Read lugbara Danieli 5 Bible Online

Danieli 5 - lugbara bible

Danieli 5

¹Opi Belisaza ’ba omu amboru opi azini eri vutia alifu alu ’diyi dri, mvu patiefi ma su ’ba alifu alu nde ’divi ma milia.

²Belisazani ovuria patiefi ma su ma aji o’biria, eri azi kini ma eji i dri afazu meleru piyi afazu dahaburu Nebukadineza i atini ndra wule hekalu Yerusalemuaria ’diyi; opi amboruri pi, opi eri ma vutia ’diyi pie, oku eri vile ’diyi pie, oku erini ati’baru ’diyi pie, ma mvu patisu afazu nde ’diyisi beni.

³’Dini ’ba eji afazu meleru ndra ejile engazu hekalua, jo Munguni Yerusale-: muari ma alia ’diyi; opi amboruri, opi eri vutia ’diyi pie, oku erini ’diyi pie, oku erini ati’baru ’diyi pie, yi mvu di patiefi ma su afazu nde ’diyisi ra.

⁴Yi mvu patiefi su ra, yi inzi di adrou yini sile melesi ’diyi, dahabusi ’diyi pie, sile molasi ’diyi pie, ayasi ’diyi pie, patisi ’diyi pie, edele onisi ’diyi be.

⁵Etu nde ’dasi coti afa azini e’da li ekile ’ba ma drianzile, si afa azini ivi abi ruaari ma dria tala ma drilialeru jo opi vileri ma alia; te opi Indre dri drileni e’yo siria.

⁶’Dini opi ma mile ofu e’yonisi ofu ofu, erini asisile droria asi erini oti oti; cimbi opiletiari aka teketeke ra, kumutiniri ya ya, ri yi co agyi be co co.

⁷Opi oyu o’duko urusi, ma ofi ’ba e’yo ondripi ’diyi pi joa, ’ba ,Kalideyani pie, ’ba andri ndripi ’diyi be. Opi ’yo ’ba ondua be Babulonia ’diyi ma tia kini, ’Ba ’ngoni ngori ti e’yo siza ’diri lapi ma tia, efini ecepi ma dri indiri, yi nga eri osu bongo okalakokalarisi, eri nga nyoro meleru su i ma ombelia, nga ovu opi nariru suru ’diri ma alia.

⁸’Ba ondua be ’diyi nga di efi dria ra, te yi econi e’yo siza ’diri lazaru ku, econi vini efini ecezaru opi dri ’dinini ku indi.

⁹Opi Belisaza osu e’yo ’diri asi otizasi tu, mileni nga ofu ofu; azini opi eri ma vutia ’diyi aba tu.

¹⁰Te oku opi vileri jo omu nyazuria e’yo opi pini ’yole opi eri vutia ’diyi berisi; oku opi vileri nga ’yo kini, Opi la, mi rua ma adri ala ewule ewule! Asi mini ma oti ’dini mini asisile drolerisi ’dini ku, mi mile ma ofu i ’dini ku fo.

¹¹Agu lazini indi suri mini ma alia ovupi adrou alatararu ’diyi ma orindi beri. Eli ndra mi ati vilerisi, yi isu eri alia diza pi, e’yo vaza pie, ondua ekile ondua adrounirileri be, azini opi Nebukadineza mi ati, ma ’yo, opi mi ati nde oja ndra erini ovuzu ambo ’ba ojouru ’diyi pi ma driliariru, ’ba e’yo ondripi ’diyi pie, ’ba Kalideyani pie, ’ba andri ndripi ’diyi be,

¹²a’disiku yi isu orindi onyiru turi ovu ndra Danieli nde ’diri, opini Iruni ’dale Belitesaza’iri ma alia, e’yo iniza pie, e’yo vaza pie, azini eri olu ndra orobi ma efi ra, eri ece ndra e’yo ovupi zizaru ’diyi ra, eri ece e’yo ’bani vale kuri kililiru. ’Dinile, onyiruli ma omve Danieli’i, eri nga e’yo ’di ma efi ece ra.

¹³Etu ’dasi nga di Danielini ofi opi vu. Opi ’yo Danieli tia kini, Mi Danieli’i ya? ovupi Yuda ma anzi ati’baru, opi ma atini ejile engazu Yudaa ’diyi ma eseliari ya?

¹⁴Ma eri e’yo mini ra, kini orindi adrou ’diyiniri mi alia ci, azini yi isu mi alia diza pi, e’yo vaza pie, ondua onyiruri be.

