Read lugbara Amosi 3 Bible Online

Amosi 3 - lugbara bible

Amosi 3

¹Emi eri e’yo Yehovani ’yole emi ruaa ’diri, emi anzi Israelini la; adani, e’yo nde ovu suru pi mani ofule ejile engazu angu Misiriari ma ruaa, ’dini kini:

²Ma ni emi’i kiri a’dule suru nyakua ’diyi ma eselia dria; e’yo ’disi ma nga emi andri ra e’yo onzi eminiri ma arioti ofezu emi ruaa ra,

³’Ba iri nga ad tualu de nga edeni e’yo nde yi ma eselia okorisi ku ya?

⁴Kamini nga no oce talaa de nga cini anyapa ku ya? Kamimvani nga wu oji erini ma alia de bini afa ku ya?

⁵Ariani nga e’de va nyakua kuruso alia de nga ’ba ’bani baka eri dri ku ya? Ongani nga enga nyakuasi okposi, de isu bini afa aluni ku ya?

⁶’Ba ka guka vu akua, ’ba ngani ovu urisi ani ku ya? Ocokoni nga eca aku azinia, de Yehova ’yenini ku ya?

⁷Ada, Opi Yehova ngani e’yo azini ’ye e’yoni ece kokoru ati’ba erini nabiru ’diyi dri ku.

⁸Kami wu ’bo; a’di ovuni urisi kunini ya? Opi Yehova ’yo e’yo ’bo; a’di eco e’yoni oluzaru kamini ya?

⁹Emi ma eku e’yoni jo Asidodia onyiru tu ’diyi ma alia, jo angu Misiria onyiru tu ’diyi ma alia indi, emi ’yo ’dini, Emi oku emi oni Samariaa ’diyi ma dria, emi ndre iyikiyi amboru tu ovupi alenia ’diyi ’doni; inzata yini ’ba inzazu alenia ’diyi ’doni.

¹⁰’Ba e’yo ’yezu eganasiri pi ma ta mbapi ’ba ma afa vile dri riza be, jo onyiru yini ma alia’diyi, yi nini ’yeta onyiru ’yezu ku, Yehova ’yo ra.

¹¹E’yo ’disi Opi Yehova ’yo ’dini: Ari’boni nga ovu indi, eri nga ovu angu ageia dria, eri nga okpo mini nze, eri nga jo onyiru tu mini ’diyi ma afa opa ra.

¹²Yehova ’yo ’dini: Ekile ’ba kabilo ocepirini pa iri kani bi ma esele alu epale kami tiliarile, ’dinile indi yi nga Israeli anzi ripi Samariaa gbolo ma kalatia, bongo gboloni edele ndrila ndrila dri arizuri ma dria ’diyi opa ’dini.

¹³Emi ma eri e’yoni, emi ma nze e’yo asu suzu ori’ba Yakoboni ma ruaa, Opi Yehova, Mungu asikari ongulumuruni ’yo ra.

¹⁴A’disiku o’du mani ngazu ’ba Israelini andrizu ezata yini ma arioti ofezu yi ma ruaarisi, o’du nde ’dasi ma nga vini pari edeta edezu Betelia ’diyi andri arioti ofezu ra; yi nga pari nde ’diyi ma o’yu oli ra yini o’dezu va nyakua.

¹⁵Ma nga jo ’bani o’azu alenia ayisi ’diyi anzu ra, jo elini ’diyi be tualu; jo sile ewasisi ’diyi nga dri ja ra, jo amboru ’diyi ma e’yoni nga asi ra Yehova ’yo ra.