Read lugbara Ezekieli 38 Bible Online

Ezekieli 38 - lugbara bible

Ezekieli 38

¹E’yo Yehovani nga eca ma vu kini:

²Mvi ’bani, mi ’ba mi mile okporu Gogi angu Magogia, opi Rosi pi ma drilia Meseki pie Tubali beri vuleru, mi ondri e’yo eri ma dria,

³mi ’yo, Opi Yehova ’yo ’dini: Mi ndre, ma mi dri aru, Gogi, opi Rosi pi ma drilia Meseki pie Tubali beri la;

⁴ma nga mi oja vile, ma nga ewia ’ba mi tilia, ma nga mi ofu amve asikari mini ongulumuru ’diyi pie dria, akanya pie, ’ba nzupi akanyasi ’diyi be, yi dria su afa ombani esele ndu ndu dria yi ma ruaa, yi ’ba ongulumuru kakau gombere nyiri ’diyi pi osuzu amboru ’diyi be, yi dria alu alu ovu sei be dria;

⁵Perisia pi Kusi pie Puti pie: ovu yi be, yi dria osu gombere pi biri be;

⁶Gomeri pi ’ba erini ongulumuru ’diyi be dria; suru Togarimani ovupi kala andraleru kalati asizuriari pi ’ba erini ongulumuru ’diyi be dria; ada suru kakau ovu mi be.

⁷Mi ma ede di mi ngonde, ada mi ede mi ngonde, mi’i ’ba ongulumuru yi okupi mi be ’diyi be, mi ma ovu yi dri ’ba dri cepiriru.

⁸Yi nga mi andri o’du kakau ma vutia; eli vile ’diyi ma alia mi nga fi angu omvile sei ma driasi, okule suru kakau ma eseliasiria, emuzu kpere oni Israelini ovupi andruru ’dani ’dani ’diyi ma dria; te yi ofu eri suru ma eseliasi ’bo, yi nga ovu ’dale e’yo ’yaasi, yi dria alu alu.

⁹Te mi nga tu ra, mi nga emu oli akulukururile, mi nga ovu iritile angu a’buzu, mi’i ’ba mini ongulumuru ’diyi pie, azini suru kakau mi be tualu.

¹⁰Opi Yehova ’yo ’dini: Eri nga eca o’du nde ’dasi, e’yoni nga fi mi asisile ma alia, mi nga e’yo onzi otu mi asia ra,

¹¹mi nga di ’yo kini, Ma nga tu fi angu aku abi kaliru kokoru ’diyi beria; ma nga mu ’ba ovupi e’yere adripi e’yo ’yaasi ’diyi vu, yi dria ovupi abi kaliru piyi kokoru, katala pie, kalitile pie ’diyi;

¹²afa opaza opazu, afa opale okposiri wuzu; mi dri ojazu a’di ’dizu pari ndra andruru re curu’do ’ba be ’diyi ma ruaa, azini ’ba okule suru ndu ndu ma eselia, anyapa piyi isupi afa be ’bo, ovupi angu wudrikuru ma agadua ’diyi ma ruaa indi.

¹³Seba pi Dedani pie ’ba afa ozipi Tarisisia ’diyi pie, kamianzi yini be dria, nga ’yo mi tia, Mi emu afa opaza opazu ya? Mi oku ’ba mini ongulumuru afa opale okposiri wuzu miniru ya? Dahabu pi o’duzu mele be anyapa piyi olizu afa be, afa opaza opazu kakau ya?

¹⁴E’yo ’disi, mi mvi ’bani la, mi londri e’yo, mi ’yo Gogi ma ria, Opi Yehova ’yo ’dini: O’du ’ba mani Israelini ovuzu e’yo ’yaasi ’dasi, mi ngani e’yo nde ni ku ya?

¹⁵Mi mga emu engazu pari mini kala andralero reriariasi, mi’i suru kakau mi be tualo, yi dria nga nzu akanya dria, ’ba ongulumuru kakau asikari be o’biru okporu tu;

¹⁶te mi nga emu a’di ’dizu ’ba mani Israelini ma ruaa ekile iritini angu a’burile. Te eri nga di eca ’dini o’du yi! ’darisi ma nga mi eji a’di ’dizu angu mani be, suru ’diyi ma ni ma beni, ma ka nga ma e’da alaru yi milia mi alia raria, Gogi la!

¹⁷Opi Yehova ’yo ’dini: Mi agu ndra mani e’yoni olule ewu driorisi ati’ba mani ’ba Israelini nabiru ndra e’yo ondripi ewu ’dasi eli kakau kini ima nga mi eji yi ruaa ’diyi ma tisiri’i ’ya?

¹⁸Te eri nga eca ’dini o’du ’dasi, Gogi ka nga emu angu Israelini vu a’di ’dizu, Opi Yehova ’yo ra, aoko mani nga enga fi ma omvulea.

¹⁹A’disiku a’ya manisi azini adra mani acirurisi ma ’yo e’yo ’bo, Ada ada o’du ’dasi oyaza amboruni nga ovu angu Israelini ma alia;

²⁰’dini e’bi miria ’diyi ma rua nga ya ya mani ovule indirisi, aria ’bua ’diyi pie, anyapa asea ’diyi pie, afa dria acipi aci nyaku ma dria ’diyi pie, ’ba ma ada angu wudrikuru ma dria ’diyi pie dria; oyaza ndesi oni ambo ambo ’diyi nga yi ogu va, pari gulukuru ’diyi nga o’de ra, abi dria yi nga o’de va nyakua indi.

²¹Ma nga vini seini omve eri ma ruaa, kpere oni mani’diyi vu dria, Opi Yehova ’yo ra; ’ba alu aluni nga i sei ’ba adripi ma ruaa.

²²Ma nga e’yo to eri ruaa e’yo liza ma alia azo muani pisi ari be; ma nga fe ozooni ’dizu eri ma dria ’ba erini ongulumuru ’diyi pi suru kakau ovupi eri be ’diyi pie, ozoo tipi treri pisi si ambo ambo ’diyi pie, ad pie oni aciru ’diyi pie.

²³Ma nga ma ngulupi ’ba amboro, ma nga ma e’da ovuzu alaru, ma nga fe ma ovu nizaru suru kakau ma milia. Yi nga ni ma Yehova i.