Read lugbara Imvo Ongo 3 Bible Online

Imvo Ongo 3 - lugbara bible

Imvo Ongo 3

¹’Ba inzata ndrepi kali eri ma adranirisiri bani ma’i.

²Eri ce ma dri azini eri fe mani acizu angu biza alia te diza alia ku.

³Ndi ndi eri aja i ma dri ma ruaa dika dika o’du dria.

⁴fe ma kalanya pini ecazu enyiriko mani be o’burusoru, eri onyo ma fala ’bo.

⁵Eri ace ma ombasi, eci ma agei kuru ma ndezu afa draza pisi ma suza be.

⁶Eri fe mani ovuzu angu iniria kile ’ba odrapi drio ’diyile.

⁷Eri to kali ma ageia ci, ma econi ani fu ku; eri fe anziriku mani ’diyi ovuzu nzizaru.

⁸E, mani wuria matu ’bazu azakoma a’izu, a eri opi zita mani ma ti amve.

⁹Eri to geri mani ’diyi oni alizasi ci, eri ’ba geri mani ’diyi ovuzu goligoliru.

¹⁰Eri ma dri kile nguru dubaru i lapi ’ba mbapirile, kile kami ovupi angu zizaruriarile.

¹¹Eri oja geri mani ’diyi kalaa ’bo, azini eri oce ma nyiri nyiri, ’bo; eri ku ma pirini;

¹²eri nzo osu ini ’bo, azini eri ’ba ma liru ma cazu ’yesi.

¹³Eri fe ’ye endere inia ’diyi fizu ma asia ’bo.

¹⁴Ma eca ogutaru ’ba mani dri dria, azini yi ma ru ongo o’du dria.

¹⁵Eri fe ma tra tre asi drazasi, eri fe ma atizu enyata okarurisi.

¹⁶Eri onyo ma si oni efisi, eri a’bu ma ofutasi ’bo.

¹⁷Azini mi co ma idri ma esele asi anzuruni be re ’bo, e’yo drilebaru ma tavi avi ma dri ’bo.

¹⁸Te ma ’yo ra, Okpo mani ja dri ’bo, azini e’yo teza mani tele Yehova vuri.

¹⁹Mi ega candi mani pi ma e’yo, ocoko mani pie, enyata okari pie aro ojileri be!

²⁰Orindi mani kiri e’yo ’diyi ega ’dani, eri avu va ma alia.

²¹Ma ega e’yo ’diri dika, e’yo ’disi ma ovu asi teza be ani.

²²E’yo amani dri jazu nga kuri eri asi anzuru Yehovani, te yiki erini deni yi ku.

²³Yiki erini efu o’di o’di o’biti vusi, asi ada mini ovu amboru.

²⁴Yehova ovu esele awale ma driri, orindi mani ’yo ra, e’yo ’disi ma nga ovu asi teza be eri ma alia.

²⁵Yehova ovu onyiru ’ba eri tepi ’diyi dri, orindi eri ndrupiri dri.

²⁶Eri ovu onyiru ’dini, ’ba ma ovu asi teza be, ma te pata Yehovani asi e’yeresi.

²⁷Eri ovu onyiru ’ba dri kulumbu ’duzu de eri ’ba o’diru.

²⁸Eri ma ri a’dule azini ma adri ciri a’disiku eri ’ba afa nderi eri ma dria ’bo.

²⁹Eri ma elu i ma ti irifuraakani asi teza nga indi yani;

³⁰eri ma fe i ma o’bolo ’ba eri sapiri dri, eri ma ga tre edemara ’bani eri edezurisi.

³¹A’disiku Yehova ngani ’ba ’be amve ’dani ’dani ku.

³²Eri ka tro candi fe ti, kiri eri nga asi ndriza fe be yiki erini o’biru ’diyi vusi.

³³Eri ’bani asi ’ba inzazu ’dinini ku, eri ecandini anzi ’bani aka ku indi.

³⁴Opi a’ini e’yo ’yezu ’dini ’diyi ku: ’ba dria aruru wudrikurua ’diyi anzizu pa agelesi,

³⁵e’yo ’bani ovuzu kililiri ojazu kalaa Mungu Uru Turi ma milia,

³⁶e’yo ’bani ’bezu va e’yo liza ma alia.

³⁷A’dini e’yo ’yo, e’yoni cazu parinia, de isu Yehova azini e’yoni kuni ya?

³⁸Mungu Uru Turi ma tilia onzi pi efuni onyi be ku ya?

³⁹Ka’dini ’ba idri beri nga di ono, agu yini panga onzi ’bezu drinia onzi ini ma e’yosiri, a’di e’yosi ya?

⁴⁰Ama ma ndru e’yo, ama ma o’bi geri amani ’diyi, ama ma oja ama Yehova vu dika!

⁴¹Ama ma enga asi amani dri! amani be tualu Mungu ’buari vu:

⁴²Ama eza ra, ama mbu amve ra; mi wuni nga e’yo nderi ku.

⁴³Mi a’bu mi ngulupi adrasi, mi dro ama vuti ra; mi ofu ra, te yiki funi mi ku.

⁴⁴Mi a’bu mi ngulupi iritisi zita amani ma aga trei ku ’beni.

⁴⁵Mi ’ba ama ovuzu ekile ondi ofazale azini okurunyale juru ma eselia.

⁴⁶Ari’ba amani dria ozi yi ma tile walaru ama ruaa ’bo;

⁴⁷Uri pi ’bile be eca ama dria ’bo, ezaza pi dri jata be.

⁴⁸Ma milia yi ara rani dri jata ’ba mani ma zinisi.

⁴⁹Mile mani mindre osu, asini ku, lini ava ku.

⁵⁰Kpere Yehovani eneria va, luria engazu ’bua.

⁵¹Ma mileni candi fe ma asia ezoanzi dria aku amboru mania ’diyi ma e’yosi.

⁵²’Ba ovupi ma ma ari’baru e’yo kokoru ’diyi odro ma okposi ariale;

⁵³yi ja ma dri ’bile gale arujoru ma alia, yi ’be oni ma dria.

⁵⁴Yi ra ma drisi ra ra; ma ’yo ra, Ma ja dri ’bo.

⁵⁵Ma omve mi ru, Yehova la, mani ovuria ’bile gale arujoru ele turi ma alia.

⁵⁶Mi eri ma o’duko ra, mi ase mi bile ava ’yaza mani azini wuta mani erizu kuru ku!

⁵⁷Mi esi inyia o’du mani mi omvezurisi; mi kini, Mi ru ku.

⁵⁸Opi la, mi nze orindi mani ma e’yo eti ’bo, mi onze ma idri ’bo.

⁵⁹Yehova la, mi ndre inzo lile ma driari ’bo; mi li di e’yo mani mi’i.

⁶⁰Mi ndre asi onzi yini dria, e’yo dria yini otule ma ruaa ’diyi be.

⁶¹Mi eri ajidira yini ’bo, Yehova la, e’yo dria yini otule ma ruaa ’diyi be.

⁶²E’yo efupi ’ba engapi ma ruaa ’diyi ma tilia egata yini egale ma ruaa o’du dria ’diyi be.

⁶³Mi lu rita yini vari, engata yini ururi be; ma ovu ongo yini.

⁶⁴Mi nga ofeza yini ofe, Yehova la, dripamvu yini ma azi vusi.

⁶⁵Mi nga asi mbaza fe yi dri; ’di otrita mini yi ma ruaari’i.

⁶⁶Mi nga yi ma vuti dro adrasi, mi nga yi ma dri ja ’bu Yehova vileri ma etiarisi ra.