Read lugbara Hosea 1 Bible Online

Hosea 1 - lugbara bible

Hosea 1

¹E’yo Yehovani ecapi Hosea Beeri mvi vuri o’du Uzia pinisi, Yotamu pie, Ahazi pie, Hezekia pie, yi opi Yudani, azini o’du Yeroboamu Yoasi mvi, opi Israelinirinisi indi.

²Etu Yehovani e’yo oluzu okorisi geri Hosea ma tiarisi, Yehova ’yo Hosea tia ’dini, Mi mu oku ali o’bapiri bi, alianzi tizu, a’disiku angu ’doria ’ba yi ali o’ba tu, ’ba ndeni Yehovani kulerisi.

³Eri nga di mu Gomeri Dibilaimu ma zini bi’i; oku nde nga mva isu i ma alia ra, eri nga mva osi agupiani.

⁴Yehova nga ’yo Hosea tia, Mi ’da eri ma ru Yezireeli’i; te ace were ma nga ari Yezireelini ma aroti ofe ori’ba Yehuni ma ruaa, azini ma nga fe suru Israeliniri ma opi nyaza ma de ra.

⁵Eri nga eca ’dini o’du ’dasi, ma nga osu Israelini nyo e’buti Yezireeliaria ra.

⁶Eri nga mva isu i ma alia dika, eri osi zamvani. Te Yehova ’yo eri tia, Mi ’da eri ma ru Loruhama, mani ngale yiki ’bale suru Israelini vu dika, ma ma wu ezata yini ani kurisi.

⁷Te ma nga ovu yikisi suru Yudani vu, te ma nga yi pa Yehova Mungu yinirisi; ma ngani yi pa osusi, kani seisi, kani ombasi, kani akanyasi, kani ’ba nzupi akanya dria ’diyisi ku.

⁸Te Loruhama ka ba ti ku ’bo, andri nga mva isu i ma alia ra, eri osi agimvani,

⁹Azini Yehova ’yo ra, Mi ’da eri ma ru Loami’i, emini ovule suru mani kurisi, azini mani ngale ovule Mungu emini kurisi.

¹⁰Te ti, anzi Israelini ma kalafe nga ovu ekile cinya miri tiarile, ’bani ecole o’bile kani lale kurile; azini eri nga eca ’dini, pari mani ’yozu yi tia, Emi ovuni suru mani ku-ri ma alia, ma nga ’yo yi ria, Emi ovu anzi Mungu idriruni.

¹¹Azini yi nga anzi Yudani oku tualu anzi Israelini be, te yi ma ngulupi nga ’ba alu pe yi dri cezu azini yi nga enga angu nde ma aliasi ra, a’disiku o’du zireeliniri nga ovu o’du amboru tu.