Read lugbara Ezekieli 7 Bible Online

Ezekieli 7 - lugbara bible

Ezekieli 7

¹E’yo Yehovani eca vini ma vu dika kini:

²Azini mi’i, mi mvi ’bani, Yehova ’yo ’dini angu Israelini ma tia Asizani! Asiza eca angu ma kala su ’diyi ma dria.

³Isu de asiza nde eca mi ruaa, te ma nga adra mani ti pe mi ruaa, ma nga e’yo mini li geri mini vusi; ma nga e’yo onzikanyaru mani ngule onzi mini ’yele ’diyi omvi dria mi ruaa be.

⁴Ma mile ngani mi ku ku, ma ngani ovu yikisi ku; te ma nga geri mini omvi be mi ngulupi ma dria, te e’yo rigule onzi mini ’yele ’diyi nga ovu mi eselia. Te emi nga ani ni kini ma Yehova’i.

⁵Opi Yehova ’yo ’dini: E’yo onzini, lu e’yo onzini! Emi ndre, eri emu emu.

⁶Asiza eca ’bo, asiza nde eca ’bo; eri enga o’duasi, ati i mi ruaa ’bo. Mi ndre, eri emu emu.

⁷Dra mini eca mi vu, mi ’ba ovupi angu ma aliari la! Ewu peleri eca ’bo, o’duni ogogo; eri o’du otre etani oni ma dria ururi’i, te ovuni otreta ayikoniri’i ku.

⁸Ma nga di ma adra osu mi dria cucuru’do, ma nga adra mani fe dezu mi ruaa, ma nga e’yo mini li geri mini vusi; ma nga e’yo ngule onzi mini ’yele ’diyi omvi mi ruaa be.

⁹Ma mile ngani mi ku ku, ma ngani ovu yikisi ku; te ma nga e’yo eji mi ruaa geri mini vusi, e’yo ngule onzi mini ’yele ’diyi nga ovu mi alia. Emi nga ni kini Yehovani coni.

¹⁰Mi ndre, o’duni Mi ndre, eri emu emu! Dra mini efu ’bo; kali zo fu ’bo, afu egbi ’bo.

¹¹Egana zo ’bo, ofu kali e’yo onziniriru ’bo; ’ba aluni yi ma eselia ngani ace ku, kani ongulumu yini, kani lonyi yini; ’ba aluni ngani ovu amboru yi ma drilia ku.

¹²Ewuni eca ’bo, o’duni ovu ogogo. ’Ba afa jepiri ma ovu ayikosi ku, ’ba afa ozipiri ma ovu vini candisi ku indi, a’disiku adra ovu ’ba erini ongulumuru ’diyi ma dria dria.

¹³A’disiku ’ba afa ozipiri ngani emvi afa ozileri vu ku, ka tro yi ovu idriru ti. A’disiku e’yo ndreza ’diri ovu ’ba ongulumuru yini dria ma e’yosi; ’ba aluni ngani emvi ku; te ’ba aluni ngani i ’ba okporu adriza ini onzikanyaru ma alia ku.

¹⁴Yi vu guka ’bo, yi ’ba afa dria ngonde ’bo; te ’ba aluni funi omba ’bazu ku, a’disiku adra mani ovu ’ba ongulumuru yini ma dria dria.

¹⁵Amveleru semi, alialeru azo muani pi liki be; ’ba nyamukoa amveri nga dra seisini; ’ba ovupi aku amboru ma aliari nga dri ja liki pisi azo muani beni.

¹⁶Te ’ba apapi yi ma eselia ’diyi nga apa ovuzu oni dria uru, ekile a’balau e’bua ’diyile, yi dria alu alu nga owu e’yo onzi yinisi,

¹⁷’Ba dria ma drini nga aka aka, ’ba dria ma kumutini nga ca corokolo.

¹⁸Yi nga vini yi rua osu kolibasi, rua yazani nga yi a’bu ci; ’ba dria ma mileni nga ovu drinzasi, ’ba dria ma dri yi nga ovu tuaru.

¹⁹Yi nga dahabu yini o’be geria saaru, mele yini nga ovu ekile afa ondiru onzikanyarurile; dahabu yini piyi mele yini be ngani ceo yi pazaru o’du Yehovani adra ’bazurisi ku; ngani vini yi ma orindi dri ayiko fe ku, yi ma ale ngani tra ani ku indio A’disiku yi ndra e’yo onzi yini ma kumu.

²⁰Eri’i eri ’ba pari erini onyiru onyiafaru inzita opiniri ma alia, te yi’iruni yi ede afa ngule onzi ’diyi ma wura yini inzile inzi ’diyi pi afa yini onzikanyaru ’diyi be, yi o’ba yi pari nde ma alia; e’yo ’disi ma ’ba eri yi dri ekile afa ondirurile.

²¹Te ma nga eri fe afa opazale ani’ba dri, ma nga eri fe ’ba ezapi nyakua ’diyi dri afa yini pale yiniriru; yi nga eri ma alatara eza ra.

²²Ma nga vini ma mile oja yi vusi kala azinia ra, ’ba nde ’diyi nga pari mani zizaruri ma alatara eza ani ra; oguou yi nga fi eri ma alia, yi nga eri ma alatara eza indi.

²³Emi ede anziriku; anguni gale tre ezata yini ari ’bani adazu ’diyisirisi, akuni gale tre eganasirisi.

²⁴E’yo ’disi ma nga ’ba jururu agapi e’yo onzisi ra ’diyi eji, yi nga jo yini obi yiniru; ma nga vini fe ’ba afuru ’diyi ma afu ma de ira, pari yini alatararu ’diyi ma alatara nga ovu ezazaru indi.

²⁵Dri jazani emu emu; yi nga asi anzuru nda ra, te eri nga ovu yo.

²⁶Drileonzini nga emu drileonzi aziniri ma dria, kuza e’yo onziniri nga ku e’yo kuza aziniri ma dria; yi nga e’yo ndreza nda nabi vu, te azitani nga avi ’ba edeta edepiri dri ra, e’yo amazani nga avi ’ba ’wara dri indi.

²⁷Opini nga wu, wu, opimva nga imvo su i ruaa, ’ba angu nde ma e’ipiru ’diyi ma drini nga aka candisi. Te ma nga yi ’ye geri yiniri vusi, ma nga e’yo yini li ekile e’yonini yi silerile; te yi nga ni ra kini ma Yehova’i,