Read lugbara Yeremia 7 Bible Online

Yeremia 7 - lugbara bible

Yeremia 7

¹E’yo ’yoza ecapi Yeremia vu engapi Yehova vuri, kini:

²Mi so pa jo Yehovani ma tilia, mi olu e’yo ’diri ’dale, mi ’yo, Emi eri e’yo Yehovani, emi ’ba dria Yudaa efipi kalitile ’diyi ma aliasi Yehovani inzizu ’diyi.

³Yehova asikari ongulumuruni, Mungu Israeliniri, ’yo ’dini, Emi oja acita emini ’yeta emini be kililiru raka, ma nga fe emi ma adri pari ’diri ma alia ani ndo,

⁴Emi ma ’ba a’ita emini e’yo ’yoza inzoru ’diyi ma alia ku, kini, ’Di ovu hekalu Yehovani, hekalu Yehovani, hekalu Yehovani.

⁵A’disiku emi ka acita emini oja teketeke, ’yeta emini be, emi ka e’yo ’ba pi ma eselia agyi beri li kililiru dria,

⁶emi ka ani’bo pi inza okporu ku, imvoanzi pie, awuzio pie, emi ka ’ba ali kokoru ma ari ada pari ’doria ku, emi ka aci Mungu andini ma vuti bizu candi ejizu emi ngulupi ma dria ku,

⁷ka’dini ma nga fe emi ma adri pari ’dori ma alia, angu mani fele a’bi emini dri engazu drio cazu kpere ’dani ’daniri ma alia ra.

⁸Mi ndre, emi asi emini ’ba e’yo ’yoza inzoru ’diyi ma dria oye.

⁹Emi nga afa ogu, emi nga ’ba fu, emi nga ali o’ba, emi nga oyo so inzosi, emi nga obiese ve Baali dri, emi nga aci Mungu andini emini nile oku ku ’diyi ma vutisi,

¹⁰emi nga vini emu pa so ma drilia jo ’diri ’bani omvele ru manisiri ma alia, ’yozu kini, Ama ovu pazaru -te emi nga e’yo onzikanyaru ngule onzi ’diyi ’ye dria ’dani ya?

¹¹Jo ’diri, ’bani omvele ru manisiri, eca emi milia oji oguouni yi zizu aleniariru ya? Mi ndre, ma’i ma ngulupi ndre e’yo nderi ra, Yehova ’yoni.

¹²Te emi mu curu’do pari mani ndra Siloaria, pari mani ndra fele ma runi adrizu okorisiria, emi ma ndre e’yo mani ’yele eri ruaa, e’yo onzi ’ba mani Israelini ’diyini ’yele ’diyi ma e’yosiri.

¹³Yehova kini, Te emini ’yeta ’diyi ’yele driarisi, te ma ’yo emi tia mani engaria o’biti drio drio e’yo ’yoria emi tia, te emi erini ku; ma omve emi ra, te emi omvini e’yo ku;

¹⁴e’yo ’disi jo nde ’bani omvele ru manisi, emini ovule a’itasi eri vu ’diri, pari nde mani ndra fele emi dri a’bi emini beri, ma nga eri ’ye ekile mani Siloni ’yele ’borile.

¹⁵Azini ma nga emi ’be amve ma miliasi, ekile mani adripi emini, ori’ba dria Efiraimuni ’diyi ’bele amve ’borile.

¹⁶E’yo ’disi mi ma zi Mungu ’ba ’diyi dri ku, mi ma enga o’duko mini wuzu yisi ku, ma zi Mungu yisi ku indi, mi ’ba matu ma vu yisi ku indi, a’disiku ma ngani mi eri ku.

¹⁷Mi ndreni e’yo yini ’yele aku ambo ambo Yudaa ’diyi pi ma alia, geri Yerusalemua ’diyi pieri ku ya?

¹⁸Anzipi yi eja ovu, atapi yi aci edu, okupi yi enya ova, enya olemi olizu oku opiru ’buari dri; azini edeta mvuzaru osuzu Mungu andi ’diyi dri, adra mani engazu,

¹⁹Yehova kini, Yi ma adra enga ya? Yi feni ’di aoko nyani yi ngulupi ceni ceni, drinza fezu yi ngulupi dri ku ya?

²⁰E’yo ’disi Yehova Mungu ’yo ’dini: Mi ndre, ma nga aoko mani osu pari ’diri ma dria adra mani be ra, ’ba ma dria, anyapa pie, pati asea ’diyi pie, afa nyakuni kaleri pie; eri nga ve ra, acini ngani i inyu ku.

²¹Yehova asikari ongulumuruni, Mungu Israeliniri ’yo ’dini: Emi o’ba afa feza vezaru emini edeta azini emini edele ’diyi ma ruaa, emi ma nya za.

²²A’disiku o’du mani emi a’bipi ejizu engazu angu Misiriarisi, ma ’yoni ndra yi ma tia afa feza vezaru ’diyi pi ma dria, edeta edezaru ’diyi be ku.

²³Te ma azi ndra e’yo ’diri yi ma tia ra, kini, Emi eri o’duko mani, ma nga ovu Mungu emini, emi vini nga ovu ’ba mani beni; te emi ma aci geri dria mani azile emi tiari ma alia, ’dini e’yo emini ma ovu ani baru beni.

²⁴Te yi erini ku, yi coni vini yi ma bile ku, te yi aci yi ma ngulupi ma asisile vusi, azini ambo asi onzi yinini vusi, yi asi vile, muni drile ku.

²⁵Engazu o’du emi a’bipini efuzu angu Misiriarisi ecazu kpere andru, ma ope ati’ba mani ’ba nabiru ’diyi ma ti dria emi vu, mani engaria o’biti drio o’du vusi, yi ti opezu;

²⁶te ti, yi erini e’yo mani ku, yi coni vini yi ma bile ma vu ku, te yi ’ba ombe yini mbazaru. Yi ’ye onzi aga yi ma a’bipini ’yele ’diyi ra.

²⁷Te mi nga e’yo ’diyi ’yo yi tia dria, te yi ngani e’yo mini eri ku. Mi nga vini yi omve ra, te yi ngani e’yo omvi mi tia ku.

²⁸Mi nga ’yo yi tia kini, Suru ’diri eri suru Yehova Mungu yini ma o’duko eripi kuri’i, yi a’ini vini imbata ku; e’yo adari ja dri ’bo; de i yi ma tiliariasi ’bo.

²⁹Emi fa dri’bi emini, emi yi dri’bi nderi amve; emi e’do wuta wuzu oni dri nditiriri ’diyi ma dria, a’disiku Yehova ’be suru adra erini beri, ku yi ra.

³⁰Te Yuda anziyi ’ye e’yo ovupi onzi ma miliari ra, Yehova ’yoni; yi ’ba afa onzikanyaru ngule onzi ’diyi jo nde yini omvele ru manisiri ma alia, eri ezazu.

³¹Yi si vini pari uruleru ’diyi Tofeti dri, e’buti Hinomu mviniria, ’dini agupianzi yini evezu acia ezoanzi yini be; te ma feni azita nderi ku, e’yo nde fini vini ma asia ku.

³²Yehova kini, E’yo ’disi mi ne, o’duni nga eca, o’du ndesi yi ngani eri omve Tofeti’i dika ku, kani e’bu Hinomu mviniri’i ku, te e’bu ’ba Fuzaniri’i: a’disiku yi nga ’ba sa Tofetia, cazu pari avu sazurini acezu dika kuria.

³³Azini avu ’ba nde ’diyini nga ovu aria ’bua ’diyi pi dri zaru, nguru nyakua ’diyi be; te ’ba ngapi yi dropini yo.

³⁴Te ma nga fe oguta pi ma o’dukoni asizu aceceni pie, izioni pie, amuruani pie, aku ambo ambo Yudaa ’diyi pi ma alia geri Yerusalemua ’diyi be; a’disiku angu nde nga eca andruru.