Read lugbara Hosea 11 Bible Online

Hosea 11 - lugbara bible

Hosea 11

¹Israelini ndra ovuria mvaru, ma le ndra eri ra, azini ma omve mva mani engazu Misiria.

²Yini yi omvele rari ti, yi apa yisi drile drile; yi ede edeta Baali dri, yi eve obiese wura tokoni dri.

³Ma imba ndra Efiraimuni acizu ma’i, ma o’du yi ma wua; te yi nini kini ma ati yi rua ma’i, ’dinini ku.

⁴Ma ose ndra yi kali tetenisi, baka letanirisi, azini ma ovu ndra yi vu ekile ’ba kulumbu ma baka ayupi yi ma ombelearile; azini ma ’ba nyaka yi ma drilia ma’i.

⁵Yi ngani mvi angu Misiria dika ku, te ’ba Asuriani nga ovu opi yini, yini gale emvikokoru ma vu sirisi.

⁶Te seini nga e’de aku yini ma dria, azini eri nga pati katalaru yini ’diyi onyo ra, nga yi eza teketeke ra, e’yo yi ma ngulupini amale ’diyisi.

⁷’Ba mani ’ba yi asi ’dani asizu vile ma kuzu; ka tro yi omve Mungu ovupi ururi ti, ’ba aluni diza fepi eri drini yo.

⁸Ma nga mi ku ngoni ngoni ya, Efiraimu la! Ma nga mi ’be ngoni ngoni ya; Israeli la! Ma nga mi ’ba ekile Adimale ngoni ngoni ya! Ma nga mi ’ba Zeboimule ngoni ngoni ya! Asi mani oja i ma alia, asi ndriza ga ma asia tre curu’do.

⁹Ma ngani ’ye adra mani acirurisi ku, ma ngani dri atri Efiraimu ma dri jazu ku; a’disiku ma Mungu’i, ma ovuni ’bani ku, Mungu Alatararu ovupi emi eseliari, azini ma ngani fi aku ndea aokosi ku.

¹⁰Yi nga aci Yehova ma vutia, eri nga wu ekile kamile; te eri nga wu ra, azini anzi nga emu rua yaza be engazu woko etuni ’ derialeruria;

¹¹yi nga emu rua yaza be ekile ariale engazu Misiria, ekile a’balaule engazu angu Asuriaria; azini ma nga fe yi ma adri jo yini ma alia, Yehova ’yo ra.

¹²Efiraimu ace ma kuru inzosi, azini suru Israelini ace ma lokirisi; te Yuda adri nga opiru Mungu be, eri ovu ’ba adaru Mungu Alatararu be.