Read lugbara Danieli 11 Bible Online

Danieli 11 - lugbara bible

Danieli 11

¹Ma’i, eli oko opi Dario ’ba Mediarini opi nyazurisi, ma enga eri ’bazu okporu, azini okpo fezu eri dri.

²Curu’do ma mi dri e’yo ada ece. Mi ndre, ace nga opi na yi nga enga Perisiaa; opi suri nga opi oko ’diyi aga dria afa lonyisi ra; eri ka nga ovu okpo be erini ovule afa e’inirisi ’bo’teri nga ’ba enga dria a’di ’dizu suru Girikiniri be.

³Te opi okpo beri nga pa so ra, eri nga adri opiru angu nyaza walarurisi, eri nga e’yo ’ye ekile erini lelerile.

⁴Eri ka pa so ra suru eriniri nga i nye ra, yi nga angu erini awa oli su ovupi ’bu etia ’diyi ma kalaa vusi, te yi ngani eri awa anzipi dri ku, ngani ovu vini opi nyaza ndra erini angu nyale okorile ku indi; te yi nga suru erini nze ra, fezu ’ba azini ’diyi dri.

⁵Opi ovupi kala uruleruari nga ovu okpo be, opianzi erini ’diyi ma azi aluri be, opimva nderi nga ovu okpo be eri agazu, nga angu nya, angu nyaza eriniri nga ovu walaru.

⁶Eli ka nga aga fudri ’bo, yi nga yi ti eci tualu; opi uruleruari ma zini nga emu opi kala andraleruari vu, e’yoni edezu yi eselia; te zana nde ma dri ngani ovu okpo be ’dani ku, opi nde ngani pa so ku, kani dri erini ti; te ku zaŋa ’diri ra, ’ba eri ejipi ’diyi pie, mva erini tileri pie, agupi eri aza kopi o’du ’dasiri be dria.

⁷Te engazu pati egbipi eri ma olaari ma alia, ’ba azini alu nga enga eri ma paria; eri nga emu omba ’bazu asikari ongulumuru ’diyi be, eri nga fi opi ovupi kala andraleruari ma jo okporu i ta mbazu ombasiri ma alia, eri nga omba ’ba yi be, nga yi aga ra.

⁸Te adrou yini piyi wura inzile inzi edele aya rapi acisi ’diyi pie, afazu yini onyi be edele dahabusi kani melesi ’diyi be, eri nga opa ra, eri nga yi eji Misiria; eri nga di opi kala andraleruari ku eli azinisi ra.

⁹Eri nga di ’emu opi ovupi kala uruleruari vile angua, te eri nga mvi angu erinia be.

¹⁰Anzi erini yi nga a’di ’di, yi nga ’ba ombani ’diyi oku o’biru kakau tu, yi nga emu ’dani, yi nga ti yi razani tilerile, nga aga drile; te yi nga emvi ra, yi nga a’di ’di cazu kpere jo okporu erini i ta mbazu ombasiri vu.

¹¹Te opi kala uruleruari nga ovu adrasi tu, eri nga efu a’di ’dizu eri be, adani opi ovupi kala andraleruari be; opi nde nga ’ba ofu o’biru, te ti, ’ba o’biru ’diyi nga ovu fezaru eri ma dria.

¹²Te eri ka ’ba o’biru ’diyi obi ra, asi eriniri nga enga afusi; eri nga ’ba alifu mudri alifu mudri karakarau o’be va, te ngani aga ku.

¹³Azini opi kala andraleruari nga emvi ra, eri nga ’ba o’biru ofu karakarau aga ndra okori ra, eri nga emu etu asizaniria, adani eli asizuria, de isu eri ma asikari o’biru afa be karakarau tu.

¹⁴Te ewu ’dasi ’ba kakauni nga enga a’di ’dizu opi kala uruleruari be; azini ’ba asi draza be ’ba mini ma eselia ’diyi nga yi enga lezu fezu afa ndreza nderi ma ’ye i ani; te yi nga o’de ra.

¹⁵’Dini opi kala andraleruari nga eca, nga oni odro nguluru, nga aku ovupi kali be okporuri opa ra. Te ’ba o’biru ovupi kala urulerua ’diyini ngani eco ku, ka adri ’ba erini opele ’diyi ti, okpo azini ecopi yi ma dri ripini yo.

