Read lugbara Ezekieli 43 Bible Online

Ezekieli 43 - lugbara bible

Ezekieli 43

¹Vutinia eri nga ma eji kalitilea, ada kalitile ti fepi etuni efuzurialeruri’i.

²Te mi ndre, diza Mungu Israelinirini emu geri kala etuni efuzurialeruriasi; o’duko erini yi raza kakau ma awule; nyaku ovu dizaru diza erinisi.

³E’yoni e’da i ekile afa ndreza ndraka mani ndrelerile, ada afa ndreza mani ndrele yi ara Kebari ma tiarile; ma nga di ma eco o’bukuru va.

⁴Diza Yehovani nga di fi jo ma alia geri kalitile ti fepi etuni efuzurialeruri vurisi,

⁵Orindi nga di ma ’du uru, nga ma eji kpere riidri alialeruria; te mi ndre, diza Yehovani ga jo ma alia tre,

⁶Te ma nga ’ba alu ma o’duko eri ra, erini e’yo ’yoria ma be engazu jo ma alia; te ’ba azini nga pa so ma ageia.

⁷Eri nga di ’yo ma tia, Mvi ’bani la, pari oguna manirini eri ’di, eri pari ma pa agele ’bazu mani ngazu adrizu anzi I sraelini ma eselia ’daniri’i. Suru Israelini ngani vini ru mani alatararuri eza dika, yi’i kani opi yini, ali o’baza yinisi ku, kani opi yini ma avu kule pari uruleru ’diyi ma alia ’diyisi ku indi;

⁸yini pari yini fizu ’diyi ’bale pari mani fizu ’diyi ma tia ogogo, yini jotile yini ma pati ’bale jotile mani ma pati ma tia ogogorisi; te kiri ama eselia yi pie abi alu a’dule. Te yi eza ru mani alatararuri afa ngule onzi yini ’yele ’diyisi; e’yo ’disi ma ja yi ma dri aoko manisi ’bo indi.

⁹Te di curu’do yi ma ’ba ali o’baza yini pi opi yini ma avu ’diyi be ma vusi ziri, te ma nga adri yi ma eselia ’dani ’dani beni.

¹⁰Te mi, mvi ’bani la, mi ece jo nde ’diri suru Israelini dri, yi ma ovu ani drinzasi e’yo onzi yinisi.

¹¹Yi ka ovu drinzasi afa dria yini ’yelerisi, mi ma imba di yi jo nde ma wura pi nizu, geri ’bani eri sizuri pie, fuza erini ’diyi pie, fiza erini ’diyi pie, wura erini dria ’diyi pie; e’yo azile eri ma e’yosi dria ’diyi pie, wura yini dria ’diyi pie, azita erini dria ’diyi pie dria; mi si eri yi ma milia, yi ma mba wura erini ma ta dria, azita erini ’diyi be dria, ma ’ye yi indi.

¹²Azita jo nderini eri ’di: oni ma dria lokiri erini ageinia driari ovu alatararu tu. Mi ndre, ’diri azita joniri’i.

¹³Pari edeta edezuri ma o’biza wuale vusi yi ’diyi (wuale nde eri wuale alu driale alu be driniari) etini nga ovu wuale alu, walani wuale alu, tini kalani ma ageiari walani driale erezari alu.

¹⁴Engazu eti nyaku driaria cazu tini valeruria nga ovu wuale iri, walani wuale alu; engazu tini wereria cazu tini amboruria nga ovu wuale su, walani wuale alu;

¹⁵pari edeta edezuri ma esele uruleruri nga ovu wuale su; engazu pari edeta edezuri ma pari aci eduzuria o’yu su indi uruleru.

¹⁶Pari edeta edezuri ma pari ad eduzuri, oconi wuale mudri drini iri, walani vini mudri drini iri, kala su ’diyi yi trotro.

¹⁷Tini ageiniari ma oconi wuale mudri drini su, walani wuale mudri drini su kala erini su ’diyi vusi; tini ageiniari wuale ma ali a’dule, etini wuale alu ageinia kuru. Medula ’bani tuzu ’diyi nga ti fe kala etuni efuzurialeruria.

¹⁸Eri nga di ’yo ma tia, Mvi ’bani la, Opi Yehova ’yo ’dini: Azita pari edeta edezurini yi ’di: O’du yini eri sizu yi ma edeta vezaru ’diyi vezu drinia azini ad oyazu driniarisi,

¹⁹emi ma fe ’ba edeta edepi ’ba Levini Zadoki ma oriru ovupi ma vu ogogo azi ngazu ma dri ’diyi dri monio aluduru edeta e’yo onzisirini, Opi Yehova ’yo ra.

²⁰Mi nga larini a’i ’ba o’yu erini su ’diyi pi ma dria, tini kalaniari ma pari ti ecipi agyi be su ’diyi pie, kalani ageiniari be dria; ’dini mi nga eri ’ba alaru, mi nga e’yo onzi erini ede ani.

²¹Mi nga monio edeta e’yo onziniriruri ’du indi, eri nga eri ve pari azile e’yo ndesi; nde ma angua pari alatararuri ma kala amveriari ma alia.

²²Te o’du iririsi, mi nga ndriago nyibile kokoruri ede edeta e’yo onzisiriru; ’dini yi nga pari edeta edezuri ’ba alaru yini eri ’bale alaru moniosirile.

²³Mi ka nga de eri ’bazu alaru ’bo, mi nga monio aluduru nyibile kokoruri pi ede kabiloago kabilo o’biru ’diyi ma eseliari be.

²⁴Mi nga yi eji ogogo Yehova ma milia, ’ba edeta edepi ’diyi nga a’i o’be yi ma dria, yi nga yi ede edeta vezaruriru Yehova dri.

²⁵O’du aziri ma alia dria mi ma ede ndri edeta e’yo onzisiriru o’du alu alu vusi, yi nga vini monio aludururi pi ede kabiloago kabilo o’biru ’diyi ma eseliari be, dria nyibileko kokoru ’diyi.

²⁶Yi nga pari edeta edezu nderi ma e’yo onzi ede 0’du aziri, yi nga eri ’ba alaru ani, ’dini yi nga eri ’ba ndu afa fele Mungu dririru.

²⁷Te yi ka nga o’duniri de dria ’bo, eri nga ovu ’dini, kini, engazu o’du arorisi azini drile, ’ba edeta edepi ’diyi nga edeta emini vezaru ’diyi pi ove pari edeta edezuri ma dria, edeta emmi asi anzuruni ’diyi be; te ma nga emi a’i ra, Opi Yehova ’yo ra.