Read lugbara Danieli 6 Bible Online

Danieli 6 - lugbara bible

Danieli 6

¹Dario mire i milia onyiru ma o’ba opi i vutia turu alu drini kali iri, yi nga ovu suru nderi ma alia dria.

²’Ba yi drilia ’ba ’wara na, ’ba na ’diyi ma eselia aluri Danieli’i; opi nde ’diyi dria ma ece e’yo dria yi dri, opi agapiri kazu drileonzi isuzu ku.

³Vutinia ’ba Danieli ’diri uru aga ’ba ’wara ecepi ’diyi, opi pie dria ra, a’disiku orindi onyiru turi eri ma alia ci; azini opi agapiri ega kini i eco eri ’bazu suru dria ma drilia.

⁴Ewu nderisi ’ba ’wara piyi ’ba opiru ’diyi be, nga di le’yo ecopi Danielini ndepi ’dini ’diyi ndru, ngapi eri ezapi opi nyaza ima aliari; te yi econi e’yo isuzaru eri ruaa asu suzu ku, kani ezata azini ’diyi pie dria, a’disiku eri ’ba adaru asi ’bapi e’yo driari; e’yo ’disi yi isuni ezata kani e’yo onzi emu aluni ku.

⁵Agupi ’diyi nga di ’yo yi ma eselia kini, Ama ngani e’yo azini agu Danieliru ’ diri ndepiri isu ku, pe lu ama ma nga geri isu azita Mungu eriniri ma e’yosi a’dule,

⁶’Ba ’wara ’diyi, opi opi amboru ma vuria ’diyi be, yi oku yi opi vu, yi ’yo eri ria ’dini kini, Opi Dario la, mi rua ma adri alaru ewule ewule!

⁷’Ba ’wara suru drilia ’diyi dria, ’ba ’ wakiliru ’diyi pie, opiyi pie, ’ba e’yo amapi ’diyi pie, ’ba angu nyapi ’diyi be, yi eci yi ma ti dria tualu e’yo edezu yi ma eselia, opi agapirini azita ’bazu, lezu e’yo aziza okpo be ’diniri azizu, kini, ’ba alu alu e’yo zipi adrou andini ma tiari, kani ’ba ma ria dria o’du kali na, pe alu ma zi mi’i ka opi la, ka’dini ku ma ’be eri kami ’bilea.

⁸Ka’dini opi la, mi ma azi e’yo ’ diri, mi ti mi dri e’yo siza ’diri ma dria ’ba kazu ojazu ku, ma ovu ekile azita ’ba Mediaa ’diyi pini ’ba Perisiaa ’diyi be indi, adripi i ojapi kurile.

⁹Dario opi nga di i ma dri ri e’yo siza ’di ma alia, e’yo aziza ’diri be.

¹⁰Te Danieli ka ni opi ti dri e’yo siza ’diri ma alia ’bo, fi jo i vileri ma alia, isu de derisa eri vile jo alizaniri ovu mgboru kala Yerusalemualeruria; eri osi kumuti etu vusi etu vusi pale na Mungu zizu azini awa’difo ’yozu Mungu eriniri ma milia, ekile erini adrile ’yele driorile.

¹¹Etu ’dasi ’ba ’diyi oku yi tualu ra, yi isu Danielini Mungu ziria azini matu ’baria Mungu ini ma milia.

¹²Ka’dini yi nga yi etru e’yo ’yozu opi ma milia azita nde opiniri ma e’yosi kini, Mi tini ndra mi dri azita alia ku ya, ’yozu ’ba dria alu alu e’yo zipi adrou andini ma tia, kani ’ba tia dria o’du kali na, pe alu ma zi mi’i kari, opi la, yi ngani eri ’be kami ’bilea’i ku ya? Opi omvi e’yo kini, E’yo ’diri e’yo adani, ekile aziza ’ba Mediaa ’diyi pini ’ba Perisiaa ’diyi be i ojapi kurile.

¹³Yi nga di e’yo omvi opi ma tia kini, Danieli ovupi anzi Yudani ’bani ejile ati’baru ’diyi ma eselia ’dari egani e’yo mini ku, opi la, kani azita ndra mini dri tile aleniari ku indi, te eri ini Mungu zi etu vusi etu vusi pale na na ’dani.

