Read lugbara Ezekieli 27 Bible Online

Ezekieli 27 - lugbara bible

Ezekieli 27

¹E’yo Yehovani nga eca ma vu dika, kini:

²Te mi’i, mvi ’bani la, mi e’do awuongo ngozu Turosi,

³’yozu Turo ma tia, Mi ovupi pari ’bani fizu miriaria, mi ’ba afa suru ndu nduni ozipi kpere angu yi lipi miri ma alia ’diyi vu kakauri la! Opi Yehova ’yo ’dini: Mi Turo la! mi ’yo ndra kini, rua ndri caka.

⁴Kalati mini ovu miri ma eselia adikadi; ’ba mi sipi ’diyi ede mi rua ndrizaru caka.

⁵Yi ede pati osiza mini dria kalafuru pati Seniria ’diyisi; yi o’du mario pati Lebanonia ’diyi pati oguruni bongo ’izuri edezu miniru.

⁶Yi ede kumara Basania ’diyi pati mini oguru pezu ’diyiru; ede kiti mini pati poyiru engapi angu Kitimu i lipi miri ma aliaria ’diyisi; ede ewasi eri ma ruaa onyiafaru.

⁷Ede bongo mile be nyiri ejile Misiria wura osole driniari bongo mini oguruniriru, ma ovu mi dri benderaru beni; bongo blururi pi okalakokalaruri be ejile angu Elisani yi lipi miri ma alia ’diyiari ovu mi dri bongo endri fepiriru.

⁸’Ba Zidonia ’diyi pi Arivadia ’diyi be pe oguru mini patisini; Turo la! ’ba mini onduaru ’diyi ovu mi alia, ce oguru mini ma drini.

⁹’Ba ’wara Gebalia ’diyi pi ’ba onduaru angu ndea ’diyi be yi ’ba ese oguru mini ’ma pari asipi ra ’diyi ma aliani; oguru miria ’diyi pi dria ’ba alenia ’diyi be ovu mi alia afa oziza mini olezu.

¹⁰Perisia pi ovu asikari mini ongulumuru ma eselia Ludi pie, Puti be, yi ’ba mini ombani ’diyi; yi o’i gombere piyi biri be mi alia; yi e’da rua ndriza miniri.

¹¹’Ba Arivadia ’diyi asikari mini ongulumuru be ovu abi mini ma dria kuru, ’ba Gamadini ovu jo mini izuru ’diyi ma dria; yi o’i yi ma gombere abi mini ma dria kuru; yi ’ba rua ndriza mini kililiruni.

¹²Tarisisi ovu mini afa olepiriru lonyi esele be ndu nduni ovule o’biru turisi; dahabu pisi, aya pie, aya emveru pie, aya nzipi turi be yi ole afa oziza mini ra.

¹³Yavani pi Tubali pie Meseki be yi ovu ’ba afa mini ozipi ’diyiru; yi fe ’ba ma ada piyi afazu molaru ’diyi be afa oziza mini olezu.

¹⁴’Ba Togarima ma joa ’diyi fe akanya piyi akanya ombani pie, akanya farasiru ’diyi be afa oziza mini olezu.

¹⁵’Ba Dedania ’diyi ovu ’ba mi afa ozipi ’diyiru; angu yi lipi miri ma alia ’diyi kakau ovu cuu miniri’i, yi eji mi dri olezaru ewasi piyi poyi be.

¹⁶Suria ovu ’ba mi afa olepiriru azi mi drini ’yele ’diyini ovule o’birurisi; yi fe afa oziza mini ’diyi olezu oni aje ambosi emeroderu piyisi, bongo okalakokalaruri pie, bongo wura osole ruaniari pie, bongo mile be nyiriri pie, oni ekaru miriari pie, oni aje ambosi ekaruri pie dria.

¹⁷Yuda pi ovu ’ba mi afa ozipi ’diyiru angu Israelini be; yi fe nganu Minitiari pi, afa aluza pie, anyuoso pie, odu pie, aro triza pie, afa oziza miniri olezu,

¹⁸Damasiki ovu ’ba mi afa olepiriru azi mi drini ’yele ’diyi kakausi, lonyi ndu nduni ovule o’birurisi; fe patiefi ma su Heliboniari pi kabilo ’biko emveruri be.

