Read lugbara Amosi 1 Bible Online

Amosi 1 - lugbara bible

Amosi 1

¹E’yo Amosini ’yole ’diyi, eri’i ’ba kabilo ocepi Tekoaa ’diyi ma eseliari; eri ndre e’yo ’diyi e’yo Israelinisi, ewu Uzia opi Yudaarinisi, azini ewu Yeroboamu Yoasi mvi opi Israelinirinisi, ndre eri eli iri de nga oyakia oyani angu ku.

²Eri nga ’yo: Yehovani nga ono Zionia, nga o’duko mi fe efuzu Yerusalemuasi; angu nyamukoru ’ba kabilo ocepi ’diyini nga ovu candisi, oni Karimeli ma dri mbiliri nga onyu ra.

³Yehova ’yo ’dini: Ezata Damasikini na, adani su ’diyi ma e’yosi ma ngani panga yini ma ti ja kalaa ’de ku; a’disiku yini Gileadini cole afa anya cozu ayaru ’diyisirisi.

⁴Te ma nga aci ma ti pe Hazaeli vile joa, eri nga jo Beni-hadadini onyiru tu ’diyi ve kieikiei ra.

⁵Ma nga vini katala Damasiki ma tile opizuri onyo ra, ma nga ’ba adripi e’bu Aveniari ma dri ja ra, ’ba kali opiniri ’dupi jo Edeniari be tualu; azini ’ba nga ’ba Suriaa ’diyi ji ati’baru kpere Kiria, Yehova ’yo ra.

⁶Yehova ’yo ’dini: Ezata Gazani na, adani su ’diyi ma e’yosi ma ngani panga yini ma ti ja kalaa ’de ku; yini suru jile pi ati’baru yi fezu Edomu dririsi,

⁷Te ma nga aci ti pe abi kaliru Gazaaria, eri nga jo erini onyiru tu ’diyi ve kieikiei ra.

⁸Ma nga vini ’ba adripi Asidodia ’diyi ma dri ja ra, ’ba kali opiniri ’dupi Asikeloniari be tualu; vutinia ma nga ma dri oja Ekironi ma dria; ’ba Filisitiaa acepi jolokoru ’diyi nga dri ja ra, Opi Yehova ’yo ra.

⁹Yehova’yo’dini: Ezata Turoni na, adani su ’diyi ma e’yosi ma ngani panga yini ma ti ja kalaa ’de ku;yini suru jile pi ati’baru, yi fezu Edomu dririsi, yini aziza adripiniri ma e’yo egale kurisi.

¹⁰Te ma nga aci ti pe abi kaliru Turoari ma dria, eri nga jo yini onyiru tu ’diyi ve kieikiei ra.

¹¹Yehova ’yo ’dini: Ezata Edomuni na, adani su ’diyi ma e’yosi ma ngani panga yini ma ti ja kalaa ’de ku; a’disiku erini adripi ini ma vuti drole seisirisi, erini yiki ’bele dria i vu rerisi, aokoni eri olile zurisi, erini adra ini ma ta mbale i asia ’danirisi.

¹²Te ma nga aci ma ti pe Temani ma dria, eri nga jo Boziraa onyiru tu ’diyi ve kieikiei ra,

¹³Yehova ’yo ’dini: Ezata anzi Amonini na, adani su ’diyi ma e’yosi ma ngani panga yini ma ti ja kalaa ’de ku; yini oku oporovuru ovupi Gileadia ’diyi asile elisirisi, yi ma ’ba angu yini walaru ani.

¹⁴Te ma nga aci edu abi kaliru Rabaari ma dria, eri nga jo yini onyiru tu ’diyi ve kieikiei, etu ’bani alicere o’bezu ombaarisi, etu olirikoni angu lizu okposirisi;

¹⁵opi yini nga mu ati’boru angu azinia, eri’i tualu ’ba erini opiru ’diyi be, Yehova ’yo ra.