¹⁵Te yi ofi te ’ba ondua be ’diyi ma milia ’bo, ’ba e’yo ondripi ’diyi be, yi ma la e’yo siza ’diri, ma olu efiniri ma dri indi; te yi econi e’yo ’di ma efi ecezaru ku.

¹⁶Te ma eri e’yo mini ’bo, kini mi eco orobi ma eti oluzaru ra, azini e’yo ’bani ecole vale kuri mi yi ece kililiru. ’Dini ’yeke mi ka eco e’yo siza ’diri lazaru ra, azini efini ecezaro indi, yi nga mi osu afa suza okalakokalarisi, yi nga vu mi ombelia nyoro meleruri su’i, azini mi nga ovu opi nariru suru ’diri ma alia.

¹⁷’Dini Danieli nga e’yo omvi ’yo opi ma tia ’dia kini, Afa feza mini ma adri, azini andeso mini ’yoleri mi fe ’ba azini dri; te di ma nga opi dri e’yo sizaruri la ra, ma nga efini ece eri dri indi.

¹⁸Mi opi la, Mungu ovupi Uru Turi fe Nebukadineza mi ati dri opi nyaza pi, amboni pie, dizani pie, inzita opiniri pie;

¹⁹te okpo Munguni fele eri dririni ovule amboru turisi, fe ’ba dria, suru dria pie, ’ba ti ndu ndu ’yopi ’diyi pie, yi dria ya ya, azini yi ovu urisi eri milia; eri adri ’ba ofu ofu erini lelerile, eri adri vini ’ba erini lele ma adri idriru ’diyi ma ta mba; eri adri ’ba enga uru erini lelerile, eri adri vini ’ba azini ’ba va tokoru erini lelerile indi.

²⁰Te asi erini ka i ’ba amboru azini orindini ka mba tu, ’dini eri ’ye e’yo eganasi ani, e’yo ’disi nga eri nze oguna opiniri ma driasi ra, ’du diza eriniri ra;

²¹dro eri anzi ’bani ma eseliasi ra, asi erini ofu ekile anyapa ma asile, eri adri ovu akanya asea ’diyi ma eselia; fe eri ma nya ase moniole, rua erini ovu di yiru andrali ’buarini ’yale ruaniarisi, cazu kpere erini niria kini Mungu ovupi Uru Turi ce suru ’bani ma driniria, azini eri ’ba ’ba suru nde ma drilia erini lelerile.

²²Mi’i Belisaza, mi eri ma mva la, mi ’bani mi asi afu kokoru ku, mini afa ’diyi dria nile rari ti,

²³te mi enga mi ceni mi drisi Opi ’buari ma ruaa; te ’ba eji afa eri vile joa ’diyi mi milia, ’dini mi ngulupi pi, opi mi vutia ’diyi pie, oku mi vile ’diyi pie, oku mini ati’baru ’diyi pie, emi mvu patisu afazu ’diyisi; emi inzi adrou emini dahaburu azini meleru ’diyi pie, molaru ’diyi pie, ayaru ’diyi pie, patiru ’diyi pie, oniru ’diyi pie ra; adrou ’diyi ndreni mesi ku, erini e’yo ku, vani vini e’yo ku indi, te Mungu ovupi ava mini be eri ma dria, azini leti mini dria yi eriniri’i, mi feni diza eri dri ku.

²⁴E’yo ’disi pe dri drile nderi ma ti engazu eri miliarisi ra, azini e’yo siza nga di i si ani ’di.

²⁵E’yo siza nde ’diyi ’di’i: MENE, MENE, TEKELI, UFARISINI.

²⁶E’yo nderi ma efi awa’di: MENE, Mungu a opi nyaza mini ma kalafe ’bo, azini fe eri ma asi ’dipi;

²⁷TEKELI, efini, o’bi mi afa o’bizasi ’bo, te nziza mini caliarii ku;

²⁸PERESI, efini, awa suru miniri ’bo, fe eri ’ba Mediaa ’diyi dri, ’ba Perisiaa ’diyi be.

²⁹Belisaza nga di e’yo azi, yi nga ani Danielini osu bongo okala- ’kokalarisi su nyoro meleru eri ma ombelia, oji e’yo erini kini eri ma ovu opi nariru suru nderi ma alia.

³⁰Ini ’darisi yi fu Belisaza opi Kalideyaa’diri.

³¹Dario Mediaururi nya suruni, de isu eli erini ca ekile kali azia drini iri.