Read lugbara Ezekieli 45 Bible Online

Ezekieli 45 - lugbara bible

Ezekieli 45

¹Azini indi emi ka anguni awa awurusoru odrisi ’bezasi, emi ma fe afa feza Yehova dri, angu ma esele alatararuri’i; oconi nga ovu oco ozu alifu kali iri drini towini, walani nga ovu alifu mudri; eri nga ovu alatararu kalati erini ageiniari ma alia dria.

²Angu nde ’dori ma alia, esele pari alatararuri driri nga ovu ’dini, oconi turu towi, walani turu towi, kalanini ovuzu trotro, trotro; ma ku vini wuale kali towi angu ageinia kururi ma e’yosi.

³O’biza ’diri vusi mi nga oco o’bi alifu kali iri drini towi, walani alifu mudri; angu nde ’diri ma alia pari alatararu ovupi alatararu turi nga ovu indi.

⁴Eri angu ma esele alatararuri’i; eri nga ovu ’ba edeta edepi azi ngapi pari alatararuria, esipi ogogo azi ngazu Yehova dri ’diyi dri; eri nga ovu jo yini ma pari, azini angu alatararu pari alatararuri dri.

⁵Angu azini,coni alifu kali iri drini towi, walani alifu mudri, nga ovu ’ba Levini jo ma azi ngapi ’diyi dri, ovuzu yi ma ngulupi ma afaru, aku yini ovuzu alenia ’diyi sizu.

⁶Te afa feza esele alatararuri maliari kalaa emi nga aku nde ma angu fe, walani alifu towi, oconi alifu kali iri drini towi; eri nga ovu suru Israelini dria dri.

⁷Te esele opi driri nga ovu afa feza alatararuri azini aku nde vile angu ma kala aluria azini kala azinia, afa feza alatararori ma drilia aku nde ma angu ma drilia indi, woko etuni ’derialeru eri etuni ’derialeru, woko etuni efurialeru eri etuni efurialeru, oconi ovu esele alu ma oco vusi engazu kalati etuni ’derialeruriasi cazu kpere kalati etuni efuzurialeruria.

⁸Angu nde ma alia eri esele eri ma ngulupi ma afaru Israeli ma alia. Opi mani ’diyi ngani ’ba inza dika ku; te yi nga angu fe suru Israelini dri suruti yini vusi.

⁹Opi Yehova ’yo ’dini: Eri ma fu dri emi dri ci, emi opi Israeli ma drilia ’diyi la! Emi nze egana pi afa opaza be, emi ’ye e’yo liza pi e’yo liza kililiruri be; emi ku ’ba mani ma afa opazu okposi ja, Opi Yehova ’yo ra.

¹⁰Afa nziza o’bizu emini ’diyi ma ovu kililiru, afazu abakaru ma ovu kilili, obi ma ovu kilili indi.

¹¹Afazu abakaru obi be ma ovu afa o’biza be alu, obi nde ma eco ero ma esele mudri ’diyi ma ji alurisi, afazu abakaru ma eco ero ma esele mudri ’diyi ma azi alurisi indi; o’biza erini ma ovu ero ma o’biza vusi.

¹²Sekeli ma ovu sente omvele gerari be kali iri; silingi omvele maneruri emini ma ovu sekeli kali iri, kali iri drini towi, mudri drini towi.

¹³Afa feza emini ngale feleri eri ’di’i: afazu abakaru ma esele azia ’diyi ma azi alu emi ma fe ero nganuni vusi, azini afazu abakaru ma esele azia ’diyi ma azi alu emi ma fe ero onduni vusi,

¹⁴odu ma esele lile obi odu beri vusiri nga ovu obi ma esele mudri ’diyi ma azi aluri obi omvele kori ecopi obi mudrisiri vusi, adani ero aluri vusi (a’disiku obi;mudri eca ero be trotro);

¹⁵azini kabilomva alu kabilo o’biru ma eselia, ada kabiloanzi turu iri nyamuko iribi bulu be Israelinia ’diyi vusi, ovuzu edeta anyafurasiriru, edeta vezaru, azini edeta asi anzuruniriru yi ma e’yo onzi edezu, Opi Yehova ’yo ra.

¹⁶’Ba angu ndea ’diyi dria yi nga afa feza ’diri fe opi Israeli ma driliari dri.

¹⁷Te eri nga ovu azi opini edeta vezaru ’diyi pi fezu, edeta anyafurasi ’diyi pie, edeta afa mvuzasi ’diyi pie, eri ma yi omu piyi vusi mba o’diru pie, sabato pie, suru Israelini ma omu e’yoni azile azi ’diyi pie dria: eri nga edeta e’yo onziniri pi ede, edeta anyafurasiri pie, edeta vezaruri pie, edeta asi anzuruniri be dria, suru Israelini ma e’yo onzi edezu.

¹⁸Opi Yehova ’yo ’dini: Mba okori ma o’du alurisi emi nga monio aludu nyibileko kokoruri ’du, mi nga ani pari alatararuri ’ba alaru.

¹⁹’Ba edeta edepiri nga edeta e’yo onziniri ma ari ’du oya jo ma pati jotile ma kalaa ’diyi pi ma dria, pari su pari edeta edezuri ma tini ecizuria ’diyi pie, riidri alialeruri ma pati kalitile ma kalaa ’diyi pie dria.

²⁰Mi ma ’ye ’dini mbao’du aziririsi, ’ba dria abapi abari pi ma e’yo edezu, ’ba ondua kokoruri be; ’dini emi nga jo ma e’yo onzi ede ani.

²¹Mba okori ma o’du mudri drini surisi, emi nga omu agaza jo drilesiri ’ba, eri omu nyale o’du aziriri’i; ’ba ma nya mikate akufi kokoru.

²²O’du nde ’dasi opi ma ede monio e’yo onzi ma edetaru i ma ngulupisi azini ’pa dria angu ndea ’diyisi indi.

²³Omu ma o’du aziri ’diyi vusi eri ma ede edeta vezaru Yehova dri, ada monio aziri piyi kabiloago aziri be, yi dria ma ovu nyibileko kokoru, o’du vusi o’du vusi o’du nde aziri ma alia dria; ma fe ndriago indi o’du vusi edeta e’yo onziniriru.

²⁴Eri ma ede edeta anyafurasi afazu abakaru alu monio vusi, afazu abakaru alu kabiloago vusi, azini odu lubu alo abaka alu alu vusi.

²⁵Omu mba aziri ma o’du mudri drini towisiri ma alia, eri ma ’ye ’dinile indi o’du aziri, edeta e’yo onziniri vusi ’dini, edeta vezaruri vusi ’dini, edeta anyafurasiri vusi ’dini, odu vusi ’dini indi.