Read lugbara Ezekieli 1 Bible Online

Ezekieli 1 - lugbara bible

Ezekieli 1

¹Eri nga di eca ’dini eli kali narisi, mba su ma o’du towisi, mani ovuria ’ba ati’baru ’diyi ma eselia yi ara Kebari ma tia, ’bu zi i mgboru, ma nga afa ndreza Munguniri ndre ra.

²Mba o’du towisi, eli towi yini opi Yehoyakinini bizu ati’borurisi,

³e’yo Yehovani eca Ezekieli Buzi mvi vu ada ada, angu ’ba Kalideyaa ’diyini ma alia yi ara Kebari ma tia; Yehova ma dri ovu di eri ma dria ’daa.

⁴Te ma ndre, azini mi lu, akuluku amboru efu angu andraleruasi, eri iriti amboru, acini ga ’dani, dizani di tu ageinia azini alenia indi, ekile mola gupi lelerile aci nde ma alia.

⁵Te eri ma alia wura afa idriru su ’diyini efu ra. E’daza yini ’dini: yi ovu wura be ’bale,

⁶te yi alu alu ovu mileti be su su, yi alu alu ovu opi’e be su su.

⁷Pa yini pa kililiro ’diyi, pa agele yini ekile kojamva ma pa agelele; yi di lele ekile mola ruani i trile tririle.

⁸Yi ovu dri be ’ba ma drile opile yini ma etia, yi ma eje su ’diyia. Afa ’diyi su ovu mileti yini be opile be indi ’dini:

⁹yi ma opile eci yi tualu; yi ojani yi ku yini muria, yi alu alu mu drile kililiru.

¹⁰Te mileti yini ma wura ’dini, yi ovu mijeti be ’ba ma miletile; yi sutro ovu mileti kaminirileri be eje dri ndirialeroria, yi sutro ovu mileti monionirileri be ele dri ejialeruria, yi sutro ovu mileti ajinirileri be indi.

¹¹Mileti yini ’diyi co yi ma esele opile be ndu ndu geri urulerurisi; yi alu alu ma opile eci yi iri iri, opile iri azinisi yi a’bu yi ma rua.

¹²Yi alu alu mu drile kililiru; geri orindini lezu muzuria yi mu ra, yi ojani yi yini muria ko,

¹³Te afa idriru ’diyi ma wura ’dini: wura yini ovu ekile ele dipi acisirile, ekile talale; aci nde tu uru azini si va afa idriru ’diyi ma eselia; aci di okposi tu, ovi ga le, efuzu aci nde ma aliasi ra.

¹⁴Afa idriru ’diyi nzu ’dale, emvi ’dole, ekile ovini galerile.

¹⁵Te mani afa idriru ’diyi niria, mi ndre, gari pa ombero so pa nyaku ma dria afa idriru ’diyi ma ageia, pa omberu alu mileti yini vusi alu alu.

¹⁶Pa omberu ’diyi ma e’daza, azi yini be, ovu wura be ekile oni berulele; yi sutro ovu wura be alu; e’daza yini azi yini be e’da i ekile pa omberu alu eci i pa omberu aziniri ma ruaaleru,

¹⁷Yini muria yi mu eje yini su ’diyi ma dria, yi ojani yi ku yini muria.

¹⁸Yi ma afa trale omberu ’diyi ovu izuru uriuriri afa ’diyi su ma afa trale omberu ’diyi ga tre mile be ageiniasi kuru kuru.

¹⁹Afa idriru ’diyi ka mu ra, pa omberu ’diyi mu yi ma ejelea indi; azini afa idriru ’diyi ka ovu ’duzaru uru nyaku ma dria, pa omberu ’diyi ovu ’duzaru uru alu indi.

²⁰Pari dria orindini lezu muzuria, yi mu ra; azini orindini lele mule ’dalerisi, pa omberu ’diyi ovu ’duzaru uru indi yi ma ejelea; a’disiku afa idriru ma orindini ovule pa omberu ’diyi ma aliarisi.

²¹Afa ’dayi ka mu ra, afa ’diyi mu indi; ’dayi ka pa so ra, ’diyi so pa indi; afa ’dayi ka ovu ’duzaru uru nyakuarisi, pa omberu ’diyi ovu ’duzaru yi ma ejelea indi; afa idriru ma orindini ovule pa ’diyi ma aliarisi.

²²Afa idriru ’diyi ma dria uru, angu e’da i ekile angu ovupi ’bua tokorurile, wurani ekile yi i ojapi siro uriurirurile; angu nde aja i yi ma dria uru.

²³Angu ’bua nde ’diri ma etia, yi ma opile ovu kililiru, ti ofezu opile aziniri be aziniri be; yi alu alu a’bu yi ma rua opile irisi eje ’disi, yi alu alu a’bu yi rua opile irisi eje ’dasi indi.

²⁴Yini muria, ma reri opile yini ma o’duko ekile yi ’amboru ma o’dukole, ekile Mungu Okpoe’ini ma o’dukole, o’duko otre zaniri ekile o’duko asikari o’biru ’diyinirile; yini pa soria, yi fe yi ma opileni asuzu va.

²⁵O’duko indi ’bu tokoru ovupi yi ma dria ururi ma drilia uru; yini pa soria yi fe opileni asuzu va.

²⁶Azini ’bu tokoru ovupi yi ma dria ururi ma drilia uru, wura ogutani indi, ekile oni safiraru ma wurale; te wura oguna ndeniri ma dria, wura ’ba ada ma e’dazaleri indi, ripi drinia ururi.

²⁷Te ma ndre ekile wura mola dizarurile, ekile wura acini ovupi eri ma alia dipi ageiniarile, engazu pani ma opile ma wurasi drinia uru; azini engazu pani ma opile ma wurasi esizu eje, ma ndre ekile e’daza acinirile, azini diza di eri ma ageia kuru.

²⁸Ekile gari ovupi iriti ma eselia o’du ozooni ’dizurisirile, diza dipi ageiniari e’da ’dini. Wura diza Yehovaniri e’da i ’dini. Te ma ka ndre ra, ma eco ma va o’bukuru, te ma eri o’duko ’ba e’yo ’yopirini.