Read lugbara Yoeli 1 Bible Online

Yoeli 1 - lugbara bible

Yoeli 1

¹E’yo Munguni ecapi Yoeli Petueli mvi vuri:

²Emi eri e’yo ’diri, emi mbaza, emi co bile emini, emi ’ba ovupi angu ndea ’diyi dria! E’yo ’dirile ovu ewu eminisi, kani ewu emi a’bipinisi ya?

³Emi olu e’yo nderi emi anzipi tia, azini anzi emini ma olu e’yo nderi yi anzipi tia indi, yi anzipi ma olu vini yi anzi ma tia.

⁴Ma ombi kakawiani kule nyakokoruri ombi iniari nyani; te afa ombi iniarini kule nyakokoruri ombi kulumburu nyani; te afa ombi kulumburuni kule nyakokoru o’dova nyani.

⁵Emi oru, emi ’ba atipi ewasi ’diyi; emi ma owu; emi ga lulu, ’ba patiefi ma su mvupi ’diyiru dria, patiefi ma su aluzaruri ma e’yosi, a’disiku eri ku emi tile ndru.

⁶A’disiku juru etu angu mania ’bo, yi okporu lakokoru indi; siniri kami sile, eri ovu si lili be ekile kamiandri dririle.

⁷Eri eza pati raza zabibuni maniri ’bo, eri nye eliopati maniri ’bo; eri opi oguru’balani ra, gu eri va; arakalani ofu emveru.

⁸Mi ’ba imvo ekile aliria koliba supi i ruaarini imvo ’bale anziagosirile.

⁹Edeta anyafurani pi de yi jo Yehovaniarisi edeta ’mvuzaruri be Kuhani yi owu ovu, yi ’ba azi ngapi Yehova dri ’diyi.

¹⁰Amvu du ra, nyakuni owu ovu; a’disiku anya eza i ’bo, patiefi ma su nzu ra, oduni ’ye i de de.

¹¹Drinza ma bi emi, emi ’ba amvu ’yapi ’diyi la! Emi ’ba pati zabibuni edepi ’diyi, emi ga lulu nganu pisi anya azini be; a’disiku afa kapi nyakua ’diyi ja dri ra.

¹²Zabibu pati ’wi ra, elio pati onyu ra. Pomegranate pati pi onyu ’bo, itu pati pie, mala pati pie, pati dria angua ’diyi pie; ayiko de i ’ba anziyi ma eselia ’bo.

¹³Emi su koliba, emi ’ba imvo, emi kuhaniru ’diyi, emi ga lulu, emi ’ba pari edeta edezuri ma azi ’yepi ’diyi. Emi emu ola koliba be ini rra, emi ’ba azi ’yepi Mungu mani dri ’diyi, a’disiku edeta anyafurasiri pini ovule ogazaru edeta mvuzaruri pie jo Mungu eminirinia ’borisi.

¹⁴Emi ’ba o’du nyaka ’dazuri alaru, emi eku okuta inzizaruri. Emi oku mbaza piyi angu e’ipi be dria, yi ma mu jo Yehova Mungu eminirinia; emi owu Yehova vu.

¹⁵Ma ye O’du nderisi! A’disiku o’du Yehovani esi ogogo, azini eri eca ekile dri jazale, engazu Mungu Okpo be Turi vu.

¹⁶Nyaka deni i ama dri, amani ndrele indiru ku ya? Ayiko pi nyona be kuni jo Mungu amanirini ndru ku ya?

¹⁷Ori ma o’diti etia ma ma, ku ero mboloru; jo afa ta mbazu ’diyi asu yi va, te anya ’wi ra.

¹⁸Anyapa yi ono ono ’doni! Ti yi otropi tualu ’diyi aba bali yini ovule iribi kokorurisi; ada, kabilo ongulumuru ’diyi isu cocona tu.

¹⁹Opi la, ma owu mi vu. A’disiku aci ve iribi nyamuko rokoari ma driari ra, aciandre ve pati angua ’diyi dria.

²⁰Anyapa asea ’diyi yi tile ozi mi vu a’disiku yi ara nzu ra, azini aci ve iribi nyamuko rokoari ma driari ra.