Read lugbara Ezekieli 8 Bible Online

Ezekieli 8 - lugbara bible

Ezekieli 8

¹Eri nga eca ’ dini eli aziarisi, mba aziari ma o’du towirisi, mani riria ma vile joa, azini ’ba ’wara Yudani yini riria ma drilia indi, Opi Yehova ma dri e’de ma ruaa ’dale.

²O’du ’dasi ma lu ra, te mi ne, wura ekile ad ma e’dazale; engazu e’daza opile erinisi kpere vasi eri acini, dika engazu opile erini ururiasi, e’dazanini dizaru ekile mola dizarurile.

³Te eri nga e’daza ekile drileri eju ma bizu dribi ma driari ma efisi; orindi nga di ma ’du uru nyaku pi ma eselia ’bu be, nga ma ji afa ndreza Munguniri ma alia Yerusalemua, kpere irii alialeruri ma kalitile angu lupi andraleruri vu; pari nderi ma alia pari wura a’yaniri, fepi Mungu ma asini engazu a’yaruri indi.

⁴Te mi ndre, diza Mungu Israeliniri ovu ’dale ekile e’daza ndra mani ndrele angu senderu ma alia ’daarile.

⁵Eri nga di ’yo ma tia, Mvi ’bani, mi enga mi mile geri andraleruri luzu. Ma enga di ma mile uru angu geri andraleruriari luzu, azini mi ndre, kalitile pari edetaniri ma kala andraleruria, pari ’bani fizuria, wura a’ya fepi ’diri indi.

⁶Eri nga di ’yo ma tia, Mvi ’bani, mi ndre afa yini ’yeleri ra ya? Mi ndre afa ngule onzi tu suru Israelinini ’yele pari ’dori ma alia, mani pari alatararu mani kuzu ani ziri ’diyi ra ya? Te mi nga afa ngule onzi ambo ambo ’diyi ma azi ndre dika indi.

⁷Eri nga ma ji irii ma kalitilia; te ma ka lu ra, mi ndre, ’bile indi abi ruaa.

⁸Eri nga ’yo ma tia, Mvi ’bani, mi lu abi tala mgbo; te ma ka abi tala lu ’bo, mi ndre, jotile indi.

⁹Eri ’yo ma tia, Mi fi, mi ndre afa onzikanyaru ngule onzi yini ’yele ’doa ’diyi.

¹⁰Ma nga di fi ra, ma nga yi ndre ra; azini mi ndre, afa acipi agatisi ’diyi ma -wura dria, anyapa onzi ’diyi pie, wura suru Israelinini inzile inzi ’diyi pie dria, yi ma endrilendri ovu sizaru abi ruaa ageinia kuru.

¹¹’Ba ’wara Israelini ma azi kali aziri ’diyi osopa yi drilia, ’ba ’diyi ma eselia agaduari Yaazania Sefani mvi’i. Yi dria alu alu ovu ajiko obiese vezu ’diyi be yi ma dria; obiese nde ma acika arikariruri nga nyi tu uru ’duu.

¹²Eri nga di ’yo ma tia, Mvi ’bani la, mi ndre e’yo ’ba ’wara Israelinini ’yele angu inirua, yi alu aluni ’yele; yini wura inzile inzi ’diyi ma ta mbazuri ma aliari ra ya? Yini ’yole kini, Yehova ndreni ama ku, Yehova ku nyaku ’borisi,

¹³Eri ’yo vini ma tia indi, Mi nga afa ngule onzi ambo ambo yini ’yele ’diyi ma azi ndre dika indi.

¹⁴Eri nga di ma eji jo Yehovani ma kalitile kala andraleruriari vu; te mi ndre, oku yi ori ’dale yini Tamuzini owuria.

¹⁵Eri nga ’yo ma tia, Mi ndre e’yo ’diri ’bo ya, mvi ’bani la? Mi nga afa ngule onzi ’diyi ma azi agapi ra ’diyi ndre ra indi.

¹⁶Eri nga ma ofi jo Yehovani ma irii alealeruria; azini mi ndre, hekalu Yehovani ma tilia, angu jobileko eti pi ma eselia pari edeta edezuri beria, ’ba kali iri drini towi indi, oco yi ma ti ngukualeru hekalu Yehovani vu, oja yi ma mile kala etuni efuzurialeru; yi etu inzi kala etuni efurialeruria inzi inzi,

¹⁷Eri nga di ’yo ma tia, Mi ndre e’yo ’diri ’bo ya, mvi ’bani, la? Afa ngule onzi yini ’yele ’doa ’diyi ’yezu ovu suru Yudani ma milia afa wereru turi ra ya? A’disiku yi fe; angu ga tre egana yini ’ba ’yezu okposirisi ’bo, yi oja yi vile adra mani engazu; azini mi ndre, yi pati ma arakala ’ba yi ma omvulea,

¹⁸E’yo ’disi ma’i indi, ma nga yi ’ye asi vezasi; ma mile ngani yi ku ku, ma ngani ovu yikisi ku indi; te yi ka tro wu ma bilia o’duko urusi ti, ma ngani yi eri ku.