Read lugbara Danieli 4 Bible Online

Danieli 4 - lugbara bible

Danieli 4

¹Ma’i opi Nebukadineza, ma waraga si emi dri, emi ’ba dria, suru pie, ’ba ti ndu ndu ’Yori ’diyi pie, emi ’ba ripi angu drisi dria ’diyi: asi anzuru ma ere i emi dria!

²Eri ovu onyiru ma milia eceta piyi tali be Mungu ovupi Uru Turini ’yele ma ruaa ’diyi ecezu.

³Eceta erini amboru ’doni ya! Tali erini ’yele ’diyi yi okpo be ’doni ya! Suru erini eri suru i depi kuri, opi nyaza erini ovu a’bianzi vusi a’bianzi vusi ewule ewule.

⁴Ma’i Nebukadineza’i, mani ndra ava liria jo mania, mani ovuria ayikosi drilebaru jo mani opiniri ma alia,

⁵orobi obi ndra mani, fe ma dri uri tu; asisile mani drole gbolo mani driari pi afa ndreza i e’dapi ma driari fe ma asini oti oti.

⁶E’yo ’disi ma fe azita ’ba ondua be Babulonia ’diyi ofizu dria ma milia, yi ma eco ma dri orobi ma obipiri ma efi ecezu ani beni.

⁷’Dini ojou piyi ofi ma vu, ’ba e’yo ondripi ’diyi pie, ’ba Kalideyani pie, ’ba andri ndripi ’diyi pie; ma olu orobi ma obipiri yi dri ra, te yi eceni orobi ’di ma e’yo efi ma tia ku.

⁸Te vutinia Danieli nga efi ma vuni, runi azini Belitesaza’i adrou ma vileri ma ru vusi. Danieli nde ga tre orindi adrou alatararu ’diyinisi. Ma nga orobi ma e’yo olu eri tia kini,

⁹Mi Belitesaza’i, ambo ojou driliari la, mani nile orindi adrou alatararu ’diyini ovu mi aliarisi, azini e’yo ziza aluni ndeni mi ku, mi olu mani afa ndreza mani ndrele orobisiri, efini be indi fo!

¹⁰Afa ndreza i e’dapi ndra ma dria mani laria gbolo mani driari eri ’dini: ma ndre ’dini, te mi ne, pati oro ma eselia lagadua, oconiri amboru tu.

¹¹Pati nde zo ra, ovu okpo be tu, oconi ca kpere ’bua uru, eri endre kpere nyaku ma kalatini asizuria.

¹²Bini ndri tu, ’ya efi tu, alenia nyaka dri fupi ’ba dria driri. Anyapa asea ’diyi ola endrinia, aria ’bua ’diyi yi ori eri ma arakalaa, afa suruti dria rua ari be ’diyi yi eri nya’i.

¹³Ma ndre afa ndreza ma drini egale ndra gbolo mani driari ma alia, te mi ne, ’ba ’ba ondrepiri, ’ba alatararuri, esi va engazu ’bua.

¹⁴Oyu e’yo o’duko urusi ’dini kini, Emi ga pati ’diri va, emi opi arakalani indi, emi oya bini ra, emi ma ere efini indi; anyapa ma mu di etiniarisi, aria ma nga arakalaniasi ra.

¹⁵Te ti pati duluti ola beri emi ma ku nyakua, iribi o’diru aseari ma eselia, eri ma ovu ombezaru aya pisi mola be. Eri ma ovu yiru andrali ’buarini ’yale ruaniarisi; esele erini ma ovu anyapa be tualu ase nyakuari ma talaa;

¹⁶asi erini ma oja i ekile ovuzu ’ba ada ma asile ku, te ma fe eri dri asi anyapa vileri’i; ewu ma aga eri ma dria pale aziri.

¹⁷E’yo liza ’diri enga azita ’ba ’ba ndrepi ’diyinisi, e’yo edeza ’diri enga ’ba alatararu ’diyi ma e’yo ’yozasi, ’ba idriru ’diyi ma ni ani Mungu ovupi Uru Turi eri opi nya suru ’bani ma eselia, te eri opi nyaza fe ’ba alu alu erini lele fele driniari dri, azini eri ’ba soroa tokori ’ba suru nde ma drilia’i.

¹⁸Ma’i, opi Nebukadineza, orobi ’diri obi ma’i. Te mi’i Belitesaza la, mi olu mani efini mi’i fo! A’disiku ’ba ondua be suru mani ma alia ’diyi dria econi efini ecezaru ma dri aluni ku, te mi’i, mi eco ra, a’disiku orindi adrou alatararu ’diyiniri ovu mi alia ci.

¹⁹Etu ndesi Danieli, runi azinini ovuzu Belitesaza’iri, eri osu i asia etu fudri ci, asisile erini fe eri dri asi otiza tu. Opi ’yo e’yo tinia kini, Belitesaza, orobi ma fe mi dri asi osuza ’dini ku, kani efini ti ma fe mi dri asi osuza ku. Belitesaza omvi e’yo kini, Opi mani la, orobi ’di ovu ’ba mi ngupi onzi ’diyini, azini efini juru mi vile ’diyi dri indi.