¹⁹Vedani pi Yavani be fe baka afa oziza mini olezu; aya i dipi diri pi, kasia pie, omi pie ovo afa oziza mini ’diyi ma eselia.

²⁰Dedani ovu mini afa ozipiriru, ozi ini bongo onyiru tu ’bani ani acizu akanya dria ’diyi.

²¹Arabua pi ’ba opiru Kedaria ’diyi be dria, yi ’ba afa ozipi mi dri ’diyiru, ozi mi dri kabiloanzi piyi, kabiloago ’diyi pie, ndri pie.

²²’Ba afa ozipi Seba pia Rama be ’diyi yi ovu mi afa ozipi ’diyiru; yi ole afa oziza mini afa, larikariru esele onyiru ’diyi pisi, oni dria aje amborusi ’diyi pie, mele pie.

²³Harani pi, Kane pie, Edeni pie, ’ba afa ozipi Sebaa ’diyi pie, Asuri pie, Kilimadi pie, yi ’ba afa mini ozipi ’diyiru.

²⁴Yi ozi yini afa onyiru opele ope ’diyi pi, bongo ombeza edele blururi pisi bongo wura be ’diyi pie, sanduku bongo onyiruri be ombele bakasi edele mario patisi ’diyi pie, afa oziza mini ma eselia.

²⁵Oguru Tarisisia ’diyi eji afa oziza minini. Te mi ga ndra tre, mi ofu ndra dizaru tu miri ma eselia adikadi.

²⁶’Ba mini oguru pepi patisi ’diyi eji mi miri amboru ma alia agadua ’bo. Te oli engapi kala etuni efurialeruri nyo mi miri ma agadua adikadi ’bo.

²⁷Lonyi mini pi, afa oziza mini pie, afa mini oleleri pie, ’ba mini ogurua ’diyi pie, ’ba oguru mini ma dri cepi ’diyi pie, ’ba oguru mini ma rua asipi rari edepi ’diyi pie, ’ba afa oziza mini olepi ’diyi pie, ’ba mini ombaru ovupi mi alia ’diyi pie dria, ’ba ongulumuru mini dria ovupi mi alia ’diyi be, yi nga o’de miri ma alia adikadi o’du mini dri jazurisi.

²⁸’Ba oguru mini ma dri cepi ’diyi ma lulusi angu aku ageia ’diyi nga oya oya,

²⁹’ba dria pati oguru pezuri bipi ’diyi pi nga efu oguru ma aliasi. ’Ba oguruni ’diyi pi, ’ba dria oguru dri cepi miria ’diyi be yi nga pa so nyaku ma dria,

³⁰yi nga yi ma o’duko fe ovuzu erizaru mi dria, yi nga owu okposi. Yi nga irifura omvu yi ma dria, yi nga yi oli of uta ma alia;

³¹yi nga yi dri’bi fa tuaru misi, nga koliba su yi ma ruaa, yi nga mi owu asi candirurisi, awu okporurisi.

³²Yini awu wuria yi nga awuongo nga mi owu ’dini kini: A’di i i Turo ’bani fele ovuzu eri miri ma alia agaduarileni ya?

³³Afa oziza mini ka ndra efu miria mi fe suru kakauni trazu; mi fe ndra opi nyakua ’diyini ovuzu afa e’iru lonyi mini o’biru pisi afa oziza mini be.

³⁴Te o’du mirini mi nyozu yi aliru ma aliarisi, afa oziza mini piyi o’de va mi alia ’ba mini ongulumuru ’diyi be dria,

³⁵’Ba ovupi angu yi lipi miri ma alia ’di yia ’di yi osu e’yo minisi osu osu; opi yini ovu urisi tu, yi mile eca candiru tu.

³⁶’Ba suru eselia afa ozipi ’diyi mi onzi onzi; mi efu afa uri fepiriru, te mi ngani ovu dika ku.