Read lugbara Hosea 7 Bible Online

Hosea 7 - lugbara bible

Hosea 7

¹Ma ka nga suru mani ’bani ejile ati’baruri omvi dika ’boria, ma ka le Israelini ati ra, e’yo onzi Efiraimuni nga e’da ra, azini e’yo onzi Samariani indi; ’yini e’yo inzoru ’yelerisi, oguou fi joa, azini oguou yi okupi tualu ’diyi afa opa ayii.

²Te yi droni asisile yi ma asia ku kini ma ega e’yo onzi yini dria ’dinini ku. Curu’do ’yeta yi ma ngulupini ’diyi ace yi ageia kuru, yi ovu ma milia.

³Yi fe ayiko opi dri e’yo onzi yinisi, azini opianzi dri inzo liza yinisi.

⁴Yi dria ovu ’ba ali o’bapi ’diyi; yi ovu ekile atuluku ’ba mikate a’dipirinirile; eri ka mikate eti ’bo eri nga ku ad sozu ja de nga pini ku.

⁵O’du ambo opi amanirinisi, opianzi yi ati ewasi adru; eri eju dri ini ’ba eganaru ’diyi be.

⁶E’yo ’disi yi ede asi yini ekile atuluku acirule, yini ’ba teria ambasi; ’ba yini mikate a’dipiri ko o’du ini be rra; o’bitisi eri ve aci dipi dirile.

⁷Yi dria ovu adru atuluku acile, yi ’ba yi ma e’yo lipi ’diyi ove ra. Opi yini ’diyi o’de va dria ’bo; ’ba aluni yi ma eselia ma omvepini yo.

⁸Efiraimuni i osa suru azini be; Efiraimu ovu ekile mikate ’bani ojale kurile.

⁹’Ba jururu yi nya okpo erini, te eri nini ku; dribifu enga eri ma dria alu alu, te eri nini ku.

¹⁰Afu Israeliniri e’yo eti nza ezima milia; te ti, yi emvini Yehova Mungu yini vu ku, yi ndruni vini eri e’yo ’disi ku.

¹¹Efiraimu eri ovu ekile a’balau azazaru, e’yo vapi kurile; yi omve Misiri, mi mu Asuriaa.

¹²Yini muria, ma nga emba mani ’be yi ma dria; ma nga yi li va ekile aria ’buarile; ma nga panga fe yi dri, ekile ’ba ongulumuru yini ’diyini erile ’borile.

¹³Drileonzi yi dri, yini apale masi ’borisi! Dri jaza yi dri, a’disiku yi eza ma ra! Te ma ka le yi onze ti, yi ’yo e’yo inzoru ma ruaa.

¹⁴Yi wuni ma vu asi yinisi ku, te yi lulu oga gbolo yini dria; yi oku yi anya yini ma e’yosi ewa be, re yi mbu ma ruaasi amve.

¹⁵Ma ka ndra yi imba ma’i ti, ma ka ndra yi ma dri mba ma’i ti, yi e’yo onziniru otu maruaa ’dani.

¹⁶Yi emvi ra, te emvini Mungu ovupi Uru Turi vu ku; yi ovu ekile osu i trapi godorile; opianzi yini ’diyi nga e’de sei sia ti ad yinisi. E’yo ’diri nga ovu yi dri ajidimaru angu Misiria ra.