Read lugbara Ezekieli 47 Bible Online

Ezekieli 47 - lugbara bible

Ezekieli 47

¹Eri nga ma eji vile ma ofizu jo ma tilia; te mi ndre, yini ega pari ’bani fizu joari ma etiasi, ra etuni efuzurialeru (a’disiku jo ma drile fe ti kala etuni efuzurialeruria); yi nde ra etinisi va, engazu jo ma kala dri ndiaria, pari edeta edezuri ma kala uruleruria.

²Vutinia eri nga ma ji amve geri kalitile andraleruri vurisi, nga ma dri ce jo ageiasi geri amverisi kpere kalitile amveria, geri kalitile ti fepi kala etuni efuzurialeruriari vurisi; te mi ndre, yini efu ’daa dri ndialeru.

³Agu ka fu etuni efuzurialeru, baka afa o’bizuri be eri ma dria, eri nga wuale o’bi alifu alu, nga vini fe ma aga yi ma alesi; yi nde ca kpere ma pa ombele vusi.

⁴Eri nga wuale o’bi alifu alu dika, fe ma aga yi ma alesi, yi nde ca kpere ma kumuti vusi, nga alifu alu o’bi vini dika, fe ma aga alenisi: yi nde ca ma opileti vusi.

⁵Vutinia eri nga alifu alu o’bi dika, te eri yi ara mani ecole zole kuri, yini tile ’borisi; eri yi ’bani wele weri, yi ara ’bani ecole agale alenisi kuri.

⁶Eri nga di ’yo ma tia, Mvi ’bani, mi ndre afa ’ diri ’bo ya? Vutinia eri nga ma eji ra, nga ma omvi yi raza nde ma tia.

⁷Te curu’do ma ka emvi ’bo, mi ndre, yi ara ma tia pati yi indi karakarau tu kala aluria azini kala aziniria,

⁸Vutinia eri nga di ’yo ma tia, Yi ’diyi efu razu angu etuni efuzurialeruria, yi nga ra Arabaa; yi nga fu mirialeru, ada yi erini fele efuzuri nga fi miria; yi nde nga ovu atizaru.

⁹Te eri nga eca ’dini, pari dri dria yi ndeni cazuria, anyapa acipi o’biru ’diyi nga ovu idriru, e’bi yi nga ovu o’biru karakarau tu; yi nderini cale ’dale ’borisi, yi mirini nga ovu atizaru, afa dria nga ovu idriru pari dria yini cazuria.

¹⁰Te eri nga eca ’dini, ’ba e’bi okupi ’diyi nga pa oso tinia; engazu Eni-gedia cazu kpere Eni-egilaimua nga ovu pari ’bani emba ajazuriru; e’bi yini nga ovu esele be ndu ndu, ekile e’bi miri amboruria ’diyile, karakarau tu.

¹¹Te pari erini oritaru kani ateru i ’diyi ngani ovu atizaru ku; fe yi ’dani pari a’i edezuriru.

¹²Te yi ara nde ma tia, kala ’dosi azini kala ’dasi, pati nyaza esele be ndu ndu dria nga idi ra. Yi ma bi ngani onyu ku, yi ma efi ngani vini ece ku, te yi nga efi ka o’diru mba vusi mba vusi, yinini efule pari alatararu ma aliarisi. Efini nga ovu nyakaru, biniri aroru ’ba rua atizu.

¹³Opi Yehova ’yo ’dini: Kalati emini ngazu angu awazu awuruso, suru Israelini mudri drini iri ’diyi vusiri nga ovu ’di. Yusufuni nga ovu esele awale ’diyi be iri.

¹⁴Te emi nga ovu awuruso be trotro, trotro; ma enga ndra ma dri angu nde ma e’yosi oyo sozu kini ma nga eri fe emi a’bipi dri ra, te eri nga e’de emini awurusoru ra.

¹⁵Angu ma kalatiri ’di: kala andraleruria, engazu miri amboruria geri Hetiloniarisi kpere pari ’bani fizu Zedadiaria,

¹⁶Hamoti pi, Berota pi, Sibiraimu ovupi kalati Damasikini pi ma eselia kalati Hamatini beri pi, Hazeri-hatikoni Haurani ma kalatiari pie.

¹⁷Engazu miria, kalatini nga ovu Hazari-enoni Damasiki ma kalatiari’i, te andra kalati Hamatiniri eri kalati andraleruri’i. ’Diri kala andraleruri’i.

¹⁸Kala etuni efuzurialeru Haurani pi ma eselia Damasiki pie, Gileadi pie, angu Israelini beri nga ovu Yoridani’i; emi nga eri o’bi engazu kalati andraleruria kpere cazu mini etuni efuzurialeruria. ’Diri kala etuni efuzurialeruri’i.

¹⁹Te uru kala uruleruri nga ovu engazu Tamaria kpere cazu yi Meriboti-kadesiniria, cazu yi ara Misirinia kpere miri amboria. ’Diri kala uruleruri’i.

²⁰Kala etuni ’derialeruri nga ovu miri amborini, engazu kalati uruleruria cazu kpere angu i otipi pari ’bani fizu Hamatiari beria. ’Diri kala etuni ’derialeruri’i.

²¹’Dini emi nga angu ’diri awa emi dri suru Israelini vusi.

²²Te eri nga eca ’dini, emi nga eri awa odrisi ’bezasi emi dri awurusoru, azini ani’ba emi eselia ngapi anzi tipi emi eselia ’diyi dri indi. Yi ma ovu emi dri anzi tile kari’baru anzi Israelini eselia ’diyile; yi ma a’i awuruso emi be tualu suruti Israelini ’diyi ma eselia.

²³Te eri nga eca ’dini, kini emi ma fe awuruso ani’bo dri suru erini ovuzu aleniaria ’daa, Opi Yehova ’yo ra.