Read lugbara Imvo Ongo 2 Bible Online

Imvo Ongo 2 - lugbara bible

Imvo Ongo 2

¹Opi a’bu Zioni zini iritisi adra iniri ma alia ’doni ya! Eri e’be ndriza Israelini engazu ’bua va nyakua ’bo; azini eri egani pari ini pa ’bazuri ma e’yo o’du ini ovuzu adrasiria ku.

²Opi oki aku Yakoboni ’diyi dria ’bo, azini eri ovuni yikisi ku; adra erinirisi eri ogu pari okporu Yuda ma zini ’diyi va; eri cii yi va kpere nyakua ’bo, eri eza suru nyaza, opianzi alenia ’diyi be.

³Adra aciru erinirisi eri oli o’yu Israelini dria ’diyi ra; eri omvi i ma dri ndiri ari’ba erini ma driliarisi vile ’bo; azini eri eve Yakoboni ’bo, ekile aci dipi angu vepi kalasi kururile.

⁴Eri nzo osu erini ekile jurule, eri so pa i ma dri ndiri be ngonde kile ari’bole; azini eri ofu ’ba dria ayiko fepi ’ba ma milia ’diyi ra; hema Zioni zini ma alia eri osu aoko ini acile.

⁵Opi si i ari’bole ’bo, eri ki Israelini pi ’bo; eri oki jo ambo ambo ’diyi dria ra, eri ja pari erini okporu ’diyi ma dri ’bo; azini eri fe awu pi ezuzu imvo ngoza be Yuda zi ma alia ’bo.

⁶Eri anzu ’boroko ini okposi ekile moro amvuarile, eri eza pari ini okuzaniri ra; Yehova fe okuta inzizaruri pi ma e’yo avizu sabato be Zionia ra, eri onzo opi amboru pi kuhani be asi veza adra inirisi.

⁷Opi ’be pari ini edeta edezuri ra, eri ngu pari alatararu iniri onzi; eri fe ari’ba ma dria jo amboru erini ’diyi ma abi ’bo; yi o’yona ’yo Yehova vile joa ekile o’du okuta inzizarusirile.

⁸Yehova ’ba i asi Zioni zi ma abi dri azu, eri se baka ’bo; omvini i ma dri dri jaza kuzu ja ku; eri fe pari okporu pi imvo ngozu abi be, yi dri ci candisi okpo kokoru tualu.

⁹Kalitile erini yi fi nyakua ’bo; eri la katala erini ma dri, onyo yi dria ra; opi amboru erini pi ’ba opiru erini ’diyi be yi ovu suru ovupi azita kokoru ’diyi ma eselia; e, nabi erini yi ndreni eceta engapi Yehova vuri ku.

¹⁰’Ba ’wara Zioni zini ’diyi ori va nyakua, yi adri ciri; yi omvu irifura yi ma dria, yi osu koliba; ezoanzi aliriaru Yerusalemuni ’diyi elu yi ma dri va.

¹¹Ma mile asa mindre dri asa asa; ma asi li li; ma asi osu i nyakua dri jata suru mani ma zinirisi, a’disiku anzi nyiri odekua ba ndrupi ’diyi be o’de okpo kokoru aku nderi ma gbokoa,

¹²Yi ’yo yi andri ma tia, Enya pi patiefi ma su be ngoa ya? yini o’deria okpo kokoru ekile ’be ebi berile aku nderi ma gbokoa, yi ma orindini furia, yi andri ma agatia.

¹³Ma nga mi dri a’di ma e’yo eti nze ya? Ma nga mi o’bi a’di be ka ya, Yerusalemu zi la? Ma nga mi ’ba tro tro a’du be ka, mani mi asi omizu ya, Zioni zi aliriaruri la? A’disiku nyoza mini ovu amboru mirile; a’di eco mi atizaru ya?

¹⁴Nabi mini ’diyi ndre mi dri eceta toko azini azazaru; azini yi zini nga e’yo onzi mini ma ti mgboru, ati’ba mini omvizu ani ku, te yi ndre emi dri e’yo eceza toko ’diyi, e’yo emi bile osozu muzu kalaa ’diyi.

¹⁵’Ba dria agapi ’dasi ’diyi sa yi ma dri misi; yi nzi ciri, dri oyaza be Yerusalemu zisi; kini, ’Diri aku amboru ’bani ndra omvele ndrizaru tu agapi ra, ayiko fepi angu wudrikuru dria driri’i ya?

¹⁶Ari’ba mini dria zi yi ma ti walaru mi ruaa ’bo; yi nzi ciri, nya yi ma sikala, kini, Ama ki eri ’bo! adaru o’du ’dori ndra amani asi ’bazu driniari’i; ama isu di eri ’do, ama ndre eri ’bo.

¹⁷Yehova ’ye e’yo ndra erini e’yoni edeleri ’bo, eri fe e’yo ndra erini azile o’du drio ’diyisiri ’ye yi ’bo, eri ogu va ’bo, ’bani yiki ku; azini eri fe ari’boni ayiko ’bazu misi, eri enga ’ba omba ’bapi emi be ’diyi ma o’yu uru.

¹⁸Yi ma asi owu Opi vu fa; abi Zioni ziniri la! Mi fe mindre ma ra mi milia kile yi arale etuzu ini be rra! Mi li ava ku, mi ku mi mileefi iniari ma asi ku!

¹⁹Mi enga, mi otre inisi, yini e’doria angu agei teria! Mi osu mi asi ale ekile yile Opi ma milia! Mi eju mi dri uru eri vu anzi nyiri mini ’diyi ma idri ma e’yosi, o’depi abiri dri gboko dria ma tiasi ’diyi.

²⁰Mi ndre, Yehova la, azini mi lui Mi ’ye ’diri ’dini a’di vu ya? Oku yi nga efi yini osile, anzi nyiri yi ma dria yini avizu yi be ’diyi nya’i ya? Kuhani piyi nabi be nga ovu ofuzaru pari Opini alatararuria ya?

²¹Karilau pi mbazau be ola yi va gbokoa; ezoanzi aliriaru mani ’diyi, o’de sei sia karile mani be; mi ofu yi o’du adra minirisi ’bo, mi ofu ra yiki kokoru.

²²Ekile o’du okuza inzizaruriarile mi omve e’yo uri fepi ma dri ’diyi kalaasi dria; ’ba aluni apapi ra kani acepi o’du adra Yehovanirisini yo; anzi ndra mani ’dule dria mani avizu yi be mani ezole ’diyi, ari’ba mani ja yi dri ra.