Read lugbara Ezekieli 12 Bible Online

Ezekieli 12 - lugbara bible

Ezekieli 12

¹E’yo Yehovani eca vini ma vu dika, kini:

²Mvi ’bani, mi ovu suru lepi mbupi ma ruaarisi amveri ma eselia. ’Ba nde ma mile afa ndrezu ’diyi indi, te yi ndreni ku, yi ma bile e’yo erizu ’diyi indi, te yi erini ku; yini ovule suru lepi mbupi amveri’irisi.

³E’yo ’disi, Mvi ’bani la, mi ombe mi teri ’ba mupi angu andinia ’diyinirile, mi ma ombe afa ombeza nde etusi yi ma milia ayii; mi nga afa mini oli engazu pari miniarisi muzu yi be pari azinia yi ma milia ayii; kani yi nga e’yoni ega ra yani, ka tro yi suru lepi mbupi amveri’i ti.

⁴Mi nga afa mini ofu joarisi amve yi ma milia etusi, ekile afa ’bani ngale jile angu azinia ’diyile; te mi ngulupini nga fu yi ma milia ondresi, ekile ’ba mupi ati’baru angu aziniarile.

⁵Mi ma alu jo ma abi yi ma milia, mi ofu afa nde amve geri ’dasi.

⁶Mi nga afa nde o’du mi ombetia yi ma milia, mi nga eri ofu amve inisi; mi ma a’bu mi andreti ci, mi kazu nyaku ndrezu ku; a’disiku ma ’ba mi ecetaru suru Israelini dri ’bo.

⁷Ma nga di ’ye erini azile ma tiarile. Ma ofu afa mani joarisi etusi ekile afa ’bani ngale jile angu aziniarile, ondresi ma lu jo abi ma ngulupi ma drisi; ma ofu afa nde inisi, ma ’du eri ma ombetia yi ma milia.

⁸E’yo Yehovani nga di eca ma vu i o’bitisi kini:

⁹Mvi ’bani, suru Israelini, suru nde lepi mbupi amveri ’yoni te mi tia, Mi a’di ’ye ya, ’dinini ku ya?

¹⁰Mi ’yo yi tia kini, Opi Yehova ’yo ’dini: E’yo eceza ’diri ece opi Yerusalemuari pi ma e’yo suru Israelini ovupi yi ma eseliari be dria.

¹¹Mi ma ’yo, Ma leceta eminiru ma’i: yi nga fe yi ma ’ye mani ’yele ’borile; yi nga mu ati’baru angu azinia ra.

¹²Opi yi ma eseliari nga afa ’du i ma ombetia inisi, eri nga fu ra; yi nga jo abi lu, afa e’duzu ani geri ’dasi; ’dini eri nga mile ini a’bu ci, erini ngale angu ndrele i milesi kurisi.

¹³Ma nga vini emba mani ’be eri mbazu, eri nga e’de awi mani ma alia ra; ma nga eri ji Babulonia kpere angu ’ba Kalideyaa ’diyiniria, te eri ngani angu nde ndre ku, ka tro mu dra ’dasi ti.

¹⁴Te ma nga ’ba ovupi eri ageia eri aza kopi ’diyi pi ere oli dria vu ’ba ongulumuru erini ’diyi be; ma nga vini sei enze yi ma vuti drozu.

¹⁵Yi nga ni ma Yehova’i, ma ka nga yi awa suru ma eselia, ma ka nga yi ere angu ndu ndu ma eselia ’boria.

¹⁶Te ma nga ’ba ku yi dri were, sei pini kule liki be, azo ’ muani pie ’diyi, yi ma olu afa ngule onzi yini ’yele ’diyi ma e’yo dria, suru yini ecazu yi vu ’diyi ma eselia ’dale; te yi nga ni ma Yehova’i.

¹⁷E’yo Yehovani eca ma vu dika kini:

¹⁸Mvi ’bani, mi nya nyaka rua yaza be, mi ma mvu yi mvuza mini rua yazasi, asi otiza be;

¹⁹azini mi ’yo ’ba nde angu ndea ’diyi ma tia ’dini, Opi Yehova ’yo ’ba ovupi Yerusalemua ’diyi ma e’yosi angu Israelini be ’dini; Yi nga enya yini nya asi otizasi, yi nga yi mvuza mvu osuta be, angu nde ma ovu di andruru afani ovuzu alenia yoriru, ’ba dria ovupi angu nde ma alia ’diyini ’yele eganasirisi.

²⁰Aku ’ba be tre ’diyi nga ovu ezazaru, anguni nga ovu andruru; emi nga di ni ani ma Yehova’i.

²¹E’yo Yehovani eca ma vu kini:

²²Mvi ’bani, e’yo o’beza emini ’yole angu Israelini ma aliari kini, Ere o’duni izuru, afa ndreza ece dria ra-eri e’yo o’beza ngonini ya?

²³E’yo ’disi mi olu yi tia kini, Opi Yehova ’yo ’dini: Ma nga fe e’yo o’beza ’diri ma de ira, yi ngani asi e’yo o’beza ’diri o’yo Israeli ma alia dika ku. Te mi ’yo yi tia, O’duniri ogogo, azini afa ndreza driani i ’yezu i paria ’yekeri.

²⁴A’disiku afa! ndreza tokoruri nga ovu dika yo, kani e’yo ondriza lokiriru ayiko, fezuri ngani ovu suru Israelini ma eselia ku.

²⁵Te ma’i ma Yehova’i, ma nga ’yo ra azini e’yo mani ’yoleri nga ovu ’yezaru ra. Eri ngani ece ’yekokoru dika ku, a’disiku ewu eminisi, emi ’ba suru lepi mbupi amve ’diyi la, ma nga e’yo ’yo ra azini ma nga e’yo nderi ’ye indi, Opi Yehova ’yo ra.

²⁶E’yo Yehovani eca ma vu dika, kini:

²⁷Mvi ’bani, mi ndre, ’ba suru Israelinia ’diyi ’yo ra, Afa ndreza erini ndrele ’diri, o’duni izuru tu, eri e’yo ondri ewu nga vile ziri ’dalerini.

²⁸E’yo ’disi mi ’yo yi tia, Opi Yehova ’yo ’dini: E’yo mani ’yoleri ma azi ngani ece ’yekokoru dika aluni ku, te e’yo mani ngale ’yoleri nga ovu ’yezaru ra, Opi Yehova ’yo ra.