Read lugbara Imvo Ongo 1 Bible Online

Imvo Ongo 1 - lugbara bible

Imvo Ongo 1

¹Aku amboru ovupi mira ’ba be treri, ri pirini ’doni ya! Eri eca awuzioru ’doni ya! eri’i ndra ovupi amboru suru ma eseliari! Eri’i ovupi ndra opi zaaru angu awaza ma eseliari, eri ofu musoro ’bepiriru ’doni ya!

²Eri wu inisi tu, azini eri ma mindre osi eri ma o’boloa; ’ba eri lepi ’diyi ma eselia dria ’ba eri ma asi omipini yo; agyi erini dria yi ’ye eri vu lokirisi, yi oja yi eri ma ari’baru.

³Yuda mu ati’boru inzata amboru ma e’yosi, azi okporu ati’boniri ma e’yosi indi; eri adri juru ma eselia, eri isuni ava liza ku; ’ba dria eri ecandipi ’diyi isu eri pari ocokoru ma alia.

⁴Gboko Zionia ’diyi yi owu owu, a’disiku ’ba aluni emuni okuza inzizaruria ku; kalitile erini ’diyi dria andruru, atalau erini edeta edepi ’diyi yi ota ra; ezoanzi erini aliriaru ’diyi ovu ecandizaru, azini eri ma ngulupi ovu candi okangalikaru ma alia.

⁵’Ba omba ’bapi eri be ’diyi ofu drileru, azini ari’ba erini ofu drilebaru, a’disiku Yehova fe candi eri dri azi onzi erini o’biru ’diyisi ’bo; anzi nyiri erini mu ati’baru ’ba eri ecandipiri ma drilia.;

⁶Diza opini eriniri ku Zioni zini ’bo. Opianzi erini ’diyi oja yi kile yere iribi ndrupi ti ’diyile; azini yi mu okpo kokoru ’ba yi vuti dropi ’diyi ma drilia.

⁷O’du Yerusalemuni candi nyazu azini ovuzu ocoko berisi, eri ega afa ayiko fepi eri dri ewu driori ma alia’diyi ma e’yo. ’Ba erini ka o’de ’ba omba ’bapi eri be ’diyi ma drilia, ’ba eri ma aza kopini aluni yo, ’ba omba ’bapi eri be nde ’diyi ndre eri ra, yi ’ba eri oguaru erini i ojale tokorisi.

⁸Yerusalemu eza e’yo amboru, e’yo ’disi eri eca afa ondirurile; ’ba ndra eri inzipi ’diyi dria yi ede eri ede ede, yini rua erini pililiri ndrelerisi; ada eri ota ra azini oja i vivileru.

⁹Ondi erini ovu ndra bongo erini ma tia; eri egani asiza ini ma e’yo ku; e’yo ’disi eri esi va osutaru; ’ba eri ma asi omipini yo. Mi lu, Yehova la, inzata mani, a’disiku ari’boni i ’bale amborurisi!

¹⁰’Ba omba ’bapi eri beri eju i ma dri afa erini ayiko fepi ’diyi ma dria ci; a’disiku eri ndre ’ba toko fi pari erini alatararuria ’bo, ’ba ndra mini e’vo azile ma fi ’ba ongulemuru mini ma alia ku ’diyi,

¹¹’Ba erini dria ota ota, yi nyaka nda; yi ofe afa yini ayiko fepi ’diyi nyakasi ’bo yi ma orindi egazu. Mi ndre, Yehova la, mi lu, mani ecale edemararurisi.

¹²Emi asini e’yo nderisi ku ya, emi dria alipi ageinisi ’diyi? Emi lu, emi ndre candi azini i sipi candi mani i ’yepi ma ruaari beri ka indi ya, candi Yehovani ma inzazu 0’du adra aciru erinirisiri’i.

¹³Engazu uru eri pe aci ma ti ma falaa, aci nde aga yi ’bo; eri ’be emba ma pa bizu; eri oja ma vile ’bo; eri gbu ma a’dule, fe asi mani fu etu zu.

¹⁴Eri ombe ezata mani ’diyi tualu kulumburu i ma drisi; yi eci yi tualu; etu ma embelia; eri fe ma okponi i dezu; Opi fe ma yi ma dria ’bo, ’ba mani ecozu pa sozu yi ma milia ku ’diyi.

¹⁵Opi ’ba ’ba mani okporu ’diyi ecazu dria toko ma eselia; eri omve okuza inzizaruri ma ruaa ’bo, karile mani anzizu. Opi tu Yuda zi aliriaru ekile pari pati su nzizuri ma aliarile ’bo.

¹⁶Ma owu e’yo ’diyisi owu ovu; ma mileni yo, ma mileni yo, eri ra yiru ’do’i yo; A’disiku ’ba ’ba asi omipi te ecopi ma orindi ’bapi o’dirurini ovule ma be rerisi; anzi mani yi pirini, a’disiku ari’bani agale rarisi.

¹⁷Zionini i ma dri eju, te ’ba aluni eri ma asi omipini yo; Yehova azi e’yo Yakobonisi kini, ’ba eri ma ageia kuru ’diyi ma ovu ’ba omba ’bapi eri be’diyi; Yerusalemuni yi ma eselia kile afa ondirule.

¹⁸Yehovani kililiruni, te ma’i ma mbu amve azita erini kuzu; emi eri, kirikiri, emi suru dria, emi lu candi mani; ezoanzi mani aliriaru ’diyi pi karile be yi mu ati’baa ’bo.

¹⁹Ma omve ’ba ma lepi ’diyi te yi ici ma ra; kuhani mani ’diyi pi ’ba ’wara mani ’diyi be odra aku amboru ndea ra, yini nyaka ndaria yi ma orindi egazu.

²⁰Mi lu, Yehova la, mani ovule e’yo ewaru aliarisi; ma asi li li, ma asi ombu ombu mani mbule amve onzikanyarurisi. Amve amveleru seini olini; akua alialeru drani ’ba cini.

²¹Yi eri ’dini kini ma ota ra; ’ba ma asi omipini yo. Ari’ba mani dria eri candi mani ma e’yo ’bo; yi ovu ayikosi mini e’yo nderi ’yelerisi. Mi nga o’du mira mini azileri eji, ’ te yi nga ovu male.

²²Mi fe azi onzi yini dria ma eca mi milia; azini mi ’ye yi vu ekile mini ’yele ma vu azi onzi dria mani ’diyisirile; a’disiku otaza mani yi kakau, ma asi fu ra.