Read lugbara Ezekieli 35 Bible Online

Ezekieli 35 - lugbara bible

Ezekieli 35

¹E’yo Yehovani nga vini eca ma vu kini:

²Mvi ’bani, mi ’ba mi mile oni Seiri vu, mi ondri e’yo eri ma dria,

³mi ’yo eri ma tia, Opi Yehova ’yo ’dini: Mi ndre, ma mi dri aru, mi oni Seiri la! Ma nga ma dri eju mi ruaa, ma nga mi ’ba ovuzu andruru azini e’yo osutaru.

⁴Ma nga aku mini ’diyi eza ra, mi Inga ovu di andruru; te mi nga ni ma Yehova’i.

⁵Mini ovule nguta be ’dani ’danirisi, mini anzi Israelini ofele okpo seini dri o’du yini ovuzu ocoko berisirisi, o’du e’yo onzi ewu vilerinisi;

⁶e’yo ’disi, mani ovule idri berile, Opi Yehova ’yo ra, ma nga mi ede fezu ari dri, arini nga mi vuti dro ra; mini ari ngule kurisi arini nga mi vuti droni.

⁷’Dini ma nga oni Seirini ’ba ovuzu osutaru azini andruru; ma nga eri dri ’ba agapi alenisiri pi oli va ’ba emvipiri be.

⁸Ma nga fe oni erini ma ga tre ’ba erini yini ofule ’diyisi; ’ba ofule seisi ’diyi nga 0’de oni mini ma dria, azini e’bu mini pi ma alia yi raza mini be dria.

⁹Ma nga mi ’ba ovuzu andruru ’dani ’dani, ’ba ngani ovu aku mini ma alia dika ku. Emi nga ni ani ma Yehova’i.

¹⁰A’disiku mi ’yo ndra ’dini, Suru iri ’diyi nga ovu mani angu iri ’diyi be, ama nga yi nya amaniru; de isu Yehovani ’dale indi,

¹¹e’yo ’disi mani ovule idri berile, Opi Yehova ’yo ra, ma nga ’ye adra mini vusi azini a’ya mini mini ecele yi vu nguta mini ma aliari vusi indi; ma nga fe ma ma ovu nizaru yi ma eselia ra, ma ka nga e’yo mini li ra.

¹²Mi nga di ni kini ma’i Yehova, ma eri o’data mini dria mini ani oni Israelini o’dazuri, ’yozu kini, Yi andruru’i fe yi ama dri nyazu ra.

¹³Te emi ’ba emi ’ba amboru ma ruaa emi tilesi, emi o’ba e’yo emini ’yole ma ruaa ’diyi kakau; ma eri e’yo nde ’diyi ’bo.

¹⁴Opi Yehova ’yo ani ’dini: Angu wudrikuru dria ka ovu ayikosi ti, te ma nga mi ’ba andruru.

¹⁵Mini ndra ovule ayikosi awuruso suru Israeliniri ma dria, erini ovule andrururisirile, ma nga mi ’ye ’dinile alu indi: mi nga ovu andruru, oni Seiri la, Edomu be dria, ada Edomu woro. Te yi nga ni ma Yehova’i.