Read lugbara Danieli 1 Bible Online

Danieli 1 - lugbara bible

Danieli 1

¹Eli na Yehoyakimu opi Yudanirini angu nyazurisi, Nebukadineza opi Babuloniari ecea Yerusalemua eri acezu ombasi.

²Opi fe Yehoyakimu opi Yudaari eri ma dria, afazu ovupi Mungu vile joa azini ’diyi be; eri ji yi angu Sinaria adrou eri vile joa, ofi yi adrou eri vileri ma jo lonyi ta mbazuria.

³Opi nde nga di ’yo Asupenazi ambo erini ’ba nzele ranyaru ’diyi ma driliari ma tia, eri ma ofi anzi Israelini ma azi ’diyi, adani opianzi azini ’ba amboru ’diyi ma anzi,

⁴yi karile nyibile kokoru, te ’ba mile alaru be, ’ba e’yo vapi ondua dria be ’diyi, ’ba nita ma e’yo vapi tu, ’ba e’yo imbaleri nipi ra, ecopi pa sopi opi vile joa onyiru ’diyi; eri ma imba yi ’ba Kalideyaa ’diyi ma onduasi, ti yinirisi indi.

⁵Opi azi yi ma fe yi dri etuzu nyaka alupi tu opi vileri ma esele azini, patiefi ma su erini mvuleri be, ma ezo yi eli na; eli na ka yi de ra yi ma nga pa so opi ma milia beni.

⁶’Ba ’diyi ma eselia ’ba engapi anzi Yudaa ’diyi, yi Danieli pi, Hanania pi, Misaeli pi, Azaria pie.

⁷Ambo ’ba nzele ranyaru ’diyi vileri o’da yi ma ru ’dini: Danieli ma ru Belitesaza’i Hanania ma ru Sadaraka’i, Misaeli ma ru Mesaka’i, Azaria ma ru Abedinego’i.

⁸Te Danieli imba i ma asi eri kazu i ezazu nyaka alupi tu opinirisi ku, kani patiefi ma su erini mvulerisi ku indi; nga ani ambo ’ba nzele ranyaru ’diyi vileri zi, kini, i ma eza ani i nyaka opinirisi ku.

⁹Mungu nga di fe Danieli ma isu asi ndriza azini asi anzuru ambo ’ba nzele ranyaru ’diyi vileri ma milia.

¹⁰Ambo ’ba nzele ranyaru ’diyi ma driliari ’yo Danieli ma tia, Ma ru opi mani inzileri, eri’i afa emini nyaleri azini mvuleri azipi ’bori ra; eri nga emi mile ndre ovuzu oyizaru aga karile ovupi eriniri zoaziru ’diyi ma mile ra a’di e’yosi ya? ’Dinilerisi emi nga fe opini ma ombe li ra.

¹¹Danieli ’yo agu ambo ’ba nzele ranyaru ’diyi ma driliarini ’bale Danieli pi Hanania pi Misaeli pi Azaria pie ma agei tepiri ma tia, kini:

¹²Mi o’bi nga ati’ba mini ’diyi o’du mudri, ama zi mi tia; kirikiri mi fe nga ama dri tibi ini nya, yi mvuza be fo!

¹³Vilerisi mi fe ’ba ma o’bi ama mile mi drilia, karile adripi nyaka alupi tu opi vileri nyapi ’diyi be; ka’dini mi ma ’ye ati’ba mi vile ’diyi vu mini ndrelerile ndo.

¹⁴’Dini eri eri e’yo yini ’yole ’diri ra, eri nga di yi o’bi o’du mudrisi ani.

¹⁵O’du mudri ka yi de ’bo mile yini ndri tu, yi rua a’bu tu aga karile nyaka alupi tu opi vileri nyapi ’diyi dria ra.

¹⁶E’yo ’disi agu ambo nderi ’du nyaka alupi tu yini ra, patiefi ma su yini azile yi driri be, eri nga yi dri tibi ini fe’i.

¹⁷Karile ’diyi sutro, Mungu fe yi dri nita pi e’yo vaza be e’yo dria ’bani yi imbale ’diyi onizu onduasi; te Danieli va ini afa ndreza piyi ma efi orobi dria be.

¹⁸’Dini o’du ndra opini azile yi ofizurini i deria, ’ba ambo ’ba nzele ranyaru ’diyi driliari nga yi ofi opi Nebukadineza ma milia.

¹⁹Opi nde olu e’yo yi be, te ’ba ’diyi dria ma eselia yi ndru ’ba azini Danieli pile, Hanania pi, Misaeli pi, Azaria pie ti; e’yo ’disi ’ba ’diyi oso pa opi ma milia ani.

²⁰E’yo dria onduani e’yo vazani be opini zile yi tiari ma alia, opi ndre yi aga ojori piyi ’ba e’yo ondripi i vile angua ’diyi be dria ra pale mudri.

²¹Danieli ovu di ’dani cazu kpere eli alu opi Kuroni e’dozu opi nyazuria.