Read lugbara Hosea 8 Bible Online

Hosea 8 - lugbara bible

Hosea 8

¹Mi ’ba guka mi tia; eri nga emu ekile ajile omba ’bazu jo Munguni be, yini aziza mani ezalerisi, yini azita mani ezalerisi indi.

²Yi nga wu ma vu, Mungu amani, ama’i Israeli, ama ni mi ra,

³Israeli ’be afa ovupi onyiruri ra; ari’bani nga eri dro ra.

⁴Yi o’ba opiyi, te e’yo manisi ku. Yi o’ba opianzi, te ma nini e’yoni ku. Yi ede wura toko yini dahabu yinisi, mele yinisi indi, ’ba ma ja yi dri ani.

⁵Eri ’be kojamva miniri amve, Samaria la! Adra mani eri di yi ruaa. Yi nga eca alaru a’dungare ya?

⁶Te afa ’diri enga Israeli vu, onduou ede erini; te eri ovuni Munguni ku. Te ada, yi nga kojamva Samariani onyo nyingiriki.

⁷A’disiku yi ri olini, yi be oliriko lo’i. Anya pa sopi amvuani yo, afa i’diza erini ngani efi ’ya ku; te ka efi ka ra ti, ’ba jururu ’diyi nga yi okini.

⁸Oki Israeli yi ’bo; te curu’do yi ovu ’ba jururu ma eselia ekile afazu ayiko fepi kurile.

⁹A’disiku yi mu Asuriaa ’bo, ekile akanya asea alu ovupi a’dulerile; Efiraimu omve agupi i lepi ’diyi oyasi ra.

¹⁰Ada, yi ka ’ba omve suru eselia oyasi ti, curu’do ma nga yi oku. Azini yi e’do ovu were ’ba ’wara ’ba dri cepi ’diyi ma opini teri ’balerisi.

¹¹Te Efiraimuni pari edeta edezu ’diyi edele kakau ezata ezazurisi, pari nde edeta edezu ’diyi ca di eri ma ezataru.

¹²Ma ka e’yo ambo ambo azita manini ’diyi si eri dri alifu mudri ti, yi ovu eri milia ekile afa osutarule,

¹³Edeta yini edele ma dri ’diyisi, yi adri za ve, yi adri nya indi; te Yehova a’ini yi ku. Curu’do eri nga di e’yo onzi yini ega, eri nga yi andri e’yo onzi ndesi; te yi nga mvi Misiria ra.

¹⁴Israeli avi Mungu i ’Bapiri ma e’yo, si jo ambo ambo ’diyi; Yuda o’ba aku kali okporu be ageinia ’diyi kakau; te ma nga aci ti pe aku erini ’diyi ma dria, aci nde nga jo okporu erini nde ’diyi ve ra.