Read lugbara Ezekieli 21 Bible Online

Ezekieli 21 - lugbara bible

Ezekieli 21

¹E’yo Yehovani nga eca ma vu kini:

²Mvi ’bani, mi ’ba mi mile Yerusalemu vu, mi fe e’yo mini ma ti pari alatararu ’diyi vu ti ti, mi ondri e’yo angu Israelini ma dria,

³mi ’yo angu Israelini ma tia, Yehova ’yo ’dini: Mindre, ma aru mi dri ’bo, ma nga sei mani enze enyi eriniarisi, ma nga ’ba kililiru ’diyi pi ofu ’ba onzi ’divi be mi ma aliasi.

⁴Ka’dini mani ngaria ’ba kililiru ’diyi pi ofuria mi ma aliasi ’ba onzi ’diyi be, e’yo ’disi sei mani nga efu enyi eriniasi, ’ba rua ari be ’diyi dria ’Ima ruaa, engazu angu, uruleruriasi ecazu angu andraleruri vu;

⁵’ba rua ari be ’diyi dria nga ni ani kini ma Yehova, ma nze sei mani enyi eriniasi ma’i; eri ngani mvi dika ku.

⁶Mi ota e’yo ’disi, mvi ’bani la; mi nga ota yi ma milia asi nyoza pisi asi draza be.

⁷Te eri nga eca ’dini, yi ka ’yo mi tia, Mi a’u a’disi ya? mi nga e’yo omvi ’dini, E’yo kuza ma e’yosi, e’yo ndeni emulerisi; azini ’ba dria ma asini nga aka ra, ’ba dria ma drini nga ca corokolo, ’ba dria ma i orindini nga aka aka, kumuti driani nga ovu okpo kokoru yile. Emi ndre, eri emu ra, eri nga i ’ye ra, Opi Yehova ’yo ra.

⁸E’yo Yehovani eca ma vu ’yozu kini:

⁹Mvi ’bani, mi olu e’yo, mi ma ’yo kini, Yehova ’yo ’dini. Mi ’yo: Eri seini, eri seini, ji eri ma si ’bo, tri eri ma rua dizaru indi;

¹⁰ji eri ma si eri ma fu ’ba ani, tri eri ma rua dizaru eri ma ovu ekile ovile ani! Ama nga oguta ogu ayikosi ya? Sei nde onzo mva mani ma kali ra, pati be dria.

¹¹Yi tri ruani dizaru, eri ma ovu ’ba ma dria ani; ji sei nderi ma si ada, tri eri ma rua dizaru ra, ma ovu fezaru ’ba ’ba fupiri ma dria ani.

¹²Mi ’be cere, mi wu okposi, mi mvi ’bani la, a’disiku eri ovu suru mani ma dria, eri ovu ’ba mani Israe-lini opiru ’diyi ma dria dria; fe yi sei sia suru mani pie dria. Mi sa mi elidri ani.

¹³Te o’bizani nga ovu ngoni ngoni ya, sei ka nga kali onzo raria? Eri ngani ovu dika ku, Opile Yehova ’yo ra.

¹⁴E’yo ’disi mi ondri e’yo, mi mvi ’bani; mi sa mi dri, mi fe yi ma o’ba sei pale iri azini pale na, eri sei ’ba yini fule kairini; eri ’ba amboru yini ofule kai kai ’diyi ma sei, fipi kpere yi ma jo aliza alialeruri ma aliari.

¹⁵Ma ’ba sei nde ma sidrile omba ’bazu kalitile yinia dria, yi ma asi ma ca yiru, yi ma aba drile drile beni. Eyawaye, yi ede eri ovile, ji sidrileni cizaru ’ba fuzu.

¹⁶Emi oku emi tualu, emi mu dri ndia, emi otu emi ombasi, emi mu dri ejia, emi mu pari dria emi ma mileni angu luzuria.

¹⁷Ma’i indi ma nga ma dri sa, ma nga fe aoko mani ma tra ra; ma Yehova, ma ’yo e’yo ’diri ma’i.

¹⁸E’yo Yehovani eca ma vu dika, kini:

¹⁹Azini indi mi ma azi geri iri, mi mvi ’bani la, sei opi Babuloniariniri ma emu ani; geri ’diyi iri ma efu angu alu ma alia. Mi ece pari, mi ece eri geri mupi aku amboruarini e’dozuria.

²⁰Mi nga geri azi seini emuzu Raba Amoni anziyi vileria, azini Yudaa Yerusalemu yini ageini tele ombasiria.

²¹A’disiku opi Babuloniari so pa pari geri aritiaria, eril so pa pari geri iri ’diyini e’dozuria acife ndrizu; eri oya ’ye nde ndu ndu, eri zi e’yo wura tokori vu, eri lu anyapa ma ogu ma alia.

²²Eri ma dri ndiria acife ndriza Yerusalemuniri, yi ma enga pati amboru abini gbapi ’diyi, ti akuzu walaru ’ba fuzu, yi ma o’duko engazu otretasi, pati amboru engazu kalitile gbazu, nyaku trozu amuru, jo okporu ’diyi sizu dria.

²³Te e’yo nde nga ovu yi ma milia acife ndriza inzorurile, ’ba nde oyo sopi yi be ’diyi; te eri fe e’yo onzi ma ovu egazaru, ma obi yi ani.

²⁴E’yo ’disi opi Yehova ’yo ’dini: Emini fele e’yo onzi emini ma ovu egazaru, yini ezata emini isuzu ani, e’yo onzi eminini e’dale ’yeta emini ma alia driarisi; vini ani e’yo emini egalerisi, yi nga emi obi drisi ani.

²⁵Te mi’i, opi onzi Israelini, ebi drani isupi ’bori la, o’du mini eca ’bo, ewu e’yo onzi ngapi ecapi vilerinisi;

²⁶Opi Yehova ’yo ’dini: Mi tru bongo ombele mi driari ra, mi nze oku mi driarisi ra; afa ’diri ngani ovu okorile ’dani ku; mi ’ba afa ovupi vari uru, mi ’ba afa ovupi ururi va.

²⁷Ma nga eri ogu, ma nga eri ogu, ma nga eri ogu; afa ’diri ngani ovu dika ku indi, de nga e’ini adari ecani ku; te ma nga eri fe eri dri. E’yo lizu ’ba Amonini ma dria

²⁸Te mi’i, mvi ’bani, mi ondri e’yo, mi ’yo, Opi Yehova ’yo ’dini anzi Amonini ma e’yosi, o’data yini ma e’yosi indi; mi ’yo, Eri seini, nze sei enyirikoarisi ’bo, tri eri ma ma dizaru ’ba fuzu, eri ma ja ’ba dri ani, eri ma ovu ovile indi-

²⁹de yini e’yo toko toko ’diyi ndreria mi dri, de yini e’yo inzoru ondriria acifesi mi dri-sei nde ma ovu ’ba onzi ebi drani isupi ’bo ’diyi ma ombelea; ’ba nde ma o’du eca ’bo, ewu e’yo onzi ecapi vileriarisi,

³⁰Mi omvi eri enyiriko erini ma alia. Ma nga e’yo mini li pari ndra yini mi ’bazuria, adani angu mini osizuria ’daa.

³¹Ma nga aoko mani osu mi dria; ma nga ava vu mi dria adra mani acirurisi; te ma nga mi fe ’ba asi be ngurule, onduaru ’ba dri jazu ’diyi ma dria.

³²Mi nga ovu aci ma ejaru; ari mini nga ra angu nde ma alia; mi tavini nga avi teketeke ra a’disiku ma Yehova, ma ’yo e’yo ’diri ma’i.