joloko pie dria.

¹⁶Te Nebuzaradani ambo asikari opi ma agei tepi ’diyi ma driliari ku ’ba alia emveru angu nde ma alia ’diyi; ma azi pati zabibuni ma agei tezu azini amvu ’yazu.

¹⁷Te afa i’dile pa sopi piriru: molaru ovupi Yehova vile joa ’diyi pi, afa etini ’bazu ’diyi pie, otaka molaru miriniri ovupi Yehova vile joa ’diyi pie, ’ba Kalideyaa ’diyi onyo yi nyingiriki, omvu mola dria afa ndeni, ji Babulonia indi.

¹⁸Yi onze vini imvu pi, pau pie, akpaa pie, awala pie, kabile pie, afazu molaru azi ngazu dria ’diyi pie.

¹⁹Ambo asikari opi ma agei tepi ’diyi ma driliari onze okelea pi, ajikoa pie, awala pie, imvu pie, tala pie, kabile pie, otekua pie-ovupi meleru ’diyi yi ji meleru, ovupi dahaburu ’diyi yi ii dahaburu.

²⁰Mola ovupi afa iri i’dile pa sopi piriru ’diyi pi ma ruaari, miri alu nderi pie, ti molaru mudri drini iri etinia ’diyi pie, Sulemanini edele jo Yehovani dri ’diyi--econi nziza mola nderini o’bizaru ku.

²¹Afa piriru ’diyi ma alu ma zoza ovu wuale mudri drini aro, ombo erini o’bizu le baka wuale mudri drini iri, piza erini ovu drianzi sule, aleni eri pirini.

²²Dri molaru ovu drinia, dri nde ma zoza uruleru ovu wuale towi, emba onyiafaruri ovu dri nde ma ageia kuru pomegranateni be, yi dria molaru. Afa piriru iriri ovu vini afa onyiafaru be tro tro ’diyile, pomegranateni be.

²³Kalatinia dria pati efi pomegranati ovu kali oromi drini azia; te pomegranati ovupi emba onyiafaruri ma dria ’diyima kalafe driari ovuturualu.

²⁴Ambo asikari ma agei tepi ’diyi ma driliari nga Seraya kuhani amboruri pi bi Zefania kuhani iriri pie, ’ba na jotile agei tepi ’diyi pie;

²⁵te aku eseliasi eri bi ambo ’ba ombaru ’diyi ma driliari piyi, ’ba opi ma mileti ndrepi, yini isule aku ma alia ’diyi ma azi aziri ’diyi pie; ambo asikari ongulumuru driliari ma waraga sipi ’ba angu ndea ’diyi okupiri pie; azini ’ba angu e’ipi ma azi kali azia yini isule aku amboru ma alia ’diyi pie.

²⁶Te Nebuzaradani ambo asikari opi ma agei tepi ’diyi ma driliari nga yi obi ji opi Babuloniari vu Ribilaa.

²⁷Opi Babuloniari co yi ra, ofu yi Ribilaa angu Hamatiaria. ’Dini yi ji Yudani ati’baru angu eriniasi ra.

²⁸’Ba Nebukadrezani o’dule jile ati’baru ’diyi yi ’di: eli azirisi, ’ba Yahudini alifu na drini kali iri drini na;

²⁹te eli Nebukadrezani mudri drini arorisi eri o’du ’ba turu aro drini kali na drini iri, ji ati’baru Yerusalemuasi;

³⁰eli Nebukadrezani kali iri drini narisi, Nebuzaradani ambo asikari opi agei tepi ’diyi ma driliari o’du ’ba Yahudini turu aziri kali su drini towi, ji yi ati’baru; ’ba dria ma kalafe ovu di alifu su drini turu azia.

³¹Eri nga cea ’dini Yehoyakini opi Yudaarini ovuzu ati’baru eli kali na drini azirisi, mba mudri drini iriri ma o’du kali iri drini towisi, Evili-merodaki opi Babuloniari, eli erini oko opi nyazurisi, nga Yehoyakini opi Yudaari ma dri enga uru, nga eri ofu arujoarisi ra

³²eri nga e’yo ’yo eri ma tia yikisi, nga eri ma oguna opiniri ’ba uru opi ovupi eri be Babulonia ’diyi ma oguna ma drilia,

³³eri oja bongo erini arujoniri ra. Eri nga nyaka nya eri ma drilia o’du erini ovuzu idrirurisi dria;

³⁴te nyaka awaza erini ma e’yo ovu ’dini, Opi Babuloniari awa nyaka eriniri ’dani, fe nyaka esele eriniri eri dri angu owu vusi, o’du erini ovuzu idrirurisi dria, cazu erini drazuria.