Read lugbara Hosea 13 Bible Online

Hosea 13 - lugbara bible

Hosea 13

¹Efiraimu ka mira e’yo ’yo, ’ba yi ma rua ya ya; eri ’ba i amboru Israeli ma alia; te eri ka eza e’yo Baalinisi eri dra ra.

²Te curu’do yi eza di drile drile, azini yi ede yi dri wura toko dahabu yini akapi acisirisi, wura inzile inzi yini edele onduasi’diyi, yi dria alu alu onduou ma dripamvu’diyi. Yi ’yo yi tia yisi, kini, ’Ba lepi edeta edepi ’diyi ma inzi koja anzi ndruzasi!

³E’yo ’disi yi nga ovu ekile iriti o’bitisirile, ekile andrali afipi mbelerurile, ekile anyadrileko olirikoni drole akuma driasi amvelerile, ekile acika efupi pari acikani efuzuriarile.

⁴Te ma’i, ma Yehova Mungu mini engazu ewu mini efuzu angu Misiriarisi; emi ma ni Mungu azini ku, pe alu ma’i, a’disiku Mungu ’ba papiri azini aluni yo, kiri ma’i a’dule.

⁵Ma ni ndra emi angu roko driaria, pari yini ovuzu yoria;

⁶nyamuko yini vusi yi tra nyakasi ra, yi tra ra, te asi yini eca afuru; e’yo ’disi yi ma dri avi masi’bo.

⁷E’yo ’disi ma ovu yi dri ekile kamile, ma nga yi te geria o’dule.

⁸Ma nga dri fu yi be ekile nguru dubaru andriru ’bani anzini ’dule rarile, ma nga yi ma ale asi, ma nga yi oci kamile ’daa; nguruni nga yi asi ra.

⁹Dri jata mini ’di, Israeli la, mini omba ’bale ma be, ma’i mi aza kopiri berisi.

¹⁰Opi mini curu’do ngoa, erini mi pazu aku mini vusi ani ya? ’Ba e’yo mini lipi ’diyi ngoa, mini yi ma e’yo ’yole, Mi fe opi ma dri, ’ba ’ba dri cepi opiru ’diyi be ’diyi?

¹¹Ma fe ndra opi mi dri aoko mani ma alia, te ma nze eri adra manisi.

¹²Ombe e’yo onzi Efiraimuni ’bo, mba e’yo onzi erini ma ta ’bo.

¹³Rua suza oku mvaazoni e’dulerini eca ’bo; eri mva ondua kokoru; etu osizuri eca ’bo, eri ma te pari mvani efuzu opoasiria ku.

¹⁴Te ma nga yi onze nyadri ma okpo dria; ma nga yi onze dra ma alia. Dra la, mi azo ngoa ya? Nyadri la, ’ba dri jaza mini ngoa ya? Ma ngani ma asi oja vile ku.

¹⁵Ka tro eri efi ’ya tu adripi erini ma eselia, oli engapi woko etuni efuzuriari nga eca ra, ava Yehovani engapi angu didiaari nga enga ra; yi a’di erini nga nzu ra, pari erini yini egazuri nga wi ra; eri nga afazu ayikoru ma ayiko eza dria.

¹⁶Samariani nga panga a’i azi onzi inisi, erini Mungu ini ma ti erile kurisi; yi nga e’de sei ma sia, yi nga odekua yini ogba kai kai, yi nga oku yini ovupi oporovuru ’diyi ma ale osi.