Read lugbara Ezekieli 10 Bible Online

Ezekieli 10 - lugbara bible

Ezekieli 10

¹Etu ’dasi ma lu ra, azini mi ndre, angu azini tokoru kerubi ma driari ma alia, afa azini e’da i yi ma drilia oni safirarule, ekile wura ogunani ma e’dazale.

²Te eri ’yo; agu bongo mile be nyiriari supiri ma tia kini, Mi fi pa omberu yi ojapi oja ’diyi ma eseliasi, adaru kerubi ma etia, azini mi fe mi dri ogoro ma ga tre aciolu ovupi kerubi ma eseliarisi, mi ma oyi yi aku amboru ma dria i Mani ndreria, eri fi ra.

³Agu ndeni firia, isu de kerubi yi oso pa jo una kala dri ndiria; azini iriti ga irii alialeruria tre.

⁴Diza Yehovani nga di nga kerubi ma ruaarisi, nga pa so pari ’bani fizu jotileari ma drilia; jo nde nga ga tre iritisi, azini irii ga tre angu mveza Yehova ma dizanirisi.

⁵Yi eri awu kerubi ma opileniri kpere irii amveleruri vu, ekile Mungu Okpoe’ini ma o’duko erini e’yo ’yoriarile.

⁶Te eri nga ecea ’dini, eri ka e’yo azi agu bongo mile be nyiriari supiri ma tia kini, Mi ’du aci pa omberu yi ojapi ’diyi ma eseliarisi, ’dini eri nga di fi ra, mu pa so pa omberu aluri ma kalaa ogogo.

⁷Kerubi aluri nga di i dri eju engazu kerubi ma eseliasi, nga i dri su ad ovupi kerubi ma eseliari ma alia, nga aci e’du efe agu bongo mile be nyiriari supiri ma dria; agu nde a’i eri ra, fu ra.

⁸Wura dri ’banileri e’da i kerubi ma ruaa opile yini ma etia.

⁹Te ma lu ra, azini mi ndre, pa omberu su e’da yi kerubi ’diyi ma ageia, pa alu kerubi aluri ma kalaa, pa azini kerubi aziniri ma kalaa; e’daza pa nde ’diyini ovu ekile oni beruleru ma wurale.

¹⁰Te e’daza yini ma e’yo ’dini, yi su tro ovu wura be alu, ekile pa omberu alu i e’dapi pa omberu aziniri ma ruaarile.

¹¹Yi ka mu ra, yi mu kala yini su ’diyia, yi ojani yi yini muria ku, te pari dria driniri luzu vuniaria, yi nga eri ma vuti bi; yi ojani yi yini muria ku.

¹²Rua yini dria, nguku yini pie, dri yini pie, opile yini pie, pa omberu yini ’diyi pie dria ga tre mile ’be ageinia, adani pa omberu kerubi su ’diyini ovuzu yi be ’diyi.

¹³Te pa omberu ’diyi ma e’yo ’dini, mani eriria ’da yi ma ru pa omberu yi ojapi oja’diyi.

¹⁴Yi alu alu ovu andreti be su: andreti okori kerubi ma andretini, andreti iriri ’ba ma andretini, andreti nari kami ma andretini, andreti suri aji ma andretini.

¹⁵Kerubi ’diyi yi tu ’bua tu tu. Afa idriru mani ndrele yi ara Kebari ma tiari eri ’di’i.

¹⁶Kerubi ’diyi ka e’do mu ra, pa omberu ’diyi vini mu alu indi yi ma ageia; kerubi ’diyi ka le yi ma opile enga lezu tuzu uru nyakuarisi, pa omberu ’diyi ojani yi ku, ovu yi ma ejelea ’dani.

¹⁷Yi ka pa so ra, afa ’diyi nga vini pa so alu indi, yi ka tu uru, afa ’diyi nga tu alu yi be indi tualu; a’disiku afa idriru ’diyi ma orindi ovu yi ma alia ci.

¹⁸Te diza Yehovaniri fu engazu pari ’bani fizu jotileari ma driliasi, mu pa so kerubi ma drilia.

¹⁹Kerubi enga yi ma opile, tu uru nyaku driasi, yini furia ma ndre ra, pa omberu ’diyi ovu yi ma ejelea indi; yi mu pa so jo Yehovani ma kalitile etuni efuzurialeruri ma tilia ogogo; te diza Mungu Israelinirini ovu yi ma drilia uru.

²⁰Afa idriru mani ndrele Mungu Israelini ma etia yi ara Kebari ma tiari eri ’di’i; te ma ni ra yi kerubi ’diyi.

²¹Yi alu alu ovu andreti be su su, yi alu alu ma opile su su, wura dri ’banileri ovu opile yini ma etia.

²²Te yi ma andreti ma e’daza ’dini: yi andreti ndra mani ndrele yi ara Kebari ma tia ’diyi, e’daza yini pi yi; ma ngulupi ma rua be tro tro. Yi alu alu yi mu drile kililiru.