Read lugbara Ezekieli 34 Bible Online

Ezekieli 34 - lugbara bible

Ezekieli 34

¹E’yo Yehovani eca ma vu kini:

²Mvi ’bani la, mi ondri e’yo ’ba Israelini kabilo ocepi ’diyi ma dria, mi ondri e’yo, mi ’yo yi ma tia, ada ’ba kabilo ocepi ’diyi ma tia, kini, Opi Yehova ’yo ’dini: Candi ’ba Israelini kabilo ocepi yi ma ngulupi trapi nyakasi’i ’diyi dri! ’Ba kabilo ocepi ’diyi ma fe nyaka kabilo drini ku ya?

³Emi oso nya, emi kabilo ma ’biko su emi ruaa bongoru, emi oli kabilo nguza ’diyi ra, te emi feni nyaka kabilo dri ku.

⁴Emi feni Okpo kabilo adazaru ’diyi dri ku, emi atini azoru ’diyi ku, emi ombeni yi onyopi ’diyi ku, emi omvini drole amve ’diyi dika ku, emi ndani avipi ’diyi ku indi; te emi adri yi ma drilia opiru okposi azini asi okporurisi.

⁵Yi ere ndra yi ra ’ba kabilo ocepirini ovule yorisi; yi eca zaru anyapa asea ’diyi dri dria, ere yi ani ra.

⁶Kabilo mani aci abazaru oni dria ma eselia, azini oni izuru dria ma dria; ada kabilo mani ere yi wudrikuru drisi dria, te ’ba aluni yi ndapi kani yi vuti obipini yo.

⁷E’yo ’disi emi ’ba kabilo ocepi ’diyi la, emi eri e’yo Yehovani:

⁸Mani ovule idri berile, Opi Yehova ’yo ra, ada ada kabilo mani yini ecale ovuzu afa opazale, kabilo mani yini ecale zaru anyapa asea ’diyi dri dria, ’ba kabilo ocepirini ovule yorisirisi, te ’ba mani kabilo ocepi ’diyi ndani kabilo mani ku, te ’ba kabilo ocepi ’diyi tra yi ma ngulupi nyakasi’i, feni nyaka kabilo mani dri ku;

⁹e’yo ’disi emi ’ba kabilo ocepi ’diyi la, emi eri e’yo Yehovani:

¹⁰Opi Yehova ’yo ’dini, Emi ndre, ma ’ba kabilo ocepi ’diyi ma dri aru; ma nga kabilo mani ma kalafe a’i yi ma dria, ma nga vini oga yi dri nyaka feko kabilo dri si; yi ngani vini yi u:a ngulupi tra nyakasi dika ku indio Ma nga kabilo mani opa yi tiliasi, yi ma ovu yi ma zaru ku beni.

¹¹A’disiku Opi Yehova ’yo ’dini: Emi ndre, ma ngulupi, adani ma’i, ma nga kabilo mani nda, ma nga yi ndru ra,

¹²Ekile ’ba kabilo ocepirini kabilo o’biru erini ndrule o’du erini ovuzu kabilo yi erepi saaru ’diyi ma eseliarisirile, ’dinile ma nga kabilo mani ndru ra; ma nga yi opa pari dria yini ndra yi erezu alenia o’du iriti be inicicirurisi ’diyi ma alia.

¹³Ma nga yi ofu suru: eseliasi, ma nga yi oku angu ndu ndu ’diyi ma aliasi, nga yi ofi yi vile angua, nga yi dri nyaka fe oni Israelini ’diyi ma dria, yi raza ma tia, pari angu ndea ’bani ovuzu aleniaria dria.

¹⁴Ma nga yi oce iribi onyirusi, lico yini nga ovu oni angu uruleru Israelinirini ma dria; yi nga la va lico onyiruri ma alia ’dale, yi nga iribi bulu nya oni Israelini ma dria’i.

¹⁵Ma ma ngulupini nga nyaka fe kabilo mani drini, ma nga fe yi ma la va, Opi Yehova ’yo ra.

¹⁶Ma nga avipiri nda ma’i, ma nga droleri omvi dika, ma nga i nyopiri ombe ra, ma nga okpo fe azoruri dri; te nguzari azini okporuri ma nga yi dri ja ra; ma nga nyaka fe yi dri e’yo liza be,

¹⁷Te e’yo eminisi, kabilo mani o’biru ’diyi la, Opi Yehova ’yo ’dini: Emi ndre, ma e’yo li anyapa piyi ma eselia anyapa azini be, kabiloago piyi ma eselia ndriago be.

¹⁸Emini iribi bulu nyazu ’bori eri emi milia e’yo wereni ya? te emi nga iribi nde ma joloko otu pasi indi ya? Emini yi alaruri mvuzu ’bori e’yo wereni ya? emini yi nde ma joloko ezazu emi pasiri.

¹⁹Te kabilo mani yi iribi emini otule emi pasiri nya, yi yi emini ezale emi pasiri mvu indi.

²⁰E’yo ’disi Opi Yehova ’yo yi ma tia ’dini: Emi ndre, ma’i, adani ma ngulupini nga e’yo li anyapa nguza ’diyi pi ma eselia anyapa oyiza ’diyi be.

²¹Emini yi zele eje pisi wudri berisi, emini anyapa azoru ’diyi dria osile emi o’yusi de nga emi ereni yi pari dri dria kurisi,

²²e’yo ’disi ma nga kabilo mani o’biru ’diyi opa ra, yi ngani ovu afa opazale dika: ku; ma nga vini e’yo li anyapa piyi! ma eselia anyapa azini be.

²³Ma nga ’ba alu ’ba ovuzu yi ma drilia kabilo ocezu, eri nga nyaka fe yi dri, ada eri ati’bo mani Daudi’i; te eri nga yi dri nyaka fe, eri nga ovu ’ba yi ocepiriru.

²⁴Ma’i Yehova nga ovu Mungu yiniru, te ati’bo mani Daudini nga ovu opiru yi ma eseliani; ma Yehova, ma ’yo e’yo nde ma’i.

²⁵Ma nga aziza asi anzuruni azi yi be ra, ma nga fe nguru onzikanyaru ’diyi ma de yi angu ma eselia ra; yi nga adri uri kokoru, ka angu roko driaria ti, yi nga o’du ko oce talaa.

²⁶Ma nga angu nde pi ’ba asi ndrizaru pari oni mani ma ageia ’diyi ’be; ma nga fe ozoo ma ’di ewu erinisi; asi ndriza nga ’di ozoole.

²⁷Pati aseari nga efi ka ra, nyakuni nga afa kaza erini ka indi, yi nga ovu e’yo ’yaasi angu yinia; yi nga ni ma Yehova’i, ma ka nga pati yini kulumburu nyo ra, ma ka nga yi ari ’ba yi ’bapi ati’baru yi dri ’diyi ma dria ’boria.

²⁸Yi ngani ovu afa opazale juru dri dika ku, nguru asea ’diyi ngani vini yi oci ku; te yi nga adri e’yo ’yaasi, ’ba aluni ngani uri fe yi dri ku.

²⁹nga afa saza ru kuza beri enga yi dri, abiri ngani yi ofu angu ndea dika ku, ’ba jururu ngani vini drinza fe yi dri dika ku indi.

³⁰Yi nga ni kini ma Yehova Mungu yini, ma ovu yi be indi, azini yi’i suru Israeliniri yi ’ba mani, Opi Yehova ’yo ra.

³¹Te emi kabilo mani, kabilo nyamuko mania ’diyi, emi ’bani, te ma’i ma Mungu emini, Opi Yehova ’yo ra.