²⁰Pati nde mini ndrele zopi ovupi okpo be tu, oconirini cazu kpere ’buari, pati nde endre wudrikuru drisi dria;

²¹biniri ndrizaru, efini ’ya tu, azini nyaka aleniari fudri ’ba dri dria ra; anyapa asea ’diyi ovu etinia, azini aria ’bua ’diyi ori arakalaniari:

²²opi la, eri mi’i, mi mba curu’do ’bo, azini mi ofu curu’do Okpofu ’bo. Ambo miniri zo ’bo, ca kpere ’bua uru, azini opi nyaza mini ovu kpere nyaku ma kalatini asizuria.

²³Te e’yo opini ’ba ondrepiri, ’ba alatararu engapi ’bua esipi vari ndrezurisi, ’ba nde ’yo kini, Mi ga pati ’diri va, mi ja drini ra, te pati duluti ola beri mi ma ku nyaku alia, iribi o’diru aseari ma eselia, eri ma ovu ombezaru aya pisi mola be, azini eri ma ovu yiru andrali ’buarini ’yale ruaniarisi; esele erini ma ovu anyapa asea ’diyi be tualu, cazu kpere ewuni agaria drinia paleko aziri;

²⁴efiniri ’dini, opi la: ’Diri azita Mungu ovupi Uru Turini, ecapi opi mani inzileri ma ruaari,

²⁵kini ’ba nga mi dro ’ba eseliarisi ra, pari mini ladrizuri nga ovu anyapa asea ’diyi ’be tualu; azini yi nga mi fe iribi nyazu tini nyalerile, mi ruari nga ovu yiru andrali ’buarini ’yale ruaniarisi, cazu kpere ewuni agaria mi dria pale aziri, de nga mini ngaria Mungu ovupi Uru Turi ma e’yo varia, kini eri opi nya suru ’baliarii ma eseliani, azini eri opi nyaza fe ’ba alu alu erini lele fele driniari dri.

²⁶Azini yini e’yoni azizu ma ku pati duluti ola beri nyakua ci ’dani ’ diri, kini suru miniri nga pa so mi dri kirikiri, mi ka nga va ra kini ’buni opi nyaniria,

²⁷Opi la, e’yo ’disi e’yo edeza mani ma ovu a’izaru mi milia fo! Mi ku e’yo onzi mini ja e’yo onyiruri ’yezu’i, mi ku ’yeta mini ovupi alatararu ku ’diyi ja alio ma aza kozu yikisi’i; kani ’dini asi anzuru mini nga i ere drile ani.

²⁸E’yo ’diyi dria nga eca opi Nebukadineza ma ruaa ra.

²⁹Mba mudri drini iri ka nga aga ’bo eri de ndra aci jo ini opini Babuloniaria.

³⁰Opi ’yo ra kini, ’Diri ovuni Babuloni amborurini, mani sile aku amboru opini ovuzu aleniariru ma vile okpo amborurisi, diza ambo mani ecezuri’i ku ya?

³¹E’yo ’dirini ndra nga ovuria opi ma tilia, coti o’duko ibi enga ’bua esi va, Mi’i opi Nebukadineza la, e’yo ’diri ovu ’yozaru mi tia: Opi nyaza ku mi ’bo,

³²te ’ba nga mi dro ’ba eseliarisi ra, azini pari mini adrizuri nga ovu anyapa asea ’diyi be tualu; yi nga mi fe iribi nyazu tini nyalerile; de nga ewu agani mi dria pale aziri ku, cazu kpere mini ngaria varia kini Mungu ovupi Uru Turi opi nya suru ’bani ma eseliani, te eri opi nyaza fe ’ba alu alu erini lele fele driniari dri.

³³Etu ’dasi e’yo ’di ’ye i Nebukadineza ma ruaa ra i Yi dro eri ’ba ma eseliarisi ra, eri ase tile, eri ma ruaa andrali ’buari ’yani, cazu ’bikoni duria ruania ekile olonolono ma ’bikole, onyofinini viria ekile aria ma onyo file indi.

³⁴O’du ’diyi ka yi de ’bo, ma’i Nebukadineza, ma enga ma mile uru luzu ’bua, asisile mani e’yo vazaniri emvi ma vu ra, ma fe awa’difo Mungu ovupi Uru Turi dri, ma inzi eri ma ru, ma fe diza Mungu ovupi idriru ewu vusi ewu vusiri dri; a’disiku opi nyaza erini eri opi nyaza i depi kuri, azini suru erini ovu a’bianzi vusi ewule ewule;

³⁵’ba ovupi nyakua ’diyi dria yi ovu eri milia ekile afa tokole; eri ’ye ini lelerile asikari ongulimuru ’bua diyi ma eselia azini ba ripi nyakua diyi vu indi; ’ba aluni yo eri ma dri ogapiri kani ’yopi tinia kini, Mi a’di ’ye ya?-ni yo.

³⁶Etu nde ’dasi asisile mani e’yo vazaniri emvi dika ma vu; azini suru mani amboru ma diza ma e’yosi, inzita mani pi diza mani dipi ndri ndriri be yi emvi ma vu dika, ’Ba ’wara mani e’yo amapi ’diyi pie, Opi mani ’diyi be, yi ma ndru ndru; ’ba ma okporu suru mani ma drilia ada, ovuzu opiru, ere vini ambo kakani onyiru turi ma ruaa,

³⁷’Dini ma’i Nebukadineza, ma inzi eri, ma edu eri ma ru, ma fe diza Opi Ambo ’buari dri; a’disiku azi erini ’diyi dria adaru, geri eriniri dria e’yo liza kililiruri be; eri eco ’ba dria acipi egana be eri ma miliarisi ’bazaru va.