Read lugbara Danieli 9 Bible Online

Danieli 9 - lugbara bible

Danieli 9

¹Eli oko Dario Ahasuero mvini opi nyazurisi, eri ’ba Mediaa ’diyi ma ori, ’bani ’bale opiru suru Kalideyani nyazuri-

²eli oko nde erini opi nyazurisi, ma’i Danieli, buku ece ma dri kalafe elini e’yo Yehovanirini ndra ecazu nabi Yeremia vu e’yonisiri, dri jaza Yerusalemuni dezu, ada eli kali aziri.

³Ma ’ba ma mile Opi Mungu vu, e’yo zizu eri tia azini matu ’bazasi. Ma ’da nyaka ra, koliba suzu ma ruaa ofuta be.

⁴Ma ri Yehova Mungu maniri zi, ma e’da ezata ra, ma kini, Opi Mungui amboru ’bani rule turi la, mi adripi e’yo aziza ma ta mbapi ra, ovupi yiki aleru be ’ba mi lepi azini ’ba azita mini ta mbapi ’diyi vuri,

⁵ama eza ra, ama ’ye aka asi mbazasi, ama ye e’yo onzikanyaru, ama mbu mi ruaasi amve, ama; oja ama kalaa, ami ku aziza mini ’divi pi ja e’yo liza mini ’diyi be;

⁶ama erini vini ati’ba mini nabiru ’diyi ma e’yo ku, yi’i adripi ndra e’yo olupi mi rusi opi ama vile, ’diyi pi ma tia opianzi amani ’diyi: pie, ama a’bipi pie, ’ba dria ovupi: angu ’doria ’diyi pie dria.

⁷Opi la, mi mini alatararu, te ama amani mile be drinzaru ’diyi, ekile andrurile; ama’i ’ba ovupi Yudaa ’diyi pi ’ba ripi Yerusalemua ’diyi pie, ’ba Israelini dria ovupi ogogo ’diyi, kani ripi ziri, pari dri dria mini yi drozu aleniaria ’diyi be, yini e’yo onzi ’yele mi vurisi.

⁸Opi la, drinzani ama mile fuzuri e’yoni amani, opi amani pi, opianzi pie, ama a’bipi pie, a’disiku ama eza mi vu ra.

⁹Opi Mungu amaniri eri yiki amboru be, eri e’yo onzi wu tu; amani mbule eri ma ruaa amverisi ti,

¹⁰’dini ama inzini vini Yehova Mungu amaniri ma o’duko ku, acizu azita erini, erini ’bale ama milia ati’ba erini nabiru ’diyi ma tiarisi ’diyi ma alia ku.

¹¹Awa’dini Israeli dria eza mi ma azita ’bo, yi oja yi kalaa, ga o’duko mini inziko si. Atri pi oyo ovupi sizaru azita Musani ati’bo Munguni ma aliari be ’diyi osu yi ama dria ani ’di, a’disiku ama eza eri vu ra.

¹²Azini eri fe e’yo erini ’yole ama ruaa azini ’ba e’yo amani lipi ’diyi ma ruaari ma ’ye ira, eri eji ani e’yo onzi amboru ’dori ama ruaa; a’disiku ’bu ma etia dria afa ’yeni nga i ekile erini i ’yele Yerusalemu ma ruaarile ku.

¹³Ekile erini ovule sizaru azita Musani ma aliarile, ’dinile e’yo onzi ’diyi dria nga eca ani ama ruaa ’di, te ama ’bani nga matu asi ndriza zizu Yehova Mungu amaniri ma tia, amani ’yeta amani onzikanyaru ’diyi kuria, azini ovuria e’yo amaza be e’yo ada mini ma alia ’dinini nga ku.

¹⁴E’yo ’disi Yehova mba candi amboru ’diri ma ta ngonde, nga ani eri eji ama dria ’do; a’disiku Yehova Mungu amaniri ovu kililiru ’yeta erini ’yele ’diyi ma alia dria, te ama’i, ama inzini nga eri ma ti ku.

¹⁵Te curu’do, Opi Mungu amaniri la, mi suru mini ofupi Misiriasi dri okporusiri, mi isu ru kuza kpere andru ’donile ya! Te ama eza ra, ama ’ye onzi.