¹⁴’Dinile opi amboru ka e’yo ’diri eri ’bo, eri ovu ani candisi tu, te eri ’ba asi ini tezu Danielini pazu ra; eri o’bi okposi eri arizu cazu kpere etuni ’deria.

¹⁵’Dinile ’ba ’diyi oku yi opi amboru vu, ’yo opi tia kini, Mi ma ni nga e’yo ’diri, opi amboru la, eri ovu azita ’ba Mediaa ’diyi pini ’ba Perisiaa ’diyi beri, kini aziza kani azita azini opini dri tizu alenia ’bori, ’ba aluni ma oja ku.

¹⁶Opi amboru nga di e’yo azi, yi eji di Danielini ani eri ’bezu kami ’bilea, Te opi ’yo Danieli tia kini, Mungu mini mini azi ’yezu eri dri etuzuri eri nga mi pa ra,

¹⁷Yi cii oni amboru, yi ’ba eri kami ’bile tilia ci, opi ’ba i ma ngulupi ma eceta drinia eceta opi eri vile ’diyini be, ’dinile e’yo lile Danieli ma ruaari kazu i ojazu ku.

¹⁸Vutinia opi amboru nga mvi i vile joa, ini ’dasi dria ovu abirisi, ga nyaka nyako si, yi ejini vini o’di pie adrile cole owupi bilenia ’diyi milenia ku, azini o’du koza oga i eri dri si.

¹⁹Etu ’dasi opi amboru enga o’biti drio drio, ’ye mbele mbele muzu kami ’bilea.

²⁰Eri ka eca ’bile Danielini ’bezuri vu ogogo ’bo, eri oyu uru o’duko candirusi; opi amboru ’yo Danieli tia kini, Mi Danieli ati’bo Mungu idrirurini la! Mungu mini, mini adrizu azi ’yezu eri dri zuzuri, eri eco ra ya? Pa mi kami sia ra ya?

²¹Danieli nga di ’yo opi amboru ma tia kini, Opi amboru la, mi rua ma adri alaru ewule ewule!

²²Mungu mani epe malaika erini ma ti, emuzu kami tile obizu ci, e’yo ’disi yi econi ma ’yezaru onzi ku, a’disiku eri ma milia ma ovuni e’yo onzi be ku; te opi amboru la, mi ma milia indi ma ’yeni e’yo onzi ku.

²³Opi ovu ani ayikosi tu nde ra, nga azi kini ma enze Danielini kami ’bilearisi amve. ’Dini yi nga di Danielini enze kami ’bilearisi amve ra, yi isuni bile eri ma ruaa aluni ku, a’disiku ’ba ndra i asi a’itasi Mungu ini ma dria.

²⁴Te opi azi e’yoni, yi eji ani ’ba asu supi Danieli ma ruaa ’diyi, yi o’be yi kami ’bileayi’i, anzi yini pie, oku yini pie, o’be yi kami ’bilea; kami aga yi, oci yi geri ’buasi, oci yi ma falako murumuru, de yi cani nga va ’bile ma etia aluni ku.

²⁵Opi Dario nga di waraga si ’ba dria angu drisi dria ’diyi vu, suru pie, ’ba ti ndu ndu ’yopi ’diyi pie, kini: Asi anzuru ma ere i emi dria dria.

²⁶Ma ’ba azita kini angu mani opi nyazuri ma alia dria, ’ba ma rua ma ya ya, azini yi ma ovu urisi Mungu Danieli vileri ma milia, a’disiku eri Mungu idriruri’i, eri ovu ojakokoru eli vusi eli vusi; suru eriniri ngani dri ja ku, azini opi nyaza eriniri nga ca kpere anguni ti asiria.

²⁷Eri ’ba ari ra, eri ’ba pa ra, eri eceta ’ye tu tali pie ’bua kpere nyakua indi; eri pa Danielini okpo kamini ma aliasi ra.

²⁸’Dini Danieli ’diri isu drileba eli Darioni angu nyazurisi, azini Kuro opi Perisiaarini angu nyazurisi indi.