Read lugbara Ezekieli 3 Bible Online

Ezekieli 3 - lugbara bible

Ezekieli 3

¹Eri nga di ’yo ma tia, Mvi ’bani, mi nya afa mini isuleri; mi nya buku traza ’ diri, azini mi mu e’yo olu suru Israelini ma tia.

²Ma zi ma tile ani, eri fe ma nyu buku traza nderi ra.

³Te eri ’yo ma tia, Mvi ’bani, mi fe mi ale ma ga, mi fe mi anyajo ma tra buku traza ’diri mani fele mi dririsi. Ma nga di eri nya ani; eri ovu ma tilia aluzaru ekile anyuosole.

⁴Eri nga vini ’yo ma tia, Mvi ’bani, mi mu, mi ma ca kpere suru Israelini vu, mi olu e’yo mani yi tia.

⁵Peni mi ti suru ti juruni kani ti ewaru ’yopi ’diyi vu ku, te suru Israelini vu;

⁶peni mi ti suru kakau, ti ndu kani ti ewaru mini vale kuri ’yopi ’diyi vu ku. Ada, ma ka te mi ti pe ’ba ’dini ’diyi vu, yi eco te e’yo mini erizaru ra.

⁷Te suru Israelini ngani e’yo mini eri ku; yini e’yo mani erile kurisi; a’disiku ’ba suru Israelini ’diyi ovu andreti be kongolokoru, asi mbaza be indi.

⁸Mi ndre, ma imba mi mile kongolokoru mile yini vu, ma imba mi andreti kongolokoru andreti yini vu alu indi.

⁹Ma imba mi andreti kongolokoru oni oyiru okporu oni azini ’diyi agapi dria mvuzasirile; mi ru yi ku, mi asi ma oti mile yini okporurisi ku, ka tro yi suru mbupi amveri’i ti.

¹⁰Eri ’yo vini ma tia indi, Mvi ’bani, e’yo mani, mani ngale ’yole mi tiari dria, mi ’ba mi I asia, mi eri mi bilesi.

¹¹Azini mi mu, cazu kpere ’ba yini obile ati’baru ’diyi vu, yi suru mini ma anzi, mi ’yo yi be, mi olu e’yo yi tia kini, Opi Yehova ’yo ’dini; yi ka eri ra, kani yi ka eri ku ti.

¹²Etu ’dasi orindi ’du ma uru, te ma eri o’duko afa nzupi ongusi edidi berini ma ngukua, ’yozu kini, Diza Yehovani ma ovu inzizaru engazu pari erini ma alia.

¹³Azini ma eri o’duko afa idriru ’diyi ma opilenirini yini yi ma azini ’diyi ma rua eloria, azini o’duko pa omberu yi ma agei ’diyiniri indi, ada eri o’duko afa nzupi okposi edidi berini.

¹⁴’Dini orindi nga di ma ’du uru ani, nga ma ji ’dale; ’dini ma mu asi drazasi, ma orindini vele ma aliarisi, te dri Yehovani ovu ma ruaa okporu.

¹⁵Ma nga di ca ’ba obile ati’baru ’diyi vu Telabibua, ’ba nde ’diyi ovu yi ara Kebari ma tia; ma ca di pari yini rizuria, te ma ri yi ma eselia ’daa o’du aziri asi osuza be.

¹⁶Te eri nga di eca ’dini o’du aziri ’diyi ka nga yi de ra, e’yo Yehovani nga eca ma vu kini:

¹⁷Mvi ’bani, ma mi ’ba ’ba angu ma agei tepiriru suru Israelini dri; e’yo ’disi mi eri e’yo ma tiari fo, mi imba yi ma dri.

¹⁸Ma ka ’yo ’ba azi onzi ’yepiri ma tia, Mi nga dra ecekokoru; te mi imbani eri ku, mi oluni e’yo ’ba azi onzi ’yepiri ma tia ku, eri imbazu ma ku geri ini onziri ja, idri ini pazu ani beni, agu azi onzi ’yepi ’dari nga dra e’yo onzi erini ma alia; te ma nga ari erini ma arioti a’i mi vu.

¹⁹Te mi ka ’ba azi onzi ’yepiri imba ra, te eri ojani i azi ini onziri kuzu ku, kani kuni geri ini onziri ku indi, eri nga dra e’yo onzi erini ma alia ra; te mi pa idri mini ’bo.

²⁰Dika, ’ba e’yo onyiru ’yepiri ka i oja e’yo onyiru ini kuzu, ka eza ra, ma ka kumu ’ba eri ma drilia, eri nga dra ra; mini eri imbale kurisi eri nga dra e’yo onzi ini ma alia, yi ngani e’yo onyiru ndra erini ’yele ’diyi ma e’yo ega dika ku; te ma nga ari erini ma arioti a’i mi vu.

²¹Te di, mi ka ’ba azi onyiru ’yepiri imba ra, kini, ’ba azi onyiru ’yepiri ma eza ku, azini eri ka eza ku, eri nga adri idriru ada erini imbata erilerisi; te mi pa idri mini ’bo.

²²Isu de dri Yehovani ovu ma ruaa ’daa; te eri ’yo ma tia, Mi enga, mi fu mu angu senderua, ma nga eyo ’yo mi be ’daa.

²³Ma nga di enga ani, ma fu mu angu senderua ra; te mi ne, diza Yehovani so pa ’dale, ekile diza ndra mani ndrele yi ara Kebari ma tiarile; ma eco ma va o’bukuru ani.

²⁴Vutinia orindi nga di fi ma alia, fe mani pa sozu urulesi; eri ’yo e’yo ma be, eri ’yo ma ria kini, Mi mu fi mi vile joa, mi opi jotile ci.

²⁵Te mi’i, mvi ’bani la, mi ndre, yi nga anziriku ’i mi ruaa, yi nga mi ombe ani afa ndesi ra, mi ngani efu aci yi ma eselia ku;

²⁶te ma nga fe mi andreni nga i ebi mi anakulea ci, mi nga ani ovu ndi, mi ngani ovu ’ba egapi yi ma driariru ku; yini ovule suru mbupi amveri’irisi.

²⁷Te ma ka nga e’yo ’yo mi be, ma nga mi tile zi ra, azini mi nga ’yo yi tia kini, Opi Yehova ’yo ’dini; ’ba e’yo eripiri ma eri e’yo, te ’ba e’yo eripi kuri ma eri e’yo ku yi; yini ovule suru mbupi amveri’irisi.