Read lugbara Yoeli 3 Bible Online

Yoeli 3 - lugbara bible

Yoeli 3

¹A’disiku mi ndre, o’du ’dayisi azini ewu ’darisi, ma ka nga e’yo Yuda pini ovuzu ati’baro Yerusalemu beri omvi,

²ma nga suru dria oku, ma nga yi eji va e’bu Yehosafatiniri ma alia, ma nga e’yo li yi dria ’dale ’ba mani azini yila mani Israeli yini erele suru eselia ’diyi ma e’yosi, yini angu mani awale indirisi,

³yini ’ba mani nyale odrisi ’bezasirisi, yini agimvani fele oku awuru ma patani, yini zamva fele ozile ewasi, yi ma mvu benirisi.

⁴Awa’dini, emi mani a’dini ya, emi Turo pi Sidoni be, azini angu dria Filisitia ma ageia ’diyi la? Emi nga ma ofe ra ya? Emi ka nga ma ofe ra, ma nga of eta emini omvi be emi ngulupi ma dria mbele mbele,

⁵A’disiku emi ’du ndra dahabu mani mele mani be, emi ji ofi hekalu emini ma alia, afa mani ndrizaru Imani lele tu ’diyi be,

⁶emini Yuda lanzipi piyi fele jele, Yerusalemu anzipi be, Giriki anzi ’diyi dri, emi ma eji yi ani ziri lokiri yiniasirisi.

⁷Mi ndre, ma nga yi enga engazu pari emini yi ozizu aleniariasi, ma nga ’yeta emini ma aroti omvi be emi ngulupi ma dria,

⁸Ma nga agupianzi emini piyi ozi Yuda anziyi ma dria ezoanzi emini be, yi’i yi nga yi ozi ’ba Sebaa, suru ovupi re ’diyi dri; te Yehova ’yo ra,

⁹Emi olu e’yo ’diri suru eselia: Emi ofu omba ma e’yo, emi enga ’ba okporu ’diyi. Emi fe ’ba ombaru ’diyi ma esi ogogo, emi fe yi ma etu.

¹⁰Emi di e’bu emini seiru, azini emi di pere emini ajuru; ’ba adaza ma ’yo kini, Ma ’ba okpo beni.

¹¹Emi ’ye mbele mbele, emi emu, emi suru ageinia ’diyi dria, emi oku emi tualu. Yehova la, mi fe ’ba mini okpo be ’diyi ma esi ’darisi va.

¹²Suru ma enga yi, ma etu e’bu Yehosafatiniria; a’disiku ma nga ri ’dale suru dria ageinia ’diyi ma e’yo lizu.

¹³Emi su eli, a’disiku anya ka ’bo. Emi emu, emi tu, a’disiku pari patiefi ma su tuzuri ga ’bo. Patiefi ma su ga imvua tre, drini era va; a’disiku ezata yini amboru.

¹⁴’Ba ongulumuru, ongulumuru, e’buti e’yo lizuria! A’disiku o’du Yehovaniri ovu ogogo e’buti e’yo lizuria.

¹⁵Etu pi bi iniru mba be, ’bi’bio ku diko ja.

¹⁶Yehovani nga no Zionia, eri nga e’yo ’yo i o’dukosi Yerusalemua, ’bu pi nga ya nyaku be ya ya. Te Yehovani nga ovu pari ’ba ini ’diyini yi ta mbazu aleniariru pari okporu anzi Israelini dri indi.

¹⁷’Dini emi nga ni ma Yehova Mungu eminiri, ma adri Zioni oni mani alatararuri ma alia. O’du ’dasi Yerusalemuni nga di ovu alatararu, ’ba jururu ngani aga eri ma aliasi dika ku.

¹⁸Eri nga eca ’dini o’du ’dasi, oni ruaa patiefi ma su aluzaruni nga tini, oni were ma ruaa lesuni nga rani, azini yi nyiri Yudani ’diyi ma alia yini nga rani; yi a’dini nga efu jo Yehovani ma alia, yiniri nga ra e’buti Sitimunia.

¹⁹Misirini nga ovu andruru, Edomuni nga ovu rokorupirini, yini Yuda anziyi ’yele eganasirisi, yini ’ba e’yo kokoru ’diyi ma ari adale yi ma anguarisi.

²⁰Te Yudani nga ovu ’dani ’dani, Yerusaremuni nga ovu a’bianzi vusi a’bianzi vusi.

²¹Ma nga ari yini, mani nga e’yoni wule kuri, ma e’yo onzi wu; Yehovani adrile Zioniarisi.