Read lugbara Ezekieli 14 Bible Online

Ezekieli 14 - lugbara bible

Ezekieli 14

¹Etu ’dasi ’ba ’wara Israelini ma azi ’diyi emu ma vu, yi ri va ma drilia.

²E’yo Yehovani nga di eca ma vu, kini,

³Mvi ’bani, ’ba ’diyi ofi wura yini inzile inzi ’diyi yi ma asia, yi ’ba e’yo onzi yini yi ma milia kumuru ’bo; ma ma a’i yini e’yo azini zizu ma tia ra ya?

⁴E’yo ’disi mi olu e’yo yi ma tia, mi ma ’yo yi tia kini, Opi Yehova ’yo ’dini: ’Ba dria alu alu suru Israelini ma alia, wura erini inzile ’diyi ofipi i ma asia, e’yo onzi ini ’bapi kumuru i ma milia, emupi nabi vuri; ma Yehova, ma nga e’yo omvi agu ’dinile ’diri ma tia ma’i, wura karakarau erini inzile ’diyi vusi;

⁵ma ma bi suru Israelini yi ma ngulupi ma asi ma alia, yi driani yi esele cole ma be ziri wura yini inzile ’diyisirisi.

⁶E’yo ’disi mi ’yo suru Israe1ini ma tia, Opi Yehova ’yo ’dini: Emi emvi, emi oja emi wura emini inzile ’diyi kuzu fo! Emi oja emi mile afa ngule onzi emini ’yele ’diyi kuzu.

⁷A’disiku ’ba dria alu alu suru Israelini, kani ani’bo ovupi angu Israeliniari alu alu, ka i ma esele co ma be re, ka wura inzile ’diyi ofi i asia, ka e’yo onzi ini ’ba i milia kumuru, ka emu nabi vu e’yo azini zizu ma vu i dri, ma Yehova, ma ngulupini nga e’yo omvi eri tia ma’i;

⁸ma nga ma mile ’ba agu nde ma ruaa ombasi, ma nga eri ’ba ovuzu ’te’yo osutaru, azini ecetaru, azini e’yo o’bezale, ma nga eri dri ja ’ba mani ma eseliarisi ra; te emi nga ni ma Yehova’i.

⁹Te nabi ka ovu icizaru, ka e’yo olu, ma’i Yehova ma ici nabi nderi ma’i, ma nga ma dri eju eri ma ruaa, ma nga eri dri ja ’ba mani Israelini ma eseliarisi ra.

¹⁰Te yi nga e’yo onzi yini ma panga ’du yi’i e’yo onzi nabiniri ma panga nga ovu tro tro ’ba emupi e’yo zipi tiniri ma e’yo onzi ma pangale-

¹¹suru Israelini ma ku ma dika ku, yi ma ’ba yi alatara kokoru ezata yinisi dika ku beni, te yi ma o’lu ’ba mani, azini ma ma ovu Mungu yini, Opi Yehova ’yo ra.

¹²E’yo Yehovani nga eca ma vu kini:

¹³Mvi ’bani, angu ka e’yo eza ma vu yini e’yo onzi ’yelerisi, ma ka ma dri eju eri ruaa, ma ka kali erini enyaniri nyo, ma ka liki ma ti pe eri vu, ma ka ’ba piyi ma dri ja aleniarisi anyapa be ra,

¹⁴’ba’diyi na tro, Noa pi, Danieli pi, Yobu pie, ka ovu eri ma alia ti, yi nga kiri yi ma ngulupi ma orindi pa onyi yinisi a’dule, Opi Yehova ’yo ra.

¹⁵Ma! ka nguru oleoru onzikanyaru ’diyi fe agazu angu nde ma alesi, yi ka eri eza ra, ’dini eri ofu andruru ’bani agazu alenia nguru nde ’diyi dri ku ani;

¹⁶’ba ’diyi natro ka ovu alenia ti, mani ovule idri berile, Opi Yehova ’yo ra, yi ngani anzipi piyi opa ezopi be ku; yi’i yi nga yi pa a’dule, te anguni nga ovu andruru.

¹⁷Kani ma ka nga sei eju angu nde ma alia dria, ma ka ’yo ra, Sei la! mi mu angu ma eselesi fo! mani ani ’ba piyi ma dri jazu alenia anyapa be;

¹⁸’ba ’diyi natro ka ovu eri ma alia ti, mani ovule idri berile, Opi Yehova ’yo ra, yi ngani anzipi piyi opa ezopi be ku, te yi’i a’dule nga ovu pazaruni.

¹⁹Kani ma ka azo muani ma ti pe angu nde ma alia, aoko mani osuzu yi ma dria ari alia, ’ba piyi ma dri jazu alenia anyapa be;

²⁰ka tro Noa pi, Da lieli pie, Yobu pie ovu alenia ti, mani ovule idri berile, Opi Yehova ’yo ra, yi ngani agupimva pi opa zamva be ku; te yi nga kiri yi ma ngulupi ma orindi pa onyi yinisi a’dule.

²¹A’disiku Opi Yehova ’yo ’dini: Ma ka e’yo liza mani okporu su ’diyi! ma ti pe Yerusalemu ma dria, sei pi, liki pie, nguru oleoru onzikanyaru ’diyi pie, azo muani pie, ’ba piyi ma dri jazu anyapa be, yi nga ’ba opa ngoni ngoni ya?

²²Te ti, emi ne, yi nga ’ba azini ku jolokoru eri ma alia, agianzi piyi ezoanzi be, yini ngale ofule amve ’diyi; emi ndre, yi nga efu emi vu, emi nga yi ma geri ndre ’yeta yini be ra; emi nga di emi asi omi e’yo onzi mani ejile Yerusalemu ma dria ’bori ma e’yosi, adani e’yo dria mani ejile eri ma dria ’diyisi.

²³Te yi nga emi asi omi, emi ka nga yi ma geri pi ndre ’yeta yini be ra; te emi nga ni ani ma ’yeni e’yo dria mani ’yele eri ma aliari efi kokoru ku, Opi Yehova ’yoni.