Read lugbara Ezekieli 37 Bible Online

Ezekieli 37 - lugbara bible

Ezekieli 37

¹Dri Yehovani ovu ma dria, eri nga di ma ji amve orindi Yehovanisi, ma ’bazu va e’bu ma alia; e’bu nde ga tre falasi.

²Eri fe ma aga yi ma ageia kuru, te mi ndre, yi ovu karakarau tu e’bu walaru ma alia; te mi ndre, yi ’wi teketeke.

³Eri nga ’yo ma tia ’dini, Mvi ’bani, fala ’diyi eco ovu idriru ra ya? Te ma omvi e’yo, Opi Yehova la, mi ni mi’i.

⁴’Yo vini ma tia dika, Mi ondri e’yo fala ’diyi ma dria, mi ’yo yi ma tia, Emi fala a’wiru ’diyi la, emi eri e’yo Yehovani!

⁵Opi Yehova ’yo fala ’diyi ma tia ’dini: Emi ndre, ma nga fe ava ma fi emi ma alia, emi nga ovu di idriru.

⁶Ma nga isu o’ba emi dria, ma nga kalanya eji emi dria, ma nga emi a’bu enyisi, ma nga ava ’ba emi ma alia, emi nga di ovu idriru ani; emi nga ni ma Yehova’i.

⁷’Dini ma ondri e’yo erini azile ma tiarile ra; mani e’yo ondriria ididini indi, azini mi ndre, oyakia oya angu; fala nde ’diyi nga yi eci tualu, fala alu alu eci i agyi be agyi be.

⁸Ma ndre ra, te mi ne, isu ovu yi ma dria, kalanya ru yi ma ruaa, enyi a’bu yi ma za dri ci indi; te ava yi alia nga yo.

⁹Eri nga di ’yo ma tia, Mi ondri e’yo oli ma tia, mi ondri e’yo, mvi ’bani la, mi ’yo oli ma tia, Opi Yehova ’yo ’elini: Mi ava la, mi emu engazu oli su vusi, mi vu ava ’ba ofule kai ’diyi ma alia, yi ma ovu ani idriru beni.

¹⁰’Dini ma ondri e’yo erini azile ma tiarile, avani nga ti yi ma alia, yi ovu di idriru, yi oso pa urulesi, asikari ongulumuru kakau tu.

¹¹Eri nga di ’yo ma tia, Mvi ’bani fala ’diyi yi suru Israelini driari’i. Mi ndre, yi ’yo ra, Fala amani ’wi ’bo, asi teza amani avi ’bo; ja ama dri de ’bo.

¹²E’yo ’disi mi ondri e’yo, mi ’yo yi ma tia, Opi Yehova ’yo ’dini: Emi ndre, ma nga ’bile; emini emi avu sazu ’diyi ma ti ozi ra, ma nga fe emi ma enga ’bile eminiasi, emi suru mani la; ma nga emi eji angu Israeliniria.

¹³Emi nga di ni ma Yehova’i, ma ka nga emi ma ’bile ma ti ozi azini fe emini engazu ’bile emini ma aliasi ’boria, emi suru mani la.

¹⁴Ma nga orindi mani ’ba emi alia, emi nga di ovu idriru, ma nga emi ’ba emi vile angua; te emi nga ni kini ma Yehova, ma ’yo e’yo nde, ma ’ye eri indi ma’i, Yehova ’yo ra.

¹⁵E’yo Yehovani nga eca ma vu dika, ’yozu kini:

¹⁶Te mi mvi ’bani la, mi ’du mini kali alu, mi si drinia ’dini: Yuda pini agyi erini Israeli ma anzipi be; mi ’du vini kali azini, mi si drinia: Yusufu pini, kali Efraimuni, agyi erini Israeli ma anzipi be;

¹⁷mi eci yi mi dri tualu, kali aluri pi kali aziniri be ovuzu kali aluru, yi ma eca di afa alurumi dria ani.

¹⁸Te suru mini ma anzipi ka nga ’yo mi tia kini, Mi ngani afa ’diyi ma efini ngoni yari ece ama dri ku ya?

¹⁹mi ma ’yo yi ma tia kini, Opi Yehova ’yo ’dini: Emi ndre, ma nga kali Yusufuni ovupi Efraimu ma driari pi ’du eri ma agyi suru Israelini ’diyi be; ma nga yi ’ba tualu eri be, ada tualu kali Yudaniri be, ma nga yi ’ba ovuzu kali aluru, yi efu ovuzu afa aluru ma dria.

²⁰Kali mini ru sizu yi ma dria ’diyi ma nga ovu mi dria yi milia.

²¹Mi ma ’yo yi ma tia, Opi Yehova ’yo ’dini: Emi ndre, ma nga anzi Israelini onze suru ndu ndu yini muzu yi vu ’diyi ma eseliasi, ma nga yi oku tualu kalaasi dria, ma nga yi cii yi vile angua ra

²²azini indi ma nga yi ’ba ovuzu suru aluru angu nde ma alia oni Israelini ma dria; opi aluni nga ovu opiru yi ma drilia driani; yi ngani ovu suru iri dika ku, yi ngani asi yi awa opi nyaza iriru dika aluni ku.

²³Yi ngani vini yi eza wura yini inzile inzi ’diyisi dika ku, kani afa ngule onzi yinisi ku, kani ezata yini ma azinisi ku indi; te ma nga yi opa pari dria yini ovuzu, yini ezazu yi ma alia ’diyiasi, ma nga yi oji alaru; ’dini yi nga ovu ’ba maniru, ma nga ovu Mungu yiniru.

²⁴Ati’bo mani Daudini nga ovu opiru yi ma driliani; yi dria nga ovu ’ba yi ocepiri be alu. Yi nga vini aci e’yo liza mani ma alia, yi nga e’yo mani azile ’diyi ma ta mba yi ’yezu indi.

²⁵Yi nga ovu angu mani fele ati’bo mani Yakobo dri ’bo emi a’bipini ovuzu aleniari ma alia; yi nga ovu alenia, yi’i anzi pie, anzi ma anzipi be dria ’dani ’dani; ati’bo mani Daudini nga ovu yi ma opiru ’dani ’dani.

²⁶Ma nga vini aziza asi anzuruniri azi yi be; eri nga ovu aziza ’ dani ’ daniru mani azile yi beri; ma nga yi ’ba yi ma paria, ma nga yi ezu kakau, ma nga pari mani alatararuri ’ba yi ma eselia agadua ’dani ’dani.

²⁷Bere mani indi nga ovu yi be, ma nga ovu Mungu yini, yi nga ovu ’ba mani.

²⁸Suru yi nga di ni kini ma Yehova ’ba Israelini ’bapi alaruri’i, pari mani alatararuri ka nga ovu yi ma eselia agadua ’dani ’daniria.