Read lugbara Yona 1 Bible Online

Yona 1 - lugbara bible

Yona 1

¹E’yo Yehovani nga eca Yona Amitai mvi vu, kini,

²Mi enga, mi mu Nineve aku amboru ’daria, mi ega eri ma dria; a’disiku e’yo onzi yini e’da ma milia ’bo.

³Te Yona enga di apa Tarasisia Yehova ma miliasi. Eri nga si Yopaa, ’dale nga oguru isu muzu Tarasisia; eri nga di silingi gerini fe ra, nga fi alenia ani, muzu ’ba nde be Tarasisia, apazu Yehova ma miliasi.

⁴Te Yehova nga oli amboru ma ti pe miria, miri nga enga akuluku amborusi, oguru ’ye ani i nyo nyo,

⁵Te ’ba oguru ma azi ngapi ’diyi nga ovu urisi tu, yi alu alu nga wu adrou yini vu; yi nga afa ejiza ovupi oguru ma alia ’diyi o’be miria, oguru ma ovu ani nzikokoru beni. De isu Yona si ele oguru ma esele alialeruria, la i va 0’du kozu.

⁶Ka’dinile ’ba oguru ma e’i nga emu eri vu, nga ’yo tinia kini, Mini ’yezu ’diniri ma efi ngoni ya, mi ’ba o’du kopiri la? Mi enga, mi omve; Mungu mini! Kani Munguni nga e’yo amani ega, ama kazu dri jazu ku beni yani.

⁷’Ba nga di e’yo ’yo yi eselia yi agyi be alu alu, kini, Ama mu, ama ma ’be odrisi, ama ma ni e’yo onzi ’diri isu ama a’di ma e’yosiri ani beni. ’Dini yi nga di odrisi ’be, odrisi nde nga di ’de Yona ma dria.

⁸’Ba nde nga di ’yo eri tia, Mi olu amani, ama zi mi tia, e’yo onzi ’diri isu ama a’di ma e’yosi ya? Mi a’di azi nga ya? Mi enga ngoa ya? Angu mini ngoa ya? Mi ’ba suru a’dikoni ya?

⁹Eri nga e’yo omvi yi tia, Ma Ebraniani; ma ru Yehova, Mungu ’bua, miri pi ’bapi angu a’wiru beri’i.

¹⁰Ka’dini ’ba nde nga di ovu ani urisi tu aga ra, nga ’yo eri tia, E’yo nde mini ’yele ’diri a’di e’yoni ya? A’disiku ’ba nde ni ra kini eri apa Yehova ma miliasi, erini e’yoni olule yi tia ’borisi.

¹¹Yi nga di ’yo eri tia, Ama ma ’ye mi ngoni, miri ma adri ama dri tili beni ya? mirini ombule okposi dika dika olisi aga rarisi,

¹²Eri nga ’yo yi tia, Emi ’du di ma ’bezu miria; mirini nga adri emi dri tili ani; a’disiku ma ni ra akuluku amboru ’diri isu emi e’yo manisi.

¹³Te ti, ’ba nde pe yi pati oguru pezurisi asi driasi, o’bizu oguru omvizu yi kutia dika, te econi yini ku, mirini ombule dika dika okposi oli yi ma driliarisi.

¹⁴E’yo ’dirisi yi wu Yehova vu, yi ’yo ra, Ama matu ’ba mi vu, Yehova la! kiri kiri ama matu ’ba mi vu, mi ja ama dri agu ’diri ma e’yosi ku fo! Mi ma ’ba ’ba e’yo kokoruri ma avuari ama dria ku; mi’i Yehova, mini ’yele mini lelerile ’borisi.

¹⁵Yi nga di Yonani ’du ’be miri ma alia ani; miri nga ku ombukokoru ja ani.

¹⁶’Ba nde nga di Yehovani ru tu ani; nga edeta ede Yehova dri, oyo soza be indi.

¹⁷De Yehova ede e’bi amboru ku ngonde Yonani kizu ’bo; Yona nga ovu di e’bi nde ma alia o’du pale na etu zu, ini rra.