Read lugbara Yona 3 Bible Online

Yona 3 - lugbara bible

Yona 3

¹E’yo Yehovani nga eca Yona vu pale iririsi kini,

²Mi enga, mi mu Nineve aku amboru ’daria, mi olu eri tia oluta mani azile mi tiari.

³’Dini Yona enga di ra, mu Ninevea Yehovani ’yolerile. Te Nineveni aku amboru tu, ’bani ani acizu alenia o’du na ’dipiri.

⁴Ka’dinile Yona e’do di fizu aku ma alesi acizu o’du alu, Eri oyu o’duko urusi kini, Ace nga o’du kali su, Nineveni nga dri ja ra!

⁵’Ba Ninevea ’diyi nga ani Mungu a’i ra; yi azi nyaka ’dazu, yi nga di koliba osu yi ma ruaa, e’dozu ’ba ’warasi kpere cazu ’ba nyiri vu indi.

⁶E’yoni ku kpere opi Nineveari ma bilia ra, eri nga di enga ogua erini opiniri ma driarisi, nga bongo ini tru i ma ruaarisi ra, nga koliba su, nga ri va ofuta ma alia.

⁷Eri nga e’yo kuza eku Nineve ma eselia dria, azita opi pini ’ba ’wara eri ma palaa ’diyi berisi, kini: ’Ba dria alu alu ma o’bi afa azini ma aji aluni ku, kani ’ba agupiru, kani anyapani, kani tini, kani kabiloni; yi ma nya nyaka ku, ma mvu yi ku indi;

⁸te yi dria ma su koliba yi ma ruaa, ’ba piyi anyapa pie dria, yi ma wu Mungu vu asi driasi; adaru yi alu alu ma oja yi e’yo onzi yini kuzu, e’yo eganaru yini ’yele yi ma drisiri kuzu indi.

⁹A’di nini, kani Mungu ngani i oja, ngani i ma asi omvi dika ku, i ma aoko vepi okporuri kuzu, ama ma ja dri ani ku beni yani?

¹⁰Mungu ndre ’yeta yini, yini yi ojazu geri yini onziri kuzu ra te Mungu nga di asi omvi, nga e’yo onzi nde erini ’yole kini i nga ’ye yi vu rari ’ye ku.