Read lugbara Ezekieli 2 Bible Online

Ezekieli 2 - lugbara bible

Ezekieli 2

¹Eri nga di ’yo ma tia kini, Mvi ’bani, mi so pa urulesi, ma nga e’yo ’yo mi be.

²Orindi nga fi ma alia erini e’yo ’yoria ma be, eri nga fe mani pa sozu urulesi ani; te ma eri ’ba e’yo ’yopi ma beri ma o’duko.

³Te eri ’yo ma tia, Mvi ’bani, ma pe mi ti anzi Israelini vu, suru e’yo eripi ku mbopi ma ruaarisi amve ’bo ’diyi vu; yi’i yi ma atapi be eza azita mani ra ecazu kpere o’du andru dorisi.

⁴Anzi nde yi edemararu asi mbaza be indi; ma pe mi ti yi vu ’di, te mi nga ’yo yi tia, Opi Yehova ’yo ’dini.

⁵Te yi’i, yi ka eri ra, kani yi ka eri ku ti (yini ovule suru lepi mbupi ma ruaasi amve ’diyi’irisi), te kiri yi nga ni ra kini, nabi enga yi ma eselia ’bo.

⁶Te mi’i, mvi ’bani, mi ru yi ku, mi ma ovu eli urisi e’yo yini ’yolerisi ku, ka tro la pi pati ociru pie ovu mi vu ti, ka tro mi adri otunukua ma eselia ti; mi ma ovu urisi e’yo yini ’yolerisi aluni ku, mi ru mile yini mi nepi okposiri ku, yi ka tro ovu suru lepi mbupi ma ruaasi amveri ti.

⁷Mi nga e’yo maniri ’yo yi tia, yi ka tro eri ra, yi ka tro ga si ti; yini lele mbule ma ruaasi amve turisi.

⁸Te mi’i, mvi ’bani, mi eri e’yo mani ’yole mi tiari; mi ma mbu ma ruaarisi amve suru nde mbupi amve ’darile ku; mi zi mi tile, mi nya afa mani fele mi driri.

⁹Te ma ka ndre ra, mi ndre, dri eju i ma vu; te mi ne, dri nde ma alia buku trazani;

¹⁰eri nga eri aja ma drilia; si e’yo alenialeru azini amveleru indi; alenia ’daa si e’yo lulu gaza pini awu pie, candi pieri’i.