Read lugbara Hosea 12 Bible Online

Hosea 12 - lugbara bible

Hosea 12

¹Efiraimuni oli nya, eri oli engapi etuni efuriari ma vuti dro; etuzu eri inzo piyi ezu kakau dri jata be; yi ’ba aziza Asuria be, yi odu ji Misiria.

²Yehova ovu agata gazu Yuda be, azini eri nga panga fe Yakobo dri ekile geri erini ’diyile, ekile ’yeta erinile eri nga mileni omvi eri dri.

³ Eri bi adripi erini ma paedu opojo ma alia, azini eri ka zo okporu ’bo, eri ovu okporu Mungu be.

⁴Ada eri ovu okpo be malaika agazu, azini eri aga ra, eri wu, te eri ’ba matu eri vu indi. Eri isu eri Betelia, azini eri ’yo ndra ama be ’dale-

⁵Yehova, Mungu asikari ongulumuruniri, Yehova ovu ru erini egata fezu,

⁶E’yo ’disi mi oja mi Mungu mini vu, mi mba asi ndriza pi ma ta e’yo kililiruri be, azini mi te Mungu mini vu ’dani.

⁷’Ba afa ozipiri, afa o’biza lokirisiri be eri ma dria, eri le ’ba azini nyazu ogusi,

⁸Te Efiraimu ’yo ra, Ada, ma ofu ovu ’ba afa e’iru, ma isu mani lonyi ’bo; azi mani alia dria yi ngani e’yo onzi ovupi ezataruri isu ma alia ku.

⁹Te ma ovu Yehova Mungu mini engazu ewu mini efuzu angu Misiriarisi; ma nga mi ’ba dika ovuzu hema alia, ekile o’du omu inzitaruri ma aliarile.

¹⁰Ma ’yo indi ’ba nabiru tia ’bo; ma fe afa ndreza kakau ’bo, te ma o’be e’yo etisi, geri ’ba azi ngapi nabiru ’diyi vurisi.

¹¹Gileadi ovu e’yo onzi ya? Adaru yi ovu toko; yi monio li edeta edezu Giligalia; ada, pari edeta edezu yini ’diyi ovu ekile amu otrole nguluru amvu ma aliarile.

¹²(Yakobo apa ndra angu Aramua, Israeli nga azi oku e’yosi, oku e’yosi eri oce kabilo.)

¹³Yehova ofu ’ba Israelini Misiriasi amve geri na binisi, eri mba yi ma ta geri nabinisi indi.

¹⁴Efiraimu ’ye aka aoko aciru ejizu i ruaa; e’yo ’disi ’ba nga ari erini ku eri ma dria, azini Opi eriniri nga o’data erini omvi be eri dria.