Read lugbara Ezekieli 31 Bible Online

Ezekieli 31 - lugbara bible

Ezekieli 31

¹Eri nga eca ’dini, eli mudri drini aluri ma mba nari ma o’du alurisi, e’yo Yehovani nga eca ma vu, kini:

²Mvi ’bani la, mi ’yo Farau opi Misiriari pi ma tia ’ba ongulumuru erini ’diyi be, kini: Mini ovuzu amboru ’dipirisi, mi si mi a’di be ya?

³Mi ndre, ’ba Asuriari ovu ndra mario pati Lebanoniari, arakala erini ndrizaru, bini endri fe fudri ci, eri pati izuru tu, sini ovu iriti ma eselia,

⁴Yi nde fe nyaka erini, yi aliru fe erini zozu, pari yini eri sazuri ma ageia ci; ope yigeri erini ma ti razu pati asea ’diyi vu dria.

⁵E’yo ’disi eri zo izuru uru aga pati asea ’diyi dria ra; o’ba i arakala kakau, arakalani zo vini izuru izuru yi razani ovule amborurisi, erini idiria.

⁶Aria ’bua ’diyi dria si yi ma jorovu arakala erini ma eselia; anyapa asea ’diyi dria yi nga anzi yini oti arakala erini ma etia; suru ambo ambo ’diyi dria ovu eri ma endria indi.

⁷’Dini eri ovu ndrizaru tu ambo erinisi, azini arakala erini ma ocosi; olanini ovule yi kakau ma ageiarisi.

⁸Mario pati nga ndrizaru Mungu-niri ma alia ’diyi econi eri zizaru ku, kalafuru pati ovuni arakala erinile ku; masa pati ovuni arakala erini were ’diyile ku; pati nga Munguniria ’diyi ma azi sipi erile rua ndriza erinisini yo.

⁹Ma ’ba eri ndrizaru arakala erini kakau ’diyi ma e’yosi, ’dini pati Edenia ovupi nga Munguniri ma alia ’diyi dria ovu a’yasi eri ma e’yosi ra.

¹⁰E’yo’disi Opi Yehova ’yo’dini: Mini ovule izuru uru tu aga rarisi, erini i ma si ururi ’bale iriti ma eselia, i ma asi engale afuru izu erini ma e’yosirisi,

¹¹e’yo ’disi ma nga eri fe ku ’ba okporu suru eseliari ma dria, eri nga eri ’ye ada; ma dro eri e’yo onzi erinisi ’bo.

¹²Ani’ba suru eselia uri fepi ’diyi li eri va ’bo, ku eri ra. Arakala erini nyiri nyiri ’diyi o’de oni dria azini e’bu dria ma alia, arakala erini ambo ambo ’diyi onyo yi yi raza angu ndea ’diyi dria ma alia; suru dria nyakua ’diyi efu eri ma endriasi, ku eri ’bo.

¹³Aria dria ’bua ’diyinga ovu eri maa’wi dria, anyapa dria asea ’diyi nga ovu eri ma arakala ma dria.

¹⁴’Dini pati dria yi raza ma kalaa ’diyi aluni ma enga, i uru afuru izu inisi ku, kani ma ’ba i si ururi iriti ma eselia ku, kani ’ba okporu yini ma so pa izu yinisi ku, ’ba nde yi pati dria yi mvupi ’diyi; yini ovule fezaru dra dri dria, sizu nyaku ma kala eleria anzi ’bani ma eselia, ’ba sipi va ’bilea ’diyi be tualurisi.

¹⁵Opi Yehova ’yo ’dini: O’du erini sizu Pari ’ba drazaniria, ma fe ’ba ma wu awu, ma a’bu miri aliru ma dri erisi, ma oga yi razani rako si, yi amboruri ku ani ja; ma fe Lebanonini awu wuzu erisi, pati dria asea ’diyi ma asi fu erisi ra.

¹⁶Ma fe suru ma oya e’deza erini ma edidisi, ma ka eri ’be va Pari ’ba drazaniria ’ba sipi va ’bilea ’diyi be; pati dria Edenia ’diyi pi pati opele ope onyiru tu Lebanonia ’diyi be, yi pati dria yi mvupi ’diyi, yi omi yi ma asi ’da nyaku ma kala eleria.

¹⁷Yi’i indi ’yi fi Pari ’ba drazaniria eri be tualu ’ba ofule seisi ’diyi vu; ada ’ba ndra ovupi eri ma driru ovupi endrini ma i etia suru ma eselia ’diyi.

¹⁸’Dini mini ovuzu diza be azini amboru ’dopi pati Edenia ’diyi ma eseliarisi, mi si mi a’dile ya? Te ti, yi nga mi osi va pati Edenia ’diyi be tualu kpere nyaku ma kala eleria; mi nga la ’ba agele lile ku ’diyi ma eselia ’ba ofule seisi ’diyi be. ’Diri Farau’i, ’ba ongulumuru erini diyi be dria, Opi Yehova ’yo ra.