¹⁶Opi la, ’yeta mini kililiru ’diyi dria vusi, mi fe la oko miniri adra miniri be ma oja nga i aku mini Yerusalemu oni mini alatararuri ma ruaarisi fo! A’disiku ezata amani ’diyi ma e’yosi, azini e’yo onzi ama a’bipinisi, Yerusalemu pi ofu di o’dataru ’ba mini be, ’ba dria ama acepi kuru ’diyi dri.

¹⁷Te di Mungu amaniri la, mi eri ati’bo miniri ma zita, matu ’baza erini be fo, azini Opi ma e’yosi mi ’ba nga mile mini dizaru pari mini alatararu yini ezale ’bori vu.

¹⁸Mungu mani la, mi ’ba nga mi bile, mi eri nga; mi zi mi mile, mi lu dri jaza ’bani ama dri jazu, aku amboru mi ru e’dapiri beri; a’disiku ama ejini matu ’baza amani mi vu onyi amani ma e’yosi ku, pe alu yiki mini amboru turisi.

¹⁹Opi la, mi eri ama; Opi la, mi wu e’yo onzi amani; Opi la, mi eri, mi ’ye; mi ci dri ku fo,mi ma e’yosi a’dule, Mungu mani la, a’disiku aku miniri azini ’ba mini ’diyi yi mi ru e’da’i fo!

²⁰’Dini ndra mani e’yo ’yoria, azini mani ziria, mani ezata ma ngulupini e’daria suru mani Israelini ’diyi be, mani matu ’baza mani ejiria Yehova Mungu mani ma milia, oni alatararu Mungu maniri vilerisi;

²¹awa’dini mani ndra e’yo ’yoria ziza mani ma alia, agu Gabiraeli mani ndrele afa ndreza mani ma alia oko ’dasiri, esa ma vu mbele mbele, elo ma rua etu ’bani awa’difo ondre beri vezurisi.

²²Eri imba ma ra, ’yo e’yo ma be, kini, Danieli la, ma efu curu’do mi ’bazu onduaru e’yo vazasi.

²³Mini te e’dozu ma ’bazu ’darisi, azita efu ra, ma emu ani e’yoni oluzu mi dri ’do, a’disiku mi ’ba lele turi’i; e’yo ’disi mi ega di nga e’yo ’diri, mi ma va afa ndreza nde i ecepi mi driri.

²⁴Azi sabato kali aziri ’ba mini ma dria azini aku mini alatararuri ma dria indi, ezata ma ti asizu, ezata dezu indi, azini e’yo onzi edezu e’yo kililiru ngapi i depi kuri ofizu parinia, eceta ’bazu afa ndreza yi ecepi ’diyi ma ruaa e’yo nabini ’yole ’diyi be, azini odu osuzu pari, alatararu turi ma dria.

²⁵Awa’dini mi ma ni ani, mi ma va adaru kini; engazu o’du ndra azitani efuzuni Yerusalemuni edezu eri sizu dikaria, ecazu kpere agu ’bani odu osuzu driniari vu, eri opimvani, sabatoni nga ovu aziri, azini sabatoni nga vini ovu kali azia drini iri, yi nga eri si dika, gboko ofaza amboru pi, yi geri be, ka adri etu candinisi ti.

²⁶Ka’dini sabato kali azia drini iri ka yi de ’bo, yi nga agu ’bani odu osule driniari nze amve, eri ngani ovu afa azini be ku; ’ba opimva ngapi emupiri vile ’diyi nga aku alatararu ’di ma dri ja pari alatararu edeta edezuri be. Asizaniri nga ovu yi tizasi, cazu kpere asizaniria omba nga ovu indi; azi dri jaza ma e’yo ’bo.

²⁷Eri nga aziza okporu ojakokoru ’dinileri azi ’ba kakau be sabato alu; sabato ’diri ma eselia agadua eri nga fe afa veza pi ma asi ra, afa fele Mungu driri be; azini ’ba alu angu dri japiri nga emu opile onzikanyaru ma dria, te adrani nga i osu ’ba dri japi ’diri ma dria, ecazu kpere asiza azileria.