Read lugbara Ezekieli 5 Bible Online

Ezekieli 5 - lugbara bible

Ezekieli 5

¹Te mi’i, mi mvi ’bani, mi ’du eli cizaru, mi ma ’du eli ekile idri ’ba dri’bi fapiri vilerile, mi ma fa ani mi dri’bi pi mi ti’bi be; vilerisi mi ma ’du afa afa ma nziza o’bizuri, mi awa ’bi nde ani.

²’Bi nde ma esele na ’diyi ma azi aluri mi eve acisi aku amboru ma alia, o’du ’bani aku nde acezu kuru ombasi ’diyi ka yi de ’boria; mi ma ’du esele na ’diyi ma azi alu, mi ma oli eri ma ageia seisi; te esele na ’diyi ma azi alu mi ma ere oli alia, ma nga sei enze yi ma vuti drozu.

³Te mi ma ’du ’bi nde ma ’ azi were, ma ombe yi mi bongo ti ma ’ alia.

⁴’Bi nde ’diyi ma eselia mi ma ’du vini azini, mi o’be yi acia, mi eve yi acisi; ’diarisi acini nga efu kpere suru Israeliniri vu dria.

⁵Opi Yehova ’yo ’dini: ’Di Yerusalemu’i; ma ’ba eri suru ndu ndu ma eselia, angu ndu ndu ovu eri ma ageia.

⁶Te eri mbu e’yo mani lile ’diyi ma ruaasi amve, erini e’yo onzi ’yele suru ndu ndu agazu rarisi, eri eza e’yo mani azile ’diyi aga angu eri ma ageia ’diyi ra; yini e’yo liza mani gale sirisi, yini acile e’yo mani azile ’diyi ma vutia kurisi.

⁷E’yo ’disi Opi Yehova ’yo ani ’dini: Emini ovule ambo be suru ndu ndu ovupi emi ageia ’diyi agazu rarisi, emini acile e’yo mani azile ’diyi ma vutia kurisi, emi inzini e’yo mani lile ’diyi ku, emi ’yeni vini suru ndu ndu ovupi emi ageia ’diyi ma azita vusi ku indi;

⁸e’yo ’disi Opi Yehova ’yo ani ’dini: Mi ndre, ma’i ma ngulupi’i, ma omba ’ba mi ruaa ma’i; azini ma nga e’yo liza fe ma ’ye i mi alia va suru ndu ndu ma milia.

⁹Te ma nga e’yo mani ’yele nga kuri ’ye mi alia, e’yo mini onzikanyaru mani ngule onzi ’diyi dria ma e’yosi; ma ngani vini e’yo ’dinile ’diyi ’ye dika ku indi.

¹⁰E’yo ’disi ’ba ataru ’diyi nga anzi yini ma za nya mi eselia, ’ba anziru ’diyi nga vini yi ma atapi ’diyi ma za nya ra; ma nga ani e’yo liza ’ye mi alia, ma nga ’ba acepi jolokoru ’diyi ere oli dria vusi.

¹¹E’yo ’disi mani ovule idrirurile, Opi Yehova ’yo ra, mini pari mani alatararu ezale afa mini onzikanyaru ’diyisi dria azini afa mani ngule onzi dria ’diyisirisi, e’yo ’disi ma nga fe mi anu were ada ada; ma mile ngani mi ku ku, ma ngani ovu yikisi ku.

¹²Esele na mini ’diyi ma azi aluri nga dra azo muanisi, yi nga odra mi alia likisi; esele na ma azi aluri nga e’de sei ma sia mi ageia; ma nga esele na ma azi aluri ere oli dria vusi, ma nga sei enze yi ma vuti drozu.

¹³Ma adrani nga i de ’dini, ma nga fe asi veza manini i dezu yi ma ruaa raka, ma nga ma asi omi ceni ndo; yi nga ni kini ma Yehova’i, ma ’yo e’yo ava manisi ’bo, ma ka nga fe adra manini i dezu yi ma ruaa ’boria.

¹⁴Azini ma nga mi ’ba ovuzu andruru, azini o’dataru suru ndu ndu mi ageia ’diyi ma eselia, ma nga mi ’ba ’dini ’ba dria agapi geria ’diyi ma milia indi.

¹⁵Geri ’disi e’yo ’diri nga ofu o’dataru, ajidimararu, imbataru, azini osutaru, suru ndu ndu ovupi mi ageia ’diyi vu, ma ka nga e’yo liza mani ’diyi ’ye mi ruaa adra pisi aoko be, mani egaria mi dria asi vezasiria-ma’i Yehova, ma ’yo e’yo ’diri ma’i-

¹⁶ma ka ’ye onzi likiru ’diyi ma ti pe yi ruaa, ’ye nde ’ba dri jazu mani ngale tini pele emi dri jazu ’diyi; ma nga abiri ere emi dria aga ra, ma nga kali emini enyaruri nyo ra,

¹⁷Ma nga liki pi ma ti pe emi vu nguru onzi ’diyi be, yi nga ’ba mini ofu ra; azo muani pi ari be nga aga mi alesi; ma nga sei eji mi ruaa. Ma Yehova, ma ’yo e’yo ’diri ma’i.