Read lugbara Danieli 8 Bible Online

Danieli 8 - lugbara bible

Danieli 8

¹Eli na opi Belisazani angu nyazurisi, afa ndreza ece i ma vu, ma Danieli’i, ece i ma vu ra afa yi ecepi ma vu oko ’diyi ma vutia.

²Ma ndre afa ndreza nde i ecepi ma vuri ma alia ’dini; isu de e’yoni ovu ’dinile, etu mani ndrezurisi, isu de ma ovu Susani jo opini ovupi angu Elamuari ma alia; te ma ndre afa ndreza nde i ecepi ma vuri ma alia ra, ma isu ma ovu yi ara Ulai ma tia.

³Ma nga asi ma mile enga, ma lu, azini mi ne, kabiloago ovupi 0’yo be iriri so pa yi ara ma kalaa. O’yuni iri ’diyi izuru, te o’yu aluri nde aziniri zozasi ra, o’yu agapi ’diri engapi vileri’i.

⁴Ma ndre kabiloago ’di erini i agyi osiria etu ’devuleru, azini andraleru, azini angu uruleruria; ’dini anyapa azini econi pa sozaru milenia ku, de te isu ’ba azini ecopi ’ba papi eri ma driani yo; te eri ’ye ekile erini lelerile, ’ba i amboru.

⁵Mani e’yoni egaria ’dini, mi ndre, ndriago efu kala etuni ’derialeruria, emu aga nyaku drisi geri urusi dria, te awuni vini nyaku dri elo ku; azini ndri ’di ovu o’yu be garuru eri ma andreti ma eselia.

⁶Eri emu kabiloago te o’yu be iri te mani ndrele pa soria yi ara tia ’diri vu, enzu vunia okposi aokoni eri nyalerisi.

⁷Ma ndre etru i kabiloago nde vu ogogo, ovu adrasi leri vu, osi kabiloago ’diri ra, onyo vini o’yuni iri ’diyi ra; ’dinile kabiloago ’di ma okpo pa sozu milenia yo, te eri a’be eri va nyakua, otu eri pasi; de ’ba ecopi kabiloago ’di papi eri ma driarisini yo.

⁸Ndriago ’diri ’ba vini i amboru tu; te de erini ovuria okpo beria, o’yu garuri nga di i nyo ra, te parinia azini enga vini dika su, yi garuru, ofe dri oli su ’bua ’diyi vuleru.

⁹Te o’yu ’diyi ma aluri ma ruaa o’yu aziniri efu wereru tu, nga zo amboru tu nde ra, ofe dri kala urulerua, etuni efurialeru, azini angu ovupi diza beri vu indi.

¹⁰Nga ofu amboru, cazu kpere ongulumu ’bua ’diyi vu; o’be ongulumu azini ’diyi va nyakua ’bi’bio azini ’diyi be, nga yi otu pasi.

¹¹Awa’dini, eri inzi i ceni, ecazu kpere ambo ongulumu nde ’diyi ma driliari vu; eri nze eri dri afa veza vele etuzuri, ’be pari erini alatararuri va.

¹²Nga ongulumu fe eri dri tualu afa veza vele etuzuri be ezata Ina e’yosi; nga e’yo adari ’be va nyakua, nga e’yo ’ye ekile i ma ngulupini lelerile, nga drileba isu ra.

¹³Ma eri ’ba alatararu aluni e’yo ’yoria; azini ’ba alatararu ma azi ’yo agu te e’yo ’yopiri ma tia kini, Afa ndreza i ecepi afa veza vele etuzu pisiri nga ca kpere o’du ngopi ya, ezata dri jazuri pie, pari alatararuri fezu ongulumu be ’ba dri yini eri tuzu pasiri pie dria?

¹⁴’Yo ma tia kini, Cazu kpere ondre piyi alifu iri drini turu na, o’biti yini be; vutinia ’yi nga pari alatararuri ede alaru dika ndo.

¹⁵Eri nga di eca ’dini, ma’i Danieli, mani deria afa ndreza ’di ndreria ’boria, ma o’bi efini ndru e’yoni vazu, te mi ndre, ’ba azini so pa ma milia si i ekile wura be ’bale.

¹⁶Ma eri o’duko ekile ’ba o’dukole yi ara Ulai ma kuti ma eselia, eri oyu uru kini, Gabiraeli la! mi fe agu ’diri ma va afa ndreza erini ndreleri ma efi.

¹⁷’Dini eri etru di i ogogo pari te mani pa sozuria; ka eca ’bo ma ru tu, ma eco ma va o’bukuru. Te eri ’yo ma tia kiui, Mvi ’bani la, mi va e’yoni; afa ndreza ’diri eri eceta o’du asizuri ecepiri’i.

¹⁸Te erini e’yo ’yoria ma be, o’du ’be ma dii mani laria o’bukuru mile suria va nyakua; te eri elo ma ’Irua, enga ma uru.

¹⁹Eri ’yo ra kini, Mi ndre, ma nga fe mi ma ni e’yo ngapi ecapi ewu aokoni ’yezu asizurisi ’diyi; a’disiku eceta nderi o’du pele e’yoni asizuri ma e’yo ece.

²⁰Kabiloago te mini ndrele o’yu be iriri, yi opi Mediaari pi Perisiaari be.

²¹Ndriago ’yepi okposiri eri opi Giriki vileri’i; azuu o’yu garu amboru ovupi eri ma andretiari eri opi okori’i,

²²Azini o’yu i nyopi, ’di o’yu su ’diyini engazu pariniari, suru su nga efu suru nde ma alia, te yi ngani pa so okporu erile ku.

²³Te ewu opi nyaza yinirini ’yezu asizurisi, ’ba ezata ezapi ’diyi ka eza tre ’bo, opi mile be adraru e’yo zizaru vapi rari nga pa soni.

²⁴Okponiri nga ovu tu nde ra te ovuni okpo eri ma ngulupinisi ku; eri nga ’ba dri ja osutaru, nga drileba isu tu, nga ’ye ini lelerile; eri nga ’ba okpo be ’diyi dri ja ra, suru ’ba alatararu ’diyini be.

²⁵E’yo edeza erinisi eri nga fe lokiri ma ezu i ma dria, eri nga i ipi i ma asia tu. Eri nga ’ba dri ja kakau o’du yini asizu e’yonisi kuria; eri nga vini pa so a’di ’dizu opi opiniri be; te eri nga i anyo ra, te dri ’bani nyoni erini ku.

²⁶Afa ndreza e’yo ondre piyini o’biti yini ’diyi be ’bani olule mi tiari eri e’yo adani; te mi ma opi afa ndreza ’diri ma ti, a’disiku eri o’du nga ziri ecapi ku ’diyini ma e’yo ece.

²⁷Te ma’i Danieli, ma rua oga i si, azo bi ma o’du fudri ci; ma nga di nga uru azi opini ngazu ndo; ma osu tu afa ndreza ’dirisi, te ’ba e’yo ’diri ma efi vapiri yo.