Read lugbara Ezekieli 46 Bible Online

Ezekieli 46 - lugbara bible

Ezekieli 46

¹Opi Yehova ’yo ’dini: Kalitile riidri alialeru ti fepi kala etuni efuzurialeruriari nga ovu opizaru o’du azia ’bani azi ngazu ’diyisi; te sabatosi yi nga eri zi mgboru, azini o’du mba sini i e’dazurisi eri nga ovu mgboru indi.

²Opini nga fi engazu amve geri kalitile ma jobileko vurisi, eri nga pa so kalitile ma pari kalaari tia. ’Ba edeta edepi ’diyi yi nga edeta erini vezaruri pi ede edeta erini asi anzuruniri be, eri nga di Mungu inzi pari ’bani fizu kalitilearia. Vutinia eri nga fu ra, te yi ngani kalitile opi ku de nga etu ’deni ku.

³’Ba angu ndea ’diyi nga yini Mungu inzi kalitile nde ma tilia Yehova ma milia sabatosi azini o’du mba sini i e’dazuri vusi.

⁴Edeta vezaru opini ngale fele Yehova dri sabatosiri nga ovu kabiloanzi azia nyibileko kokoru ’diyi pi kabiloago nyibileko kokoruri be;

⁵edeta anyafurasiri nga ovu abaka alu kabiloagoni, te edeta anyafurasi kabiloanziniri nga ovu erini ecole felerile, odu ma ovu lubu alu abaka vusi.

⁶Te o’du mba sini i e’dazurisi edeta erini nga ovu monio aludu nyibileko kokoruri alu, kabiloanzi azia, kabiloago be; yi dria ma ovu nyibileko kokoru;

⁷eri ma ede edeta anyafurasi ngonde indi, abaka alu monioniri, abaka alu kabiloagoniri, te kabiloanziniri erini ecolerile, te odu lubu alu abaka alu vusi.

⁸Te opi ka fi ra, eri ma fi geri kalitile ma jobileko vurisi, eri ma fu vini geri ndesi indi.

⁹Te ’ba angu ndea ’diyi ka nga emu Yehova ma milia omu e’yoni azile azi ’diyisi, ’ba fipi geri kalitile andraleruri vurisi inzita inzizuri ma fu geri kalitile uruleruri vurisi; te ’ba fipi geri kalitile urulerori vurisiri ma fu geri kalitile andraleruri vurisi: ’ba ma mvi geri kalitile teka erini fizurisi ku, te eri ma fu kilili geri eri ma driliarisi.

¹⁰Yi ka fi ra, opini nga fi yi ma eselia agadua, yi ka nga fu ra, yi nga fu tualu indi.

¹¹Omu ma alia, omu e’yoni azile azi ’diyi be, edeta anyafurasiri ma ovu abaka alu monioni, abaka alu kabiloagoni, te kabiloanzini erini ecole felerile, te odu lubu alu abaka alu vusi.

¹²Opi ka nga afa feza ceniri ede, edeta vezaruri kani edeta asi anzuniri, fele afa feza ceniriru Yehova driri, ’ba ma zi kalitile ti fepi kala etuni efurialeruriari eri dri; eri nga di edeta erini vezarori pi ede ngonde edeta erini asi anzuruniri be, erini ’yele o’du sabatonisirile, Vutinia eri ma fu ra, ka fu ’bo, ’ba opi kalitile ci.

¹³Mi ma ede kabilomva eli aluni nyibileko kokoruri edeta vezaru Yehova dri etuzu etuzu, mi ma ede eri o’biti vusi o’biti vusi.

¹⁴Mi ma ede edeta anyafurasiri eri be tualu o’biti vusi o’biti vusi, afazu abakaru alu ma esele azia ma azi aluri, odu lubu alu ma esele na ma, azi aluri osazu anyafura ’ile inikiniri be; eri edeta anyafurasi edele Yehova dri etuzu ’dani azita ’dani ’danirisiri’i.

¹⁵Yi nga kabilomva pi ede, edeta anyafurasiri pie, odu be, o’biti vusi o’biti vusi ’dinile, edeta vezaru ovupi ’dani ’daniri’i.

¹⁶Opi Yehova ’yo ’dini: Opi ka afa feza fe agupianzi ini ma azi dri, eri awuruso ini, eri nga ovu anzi ini ma afaru, eri afa yiniru yini a’ile awurusoruri.

¹⁷Te eri ka afa feza fe engazu awuruso ini ma alia ati’ba ini ma azi dri, eri ma ovu afa eriniru kpere eli trutaniria; vutinia o’du ’dasi afa nde nga emvi opini; te e’yo awuruso erinisi eri nga ovu anzi erini dri.

¹⁸Azini indi opi ma ’du ’ba nde ma awuruso yi ofuzu okposi angu yi vileriasi ku; eri ma fe awuruso agupianzi ini dri engazu i vile anguri ma eselia, ’dini ’ba mani alu alu ma ere yi ndu ndu angu yi vileri kuzu ku beni.

¹⁹Vutinia eri nga ma ofi pari fizu ovupi kalitile ma kalaari ma eselesi, fizu jo aliza alatararu ti fepi kala andraleruria ’ba edeta edepi ’diyini ’diyi ma alia; te mi ndre, pari azini indi esele ngukualeru kala etuni ’dezurialeruria.

²⁰Eri nga di ’yo ma tia, ’Diri eri pari ’ba edeta edepi ’diyini edeta e’yoni ’ba ndezuri pi a’dizu edeta e’yo onzini beri, pari ’ diri ma alia yi nga edeta anyafurasiri ova, yi kazu yi ejizu riidri amveleruria ’ba ’bazu alatararu ku.

²¹Vutinia eri nga di ma ofu fizu riidri amveleruria, fe ma aga riidri nde ma oji su vurisi; te mi ndre, riidri nde ma oji alu alu vusi riidri azini indi-

²²eci riidri azini riidri nde ma oji su ’diyi ma alia, yi ma oconi wuale kali su, walani kali na; riidri su ovupi oji vusi ’diyi ma o’biza alu.

²³Oti jo azini yi ma ageia, ada oti yi riidri su ’diyi ma ageia, ede eri pari za a’dizu ’diyi be jo otile agemia ’diyi ma alia.

²⁴Eri nga di ’yo ma tia, Jo za a’dizu ’diyi yi ’di, yi pari ’ba jo ma azi ngapi ’diyini ngazu edeta ’ba ndeni feleri a’dizu ’diyi.