¹⁶Te agu ’diri emupi a’di ’dipi eri beri nga ’ye ekile i ma ngulupini lejerile, ’ba aluni pa sopi eri ma driliani yo; eri nga pa so angu dizaruri ma alia, te afa eri dri ageleari dri jazani.

¹⁷Eri nga i mile ’ba okporu emuzu suru ini driari ma okpo be, azini eri nga e’yo edeza kililiru ’diyi ede eri be, eri nga yi ’ye ra. Yi nga zamva ’bani fe eri dri opi nyaza ezazu ani; te eri ngani pa so ku, azini ngani ovu erini ku.

¹⁸E’yo ’diri ma vutia eri nga i ma mile oja angu yi lipi miria ’diyi vu, eri nga yi opa kakau; te opimva azinini nga fe o’data erini ma asi ra; ada, eri nga fe o’data erini ma emvi eri ruaa.

¹⁹Eri nga di asi mile oja aku kali be ’bani apazu ombasi ovupi angu ini ma alia ’diyi vu; te eri nga aci parapara, eri nga ’de va, yi ngani eri isu dika ku.

²⁰Te ’ba azini nga vini asi enga eri ma paria, nga fe ’ba afa soza okupiri ma aga diza suruniri ma aliasi; te ace o’du were eri nga ovu dri jazaru ra, te aokosi ku kani a’di alia ku.

²¹Eri ma paria agu ’bani ’bale edemararu turi nga enga ra, ’bani inzita suruni fele nga eri dri oku kuri’i; te eri nga emu ewu asi anzurunisi, eri nga suru isu iniru erini ’ba obele inzita inzorusirisi.

²²Yi nga asikari ongulumuru ’du teketeke eri ma miliasi, ekile etatani afa ’dulerile, yi nga yi nyo ra, awa’dini opimva azizaniri be indi,

²³Yini e’yo aziza dezu eri be ’boria, vutinia eri nga ’ye lokirisi; te eri nga enga ra, azini eri nga ofu ’ba okpo be turiru, de isu ovuni ’ba be kakau ku.

²⁴Eri nga emu etu asi anzurunia angu osoru nyaka kapi tu opi vile anguaria; eri nga e’yo ndra a’bipini adrile ’yele ku ’dinileri ’ye’i, kani yi ma a’bipi ma a’bipiruri ti, eri nga afa; bile ombaa ’diyi, afa opaza pie, ere yi ma eselia lonyi be. Awa’dini eri nga lokiri erini ndru aku kali be ’bani apazu ombasi ’diyi ma ruaa, cazu o’du fudri ci.

²⁵Te eri nga okpo ini enga, asi teza iniri be a’di ’dizu opi kala uruleruari be, asikari ongulumuru be; azini opi kala uruleruari nga a’di ’di asikari o’biru tu ovupi okpo be tu ’diyi be; te eri ngani pa so ku, a’disiku yi nga lokiri ndru eri ma ruaa ra.

²⁶Awa’dini ’ba nyaka erini alupi turi nyapi ’diyi nga eri ma dri jani; asikari ongulumuru erini ’diyi nga yi ere yi tizani ajalerile, azini ’ba kakau nga o’de va ofuzaru.

²⁷Opi ’diyi iritro, ’ba yi asi lokiri ’yezu yi eselia; yi nga e’yo inzoru ’dini ’diyi nze vi ma eselia de isu yi ri mesa alu ma ria, te eri ngani yi aza ko ku; a’disiku e’yo ma asizani nga eca etu pele ’boria.

²⁸Vutinia eri nga di mvi angu inia lonyi be kakau tu, te eri nga e’yo aziza alatararuri ngu onzi i ma asia. Eri nga e’yo ’ye ekile ini lelerile, eri nga asi mvi angu inia ndo.

²⁹O’du pele ’bori ka eca ra, eri nga emvi emu kala uruleruria; te e’yo erini o’du vileriari ngani ovu ekile erini ovule o’du okoriarile ku.

³⁰A’disiku oguru ’ba Kitia ’diyini nga emu a’di ’dizu eri be; eri nga ovu ani candisi tu, nga emvi, nga aoko ’ba e’yo aziza alatararurisi, eri nga e’yo ’ye mi lelerile. Awa’dini eri nga emvi dika, nga ’ba e’yo aziza alatararuri kupi ’bo ’diyi ma e’yo ega inzitasi ra.

³¹Asikari afa ombani be nga enga kala eri vileria, yi nga pari alatararuri eza ra, pari okporu ombaniri be, yi nga afa veza vele etuzuri fe asi ra, yi nga fe afa onzikanyaru dri jazaniri edre uru.

³²’Ba e’yo onzi ’yepi aziza ruaa ’diyi eri nga yi obe inzita lokirirurisi; te ’ba Mungu yini nipi ’diyi nga ovu okpo beni, yi nga e’yo ambo ’yeni.

³³’Ba ovupi ondua be ’ba eselia ’diyi yi nga ’ba imba kakau; te yi nga o’de sei pisi, ad pie, ’ba ati’ba pie, lafa opaza ombaari pie, o’du kakau ti.

³⁴’Dinile, yini o’deria, yi nga yi ma aza ko were. Te ’ba kakau nga yi o’ba yi ma ruaa inzita lokirirurisi;

³⁵’ba nde ondua be ’diyi ma azi nga o’de va indi, yi ma ayaze nzezu, yi ’bazu ani alaru, azini emveru beni, cazu kpere o’du asizaniria; a’disiku e’yo nde nga eca o’du pelerisi.

³⁶Opini nga e’yo ’ye ekile erini lelerile; eri nga i inzi ceni, eri nga i ’ba amboru adrou dria agazu, eri nga e’yo osutaru ’yo Mungu Mungu drianiri ma ruaa. Eri nga drileba isu kpere aokoni ngaria i deria; a’disiku e’yo lile ’bori nga i ’ye ra,

³⁷’Dini eri ngani adrou i ma a’bipini ma e’yo ega ku, kani ava okuni; ’dini eri ngani adrou azini ’diyi ma e’yo ega dria ku, a’disiku eri nga i ’ba amboru aga afa azini ’diyi ma drilesi dria,

³⁸Te eri ma paria eri nga diza fe adrou aku okporu ombaniri vileri dri, azini eri riga diza fe adrou eri ma a’bipini nile ndra kuri dri, mele pisi, dahabu pie, oni aje nyapi tu ’diyi pie, afa ayiko fepi ’dini ’diyi pie.

³⁹Eri riga eco omba ’bazu aku okporu tu ombaniri be, adrou jurunirini azani kolerisi; eri nga diza ere ’ba dria eri a’ipi ’diyi dri. Eri nga fe yi ma adri opiru ’ba kakau ma drilia, eri nga angu awa ajesi.

⁴⁰Te ewu asizaniria opi kala uruleruari nga omba ’ba eri be; opi kala andraleruari nga enga eri ma ruaa ekile adroupalirile, gari ombani ’diyi pisi, ’ba nzupi akanyasi ’diyi pie, oguru kakau ’diyi pie; eri nga fi angu ndu ndu ma alia, eri nga i ere ekile yi tizani i ajalerile, eri nga aga angu nde ma eseliasi,

⁴¹Eri nga fi angu diza beria. Eri nga kakau ogu va, te ’ba ’diyi nga yi opa eri ma dria ra: Edomu pi, Moabu pie, ’ba ’wara anzi Amonini ma eselia ’diyi be.

⁴²Eri nga i ma dri eju angu ndu ndu ’diyi ma dria indi, azini angu Misirini ngani i pa ku.

⁴³Eri nga ovu okpo be lonyi meleru, azini dahaburu, azini afa azini dria Misiria aje ambosi ’diyi ma dria; ’ba Libuaa ’diyi pi yi nga eri pamvu bi, ’ba Etiopiaa ’diyi be.

⁴⁴Te e’yo kuza ngapi efupi etuni efurialeruri azini kala andraleruari be, nga eri dri asi otiza fe tu; eri nga fu muzu adra amborusi, ’ba dri jazu azini ’ba ofuzu teketeke kakau.

⁴⁵Eri nga jo ini opiniri ma hema aso miri pi ma eselia oni dizaru alatararuri be; te ti, eri nga ca o’du ini asizuri ma tia, te ’ba azini ngapi eri ma aza kopini yo.