Read lugbara Yeremia 9 Bible Online

Yeremia 9 - lugbara bible

Yeremia 9

¹Ma dri ka te ovu yi razale fo, mindre ma miliari ka te ovu yi a’dile fo, ma eco te ani wuzu etusi ini be rra ’ba ofule suru mani ma zi ma eselia ’diyisi beni fo!

²Ma ka te ovu boroko ’ba acipi aci ’diyiniri be angu roko driaria ’yeke, ma eco te ani ’ba mani ’diyi kuzu ra muzu beni! A’disiku yi dria ovu ’ba ali o’bapi ’diyi, yi ovu ’ba ongulumu lokiriru ’diyi.

³Yi andre yini ago inzosi, ekile ’bani osu nzolerile; yi zo okporu angu ma alia, te e’yo adarusi yo; yi zo e’yo onzi azinisi, azinisi, te nini ma ku, Yehova ’yoni.

⁴Emi dria alu alu ma te emi agei ’ba jo ejele eminia ’diyisi, emi ’ba asi emini adripi aluni ma dria ku; a’disiku adripi dria alu alu nga adripi ma drileba pa nyani, azini ’ba jo ejelea ’dria alu alu nga aci ’ba ma eselia e’yo inzoru ekuzu.

⁵Yi alu alu nga yi agyini ici, yi ngani e’yo adaru ’yo ku; yi imba yi ma andre inzo lizu ’bo; yi fe yi ande ezata ezazu.

⁶Pari mini adrizuri eri ovu lokiri ma eselia; inzo ma e’yosi yi ga ma nikokoru si, Yehova ’yoni.

⁷E’yo ’disi Yehova asikari ongulumuruniri ’yo ’dini: Mi ndre, ma nga fe yi ma aka ra, ma nga yi o’bi ra, ma eco e’yo azini ndu ’yezaru ngoni ngoni, suru mani ma zi ma e’yosi ya?

⁸Andre yini eri ’ye wari be; eri e’yo lokiriru ’yo’i; ’ba eri e’yo anzuru ’yo i agyi ma tia tisi, te eri eri mba fu asi asiru.

⁹Ma ngani yi co e’yo ’diyisi ku ya? Yehova kini; ma orindi ngani arioti nda ofe suru ’dinile ’diri ma ruaa ku ya?

¹⁰Ma nga e’do wu lulu gaza be oni ’diyisi, ma nga imvo ongo ngo nyamuko roko dria ’diyisi, a’disiku ve yi ’bo, ’dini ’ba aluni agani ani yi esceliasi ku, ’ba econi ti erizaru ’duria leu; aria ’bua ’diyi anyapa ’diyi be apa mu yi parisi ’bo.

¹¹Ma nga vini Yerusalemuni ’ba amuru, pari obalokoni ovuzuriru; ma nga aku ambo ambo Yudaa diyi ’ba andruru, ’bani ani ovuzu alenia yoriru.

¹²’Ra ondua be ecopi e’yo ’diri nipiri a’di’i ya? ’Ba Yehovani e’yo ’yozu i ma tisi tiniri eri a’di’i, ’dini eri ma olu e’yo nderi ani ya? Angu ja dri, eza i ovuzu ekile angu rokorurile, ’dini ’ba aluni agazu ani eseliasi ku a’disi ya?

¹³Yehova ’yo kini, Yini azita mani, mani ’bale yi ma miliari kulerisi, yini o’duko mani eri ku acizu alenia indi kurisi,

¹⁴te yi aci ambo yi ngulupi ma asiari vusi, Baali ma vuti bizu, ekile yi ma atapini yi imbalerile.

¹⁵E’yo ’disi Yehova asikari ongulumuruni, Mungu Israeliniri ’yo ’dini: Mi ndre, ma nga suru ’diri dri enyata okaru fe nya, ma nga aro drapi ojileri fe mvu yi dri.

¹⁶nga yi ere suru jururu, yi’i yi a’bipi be yini nile nga ku ’diyi ma eselia; ma nga sei ma ti pe yi vutia, de cazu mani yi inizuria.

¹⁷Yehova asikari ongulumuruniri ’yo’dini: Emi ega, emi omve oku lulu gapi ’diyi yi ma emu ra; emi pe ’ba ti oku onduouru ’diyi omvezu;

¹⁸yi ma ’ye mbelembele, yi ma e’do awu wuzu amasi, mindre ma ra ama milia ani, mile ongorobi amania yi ma adi ani.

¹⁹Te ’ba eri o’duko wutani engazu Zionia kini: Eyawaye! eza di ama ’doni ya! Ama ovu drinzasi tu amani angu kulerisi, yini jo amani ogule va ’borisi.

²⁰Te emi eri e’yo Yehovani fo, emi oku la! Eco emi bile ma eri e’yo efupi eri tiliari; emi imba emi ezopi awu wuzu, ’ba alu alu ma imba i agyini imvo ongo ngozu.

²¹Drani tule file derisa amaniarisi, erini file jo amboru amani ’diyi ma aliarisi, eri oli anzi amani amve ’diyi, azini karile gbokoa ’diyi.

²²Mi ’yo kini, Yehova ’yo ’dini: Avu ’bani nga o’de asea ekile warale, ekile anya vile ’ba lopiri ma pamvuarile, te ’ba ngapi yi okupini yo.

²³Yehova ’yo ’dini: ’Ba onduaru ma enya i ondua inisi ku, ’ba okporu ma enya i okpo inisi ku, ’ba afa e’iru ma enya i lonyi inisi ku indi;

²⁴re ’ba i enyapiri ma enya i e’yo ’dirisi, erini ma vale azini ma nile kini ma Yehova yiki aleruri pi ’bapi nyakua, e’yo liza kililiruri pie, onyi pieri’irisi; a’disiku e’yo ’diyi ma dri ayiko fe, Yehova ’yoni.

²⁵Mi ndre, o’du yi nga eca ra, Yehova kini, o’du nde ’diyisi ma nga ’ba agele liza be ’diyi oco yini yi lile kurisi-

²⁶Misiri pi, Yuda pie, ’Edomu pie, Amoni anziyi pie, Moabu pie, ’ba yi ma dribi ti fapi kalasi kalasi, ovupi angu roko driaria ’diyi be dria; a’disiku suru dria yi lini agele ku, te ori’ba dria Israelini ma asi ovu likokoru.