Read lugbara Ezekieli 39 Bible Online

Ezekieli 39 - lugbara bible

Ezekieli 39

¹Te mi mvi ’bani la, mi ondri e’yo Gogi ma dria, mi ’yo, Opi Yehova ’yo ’dini: Mi ndre, ma mi dri aru, Gogi opi Rosi pi ma drilia Meseki pie, Tubali beri la;

²ma nga mi oja vile, ma nga mi dri ce drile, ma nga fe mi ma etu engazu kala andraleru turiasi, ma nga mi eji oni Israelini ma dria;

³ma nga osu mini gba engazu mi dri ejiari ma aliasi,ma nga fe ’ye mini ma o’de va engazu mi dri ndiriasi indi.

⁴Mi nga e’de oni Israelini ma dria, mi’i ’ba mini dria ongulumuru ’diyi pie, suru ovupi mi be ’diyi pie dria; ma nga mi avu fe aria esele ndu ndu dria za nyapi ’diyi pi dri anyapa asea ’diyi be, yini mi nyazu.

⁵Mi nga e’de nyamuko walaru ma alia; mani e’yo ’diri ’yole ’borisi, Opi Yehova ’yo ra.

⁶Ma nga aci ma ti pe Magogi pi ma dria ’ba ovupi e’yo ’yaasi angu yi lipi miri ma alia ’diyi ma alia ’diyi be; yi nga ni ma Yehova’i.

⁷Ma nga ru mani alatararu ’ba ovuzu nizaru ’ba mani Israelini ma eselia; ma ngani vini a’i ru mani alatararuni ovuzu ezazaru dika ku; suru ’diyi nga ni ma Yehova Mungu Alatararu Israeliniri’i.

⁸Emi ndre, eri emu emu, eri nga ovu ’yezaru ra, Opi Yehova ’yo ra. ’Diri o’du ndra mani e’yoni olule ’bori’i.

⁹’Ba ovupi aku Israelini ma alia ’diyi nga fu amve, nga aci edu afa ombani ’diyisi, yi nga yi ove ra, gombere amboruri wereri be iritro, osu pie, ’ye pie, kali pie, aju pie, yi nga aci edu afa ndesi eli aziri,

¹⁰’dini yi ngani eja azini owu asea ku, ngani vini pati ga oce talaa ejaru ku indi, a’disiku yini ngale ad edule afa ombani ’diyisirisi; te yi nga ’ba yi ma afa opapi ’diyi ma afa opa ra, yi nga ’ba yi ma afa ogupi ’diyi ma afa ogu ra, Opi Yehova ’yo ra.

¹¹Te eri nga eca o’du ’dasi ’dini, ma nga pari fe Gogi dri Israeli ma alia eri ma avu sazu, pari nde e’bu ’ba agapi aga miri ma kala etuni efuzurialeruria ’diyiniri’i; e’yo nde nga ’ba agapi ’dale ’diyi oga ra, te yi nga Gogi pi ma avu sa ’dale ’ba erini ongulumuru ’diyi be; yi nga runi ’da e’bu Hamoni-gogini’i.

¹²Suru Israelini nga yi ma avu sa mba aziri, yi ni’ba angu alaru beni.

¹³Ada, ’ba dria ovupi angu ndea ’diyi nga yi ma avu sani; e’yo nde nga ovu yi. E’bu Hamoni-gogini nu dri ru kuzaruni, o’du mani ngazu ma e’dazu diza berisi, Opi Yehova ’yo; ra.

¹⁴Yi nga ’ba azini ope ndu azi ngazu ’dani, ngazu acizu angu ma eselesi avu acepi nyaku dria amve ’diyi sazu, anguni ’bazu alaru beni; yi nga avu nda ’dinile mba aziri ma vutia.

¹⁵’Ba agapi angu ma alesi ’diyi nga aga aga, te ’ba azini ka ’ba ma fala ndre ra, eri nga eceta ’ba ageinia ci, de nga ’ba avu sapi ’diyi sani eri e’bu Hamoni-goginiria ku.

¹⁶(Aku omvele Hamona’iri ovu ’dale indi.) Yi nga angu ede alaru ’dini.

¹⁷Te mi, mvi ’bani la, Opi Yehova ’yo ’dini: Mi olu aria esele be ndu ndu ’diyi pi ma tia dria, anyapa dria asea ’diyi be ’dini, Emi oku di emi, emi emu; emi oku emi engazu kala dria vu edeta mani edele emi dri ’diri vu, eri edeta amboru oni Israelini ma driari, emi ma nya za, emi ma mvu ari indi.

¹⁸Emi nga ’ba okporu ’diyi ma za nya ra, emi nga ’ba opiru nyakua ’diyi ma ari mvu ra, kabiloago piyi kabiloanzi pie, ndri pie, ti pie, yi dria anyapa nguza Basania’diyi.

¹⁹Emi nga oso nya de nga emi trani ku, emi nga ari mvu de nga emi atini ku, emini edeta mani edele emi driri nyaria.

²⁰Emi nga tra mesa mani ma tia akanya piyisi, gari ombani pie, ’ba okporu ’diyi pie, ’ba ombani pie dria, Opi Yehova ’yo ra.

²¹Ma nga diza mani ’ba suru eselia; suru dria yi nga e’yo liza mani ’yele ’bo ’diyi ndre ra, azini dri mani ’bale yi ma driari indi.

²²’Dini suru Israeliniri nga ni ma Yehova Mungu yini engazu o’du ’dasi kpere drile.

²³Suru ndu ndu ’diyi nga di ni ani kini suru Israeli mu ndra ati’baru e’yo onzi yinisi, yini ezale ma vu, mani ma mile zile yi dri anirisi, ’dini ma fe yi ari’ba yini ma dria, odrazu ndra dria ani seisi.

²⁴Ma ’ye ndra yi ondi yini vusi, ezata yini vusi indi; ma zi ma mile yisi ra,

²⁵E’yo disi Opi Yehova ’yo ’dini.Ma nga Yakoboni omvi engazu ati’boarisi curu’do, ma nga ovu yikisi suru Israelini vu dria; ma nga ovu a’yasi ru mani alatararuri ma i e’yosi.

²⁶Te yi nga drinza yini wu ra, ezata yini ezale ma vu ’diyi be dria, yi ka nga ovu yi vile angua e’yo ’yaasi azini ’ba uri fepi yi driri ka nga ovu yoria,

²⁷ma ka nga yi ji dika engazu suru eseliasi, ma ka nga yi oku engazu ari’ba ma anguasi ’bo ma ka ma e’da ovuzu alaru yi ma eselia suru kakau ma milia raria.

²⁸Te yi nga ni ma Yehova Mungu yini, mani yi fele muzu ati’baru suru ma eselia, mani yi okule yi vile angua dika ’borisi. Ma ngani yi ma azi ku ’dale dika aluni ku;

²⁹ma ngani vini ma mile zi yisi dika ku, mani ma orindi osule suru Israelini ma dria ’borisi, Opi Yehova ’yo ra.