Read lugbara Ezekieli 23 Bible Online

Ezekieli 23 - lugbara bible

Ezekieli 23

²Mvi ’bani, oku iri indi, yi ayia alu ma ezopi;

³te yi ali Misiria; yini ovuria nga ezoanziru yi o’ba ali ra; amvu yi ma ba agatia ’diyi ’dale ra, fe bati amurua yinirini dro dro ’dale.

⁴Yi ma ru ’dini, angiriri Ohola’i, amvipini Oholiba’i. Te yi ofu maniru, yi ti agianzi piyi ezoanzi be. Te ru yini ma e’yo ’dini, Samaria eri Ohola’i, azini Yerusalemu eri Oholiba’i.

⁵Ohola efu acizu oku balibaliru de eri mani; eri fe i asi agupi eri lepi ’diyi lezu, yi ’ba Asuriaa, ’ba eri ma ageia ogogo ’diyi.

⁶’Ba nde ’ ’diyi su bongo bluru, yi opiru azini ’ba ’ba dri cepi ’diyiru, yi dria alu alu yi karile ’bani lele tu, nzupi akanya ma dria ’diyi.

⁷Te eri fe i toko ali o’bazu ’ba ’diyi be, yi dria alu alu ’ba opeza Asuriaa ’diyi; te eri ka i fe ali o’bazu ’ba dria yi ma avani eri vale ’diyi be, eri eza i wura toko dria yini inzile ’diyi be indi.

⁸Eri kuni vini ali o’baza ma ti engazu o’du ndra erini ovuzu Misiriarisi ku; a’disiku yi la ndra eri be de eri zamvaru, yi fe bati amurua erinirini dro dro ’dale, yi osu ali o’baza yini eri ma dria.

⁹E’yo ’disi ma fe eri ’ba eri lepi ’diyi ma dria, ada ma fe eri ’ba Asuriaa yi ma avani eri vale ’diyi ma dria.

¹⁰’Ba ’diyi otru rua erini pililiru, yi obi agianzi erini ’diyi pi ezoanzi erini ’diyi be; te eri ma ngulupi yi fu seisi; eri ofu di ovuzu ajidimararu okuyi ma eselia, yini e’yo liza ’yele eri ma ruaarisi.

¹¹Amvipi erini Oholiba ndre e’yo ’diri ra, te eri eza i aga i amvini ra; ava ali o’bazani eri valerisi, ali o’baza erini indi aga ali o’baza amviniri ra.

¹²Eri fe i asi dria ’ba Asuriaa ’diyi lezu, yi dria ’ba opiru, ’ba ’ba dri cepi ’diyiru, yi ’ba eri ageia ogogo, bongo supi onyiru tu, nzupi akanya dria ’diyi, yi karile ’bani lele tu’diyi.

¹³Te ma ndre eri eza i ’bo; yi iritro bi geri aluri’i.

¹⁴Te eri fe ali o’baza erinini ezuzu dika dika; a’disiku eri ndre ’ba ma wura sile abi ruaa, ada ’ba Kalideyaa ’diyi ma wura sile nyaku eka kabilorurisi ’diyi;

¹⁵yi a’di yi ma opile enyirikosi, osu bongo wura be ndu ndu ’diyi yi ma dria, yi dria e’da yil opiru ekile ’ba Babulonia angu yini osizu Kalideyaria ’diyi ma wurale.

¹⁶Te eri ka yi ndre ra, coti eri nga yi le avasi mbele mbele, nga ojio ti pe yi vu kpere Kalideyaa.

¹⁷’Ba Babulonia ’diyi nga di emu eri vu lazu eri be gbolo dria letasi; yi eza eri ali o’baza yinisi, eri ofu ani alatara kokoru e’yo yinisi, yi nga di ani eri ma orindi di ra.

¹⁸’Dini eri fe di ali o’baza erini ma e’da ra, fe rua erini pililirurini e’dazu indi; ’dini eri nga ma orindi di ra, ekile ndra eri amvini ma orindi dilerile.

¹⁹Te ti, eri fe ali o’baza erini ezu I kakau, erini o’du erini ndra ovuzu zamvaruri ma e’yo egaria, erini ndra ovuzu oku ali o’bapiriru angu Misiriari.

²⁰Eri ovu di ayikosi ’ba eri lepi ’diyisi, yi ma ruani ovuzu akanya were ma ruaa, yi ma orini ovuzu akanya ma orile ’diyi.

²¹’Dini mi ega e’yo saaru mini ’yele o’du mini ovuzu nga zamvarurisi, ’ba Misiria ’diyi yini mi bati zamvaniri amvuzurisi’diyi.

²²E’yo ’disi, Oholiba la, Opi Yehova ’yo ’dini: Mi ndre, ma nga ’ba mi lepi ’diyi fe engazu mi dri aruzu, yi ’ba mi orindi dipi ’bo ’diyi, ma nga yi eji mi ruaa kalasi dria:

²³’ba Babulonia ’diyi pi ’ba Kalideyaa ’diyi be,Pekodi pi, Soa pie,Koa pie, tualu ’ba Asuriaa ’diyi pie dria; yi karile ’bani lele tu ’diyiru, yi dria ’ba opiru, ’ba dri cepi ’diyiru, yi dria opianziru ’ba ru kuza be, nzupi I akanyasi ’diyi.

²⁴Yi nga emu a’di ’dizu mi be afa ombani piyisi, gari ombani pie, gari akanyani sele ’diyi pie, ’ba okule o’biru ’diyi pie; yi nga yi oti omba ’bazu mi be, gombere were piyisi, gombere pie, mbiri pie, mi ageia kuru; ma nga e’yo liza ku yi dri, yi nga e’yo mini li e’yo liza yini vusi.

²⁵Ma nga ovu mi ruaa a’yasi, yi nga mi ’ye asi veza adrarurisi. Yi nga mi omvu pi li va bi mini be, yi nga ’ba mini acepi jolokoru ’diyi oli seisi. Yi nga agianzi mini obi ati’baru ezoanzi mini be, yi nga mi ma joloko acepiri ve acisi ra.

²⁶Yi nga vini bongo otru mi ruaarisi ra, nga oni mini onyiafaru aje nyapi amboru ’diyi opa ra.

²⁷’Dini ma nga fe mi ma ku di e’yo saaru miniri pi ja, ali ’baza mini ejile angu Misiriniasiri be; ’dini mi ngani mi mile enga yi luzu dika ku, mi ngani vini e’yo Misirini ega dika ku indi.

²⁸Te Opi Yehova ’yo ’dini: Mi ndre, ma nga mi fe ’ba mini ngule, ’ba mi orindini ovuzu yi be ari’baru ’diyi ma dria.

²⁹Yi nga mi ’ye ngutasi, yi nga azi mini opa dria, nga mi ku pirini, rua be pililiru; rua pililiru mini ali o’bazuri nga i e’da ani, e’yo mini saaruri pi ali o’baza mini be iritro.

³⁰E’yo ’diyi nga yi ’ye mi ruaa, mini ali o’bale ’ba jururu ’diyi lezu avasi, mini mi ezale wura yini inzile inzi ’diyisi ’borisi.

³¹Mi aci amvipi mini ma geria ’bo; e’yo ’disi ma nga okelea erini fe mi dria ani.

³²Opi Yehova ’yo ’dini: Mi nga afa mvu mi amvipi ma okeleasi, eri aliru azini amboru; yi nga mi gu gu, drinza fezu mi dri, nga mi onzo ra; okelea nde ma ale eco afa mvuzani tu.

³³Mi nga ga tre atiza ewanisi candi be, okelea osuta pinisi dri jazaniri be, eri okelea mi amvipi Samarianiri.

³⁴Mi nga eri mvu ra eri dezu teketeke, mi nga okelea nde ma iriko oci ra, mi nga mi ba oce ani; mani e’yo ’diri ’yolerisi, Opi Yehova ’yo ra.

³⁵E’yo ’disi Opi Yehova ’yo ’dini: Mi drini avile masi rarisi, mini ma ’bele mi ngukuarisi, e’yo ’disi e’yo mini saaruri pi ma panga ali o’baza mini be, ma ovu di mi ruaa.

³⁶Yehova nga vini ’yo ma tia ’dini kini: Mvi ’bani, mi nga Ohola pi ma e’yo li Oholiba be ya? Ka’dini mi ece di yi dri e’yo ngule onzi yini ’yele ’diyi.

³⁷A’disiku yi o’ba ali ’bo, ari ovu yi ma dri agelea ci; yi ’ba ali wura yini inzile inzi ’diyisi; yi fe vini agianzi yini, yini tile ma dri ’diyi ma aga ad ma alesi afa nde ’diyi dri, yi dri jazu.

³⁸Yi ’ye vini e’yo ’diri ma dri indi: yi eza pari mani alatararu 0’du alu ’dasi, yi eza sabato mani ’diyi alu indi.

³⁹A’disiku yi ka anzi yini ofu wura yini inzile inzi ’diyi owizu ’bo, yi emu o’du nde ’dasi pari mani alatararuri ma alia eri ezazu. Te mi ndre, yi ’ye jo mani ma alia ’dini.

⁴⁰Azini drinia indi, emi pe ’ba ti ’ba engapi ziri, yini ojio ti pele yi vu ’diyi omvezu, te mi ndre, yi eca ra. E’yo yinisi mi oji mi rua, mi tri mi mile, mi osu onyiafa mi ruaa;

⁴¹mi ri pari laza inzizaruri ma dria, drilenia mi ede mesa, te mesa nde ma dria mi ’ba obiese maniri pi odu maniri be.

⁴²O’duko ’ba o’biru ava lipi ’diyiniri ovu eri be; eji ’ba soroa ’diyi pi ’ba atipi ewasi engapi pari roko driaria ’diyi be; osu emveanzi yi ma dria ci ci, osu oku ndrizaru ’diyi yi ma dria indi.

⁴³Ma nga di ’yo oku nde ali o’baza e’dopi driori ma e’yosi, kini, Yi nga di ali ’ba erisi, eri’i indi yi be.

⁴⁴Te yi fi eri vu, yini file oku saaru vurile. ’Dini yi fi di Ohola pi vu Oholiba be, yi oku saaru ’diyi.

⁴⁵Te ’ba kililiru ’diyi nga e’yo yini li, yini lile oku ali o’bapi ’diyi ma driarile, yini oku ’ba ma ari adapi ’diyi ma e’yo lilerile indi; yini ovule oku ali o’bapi ’diyiru, azini ari ’bani ovule yi ma dria indirisi.

⁴⁶A’disiku Opi Yehova ’yo ’dini: Ma nga ’ba okule tualu ’diyi eji yi ruaa, nga fe ’ba ma o’be yi ’dale ’dole, ma opa yi ma afa ra.

⁴⁷’Ba okule ’diyi nga yi o’be onisi, nga yi oli yi ma seisi; yi nga agianzi yini piyi ofu ezoanzi yini be, nga yi ma; jo ve acisi.

⁴⁸’Dini ma nga fe e’yo saaruri ma de i anguasi beni, ’dini yi ma imba oku dria yi ma ’ye e’yo saaru eminirile ku beni.

⁴⁹Te yi nga di e’yo saaru eminiri ma panga ofe be emi ruaa, emi nga wura emini inzile inzi ’diyi ma e’yo onzi ’du emi ruaa; emi nga ni ani kini ma Opi Yehova’